ଭୁବନେଶ୍ୱର, ୯।୪ (ତପନ ସ୍ବାଇଁ): ରୋଲ୍ ବଲ୍ରେ ପୁଣି ଓଡ଼ିଶା ଖେଳାଳିମାନେ ଚମକ ସୃଷ୍ଟି କରିଛନ୍ତି। ଆସାମ ଗୁଆହାଟୀସ୍ଥିତ ରୁଦ୍ର ସିଂ ରୋଲ ବଲ୍ ଷ୍ଟାଡିୟମରେ ଅନୁଷ୍ଠିତ ୧ମ ଜାତୀୟ ପୂର୍ବାଞ୍ଚଳ ୧୭ ବର୍ଷରୁ କମ୍ ରୋଲ ବଲ୍ ଚାମ୍ପିୟନଶିପ୍ରେ ଓଡ଼ିଶାର ଉଭୟ ବାଳିକା ଓ ବାଳକ ଦଳ ଚମତ୍କାର ପ୍ରଦର୍ଶନ କରି ରୌପ୍ୟ ପଦକ ହାସଲ କରିଛନ୍ତି। ଗତ ୬ ଓ ୭ ତାରିଖ ଦୁଇଦିନଧରି ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଲିଗ୍ ଏବଂ ନକ୍ଆଉଟ ପର୍ଯ୍ୟାୟରେ ଓଡ଼ିଶା ଖେଳାଳିମାନେ ସୁନ୍ଦର ପ୍ରଦର୍ଶନ କରିବାରୁ ଉଭୟ ବିଭାଗରେ ଦଳ ଫାଇନାଲରେ ପ୍ରବେଶ କରିଥିଲା। ଓଡ଼ିଶା ବାଳକ ଦଳ ମେଘାଳୟକୁ ୧୩-୦, ଚଣ୍ଡିଗଡ଼କୁ ୫-୨ ଓ ବିହାରକୁ ୭-୨ ଗୋଲରେ ହରାଇ ସେମିଫାଇନାଲରେ ପ୍ରବେଶ କରିଥିଲା। ସେଠାରେ ଝାଡ଼ଖଣ୍ଡକୁ ୭-୬ ଗୋଲରେ ହରାଇ ଫାଇନାଲରେ ପ୍ରବେଶ କରିଥିଲା ଏବଂ ସ୍ବର୍ଣ୍ଣ ମୁକାବିଲାରେ ଆସାମଠାରୁ ୬-୮ ଗୋଲରେ ହାରି ଯାଇଥିଲା। ସେହିପରି ବାଳିକା ଦଳ ଝାଡ଼ଖଣ୍ଡକୁ ୪-୦ରେ ହରାଇବା ପରେ ସିକ୍କିମ ବିପକ୍ଷ ମ୍ୟାଚକୁ ଗୋଲଶୂନ୍ୟ ଡ୍ର ରଖିଥିଲା। ଏହାପରେ ମେଘାଳୟକୁ ୧୦-୦ ହରାଇଥିଲା ଏବଂ ଆସାମଠାରୁ ୦-୧ରେ ହାରିବା ସତ୍ତ୍ୱେ ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିଥିଲା। ସେମିରେ ଝାଡ଼ଖଣ୍ଡକୁ ୨-୦ରେ ହରାଇ ଦଳ ଫାଇନାଲରେ ପ୍ରବେଶ କରିଥିଲା। ମାତ୍ର ଟାଇଟଲ ମୁକାବିଲାରେ ଆସାମଠାରୁ ୧-୪ ଗୋଲରେ ପରାସ୍ତ ହୋଇଥିଲା। ଓଡ଼ିଶା ଗୋଲକିପର କମଲ କ୍ରିଷ୍ଣା ଚାମ୍ପିୟନଶିପ୍ର ଶ୍ରେଷ୍ଠ ଗୋଲକିପର ବିବେଚିତ ହୋଇଥିଲେ। ସେହିପରି ଆଟାକର ପ୍ଲେୟର ପ୍ରୀତିଶ୍ ଆର୍ଯ୍ୟନ ଜେନା ସର୍ବାଧିକ ୨୪ ଗୋଲ ସ୍କୋରକରି ଟୁର୍ନାମେଣ୍ଟର ଶ୍ରେଷ୍ଠ ଖେଳାଳି ପୁରସ୍କାର ହାସଲ କରିଥିଲେ ବୋଲି ଓଡ଼ିଶା ରୋଲ ବଲ୍ ଆସୋସିଏଶନର ପ୍ରତିଷ୍ଠାତା ସଦସ୍ୟ ପାର୍ଥ ସାରଥି ଜେନାଙ୍କ ସୂତ୍ରରୁ ପ୍ରକାଶ।
