ଭୁବନେଶ୍ୱର, ୧୯ା୨:ଓଡ଼ିଶାର ୨ ଲୁହାପଥର ଖଣିରୁ ଉତ୍ପାଦନ ଆରମ୍ଭ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କେନ୍ଦ୍ର ଖଣି ମନ୍ତ୍ରୀ ପ୍ରହଲ୍ଲାଦ ଜୋଷୀ ଗୁରୁବାର ଭର୍ଚୁଆଲ କାର୍ଯ୍ୟକ୍ରମରେ ଖଣିଗୁଡ଼ିକର ଖନନ କାର୍ଯ୍ୟକୁ ଶୁଭାରମ୍ଭ କରିଛନ୍ତି। ଏହି ଲୁହାପଥର ଖଣି ମଧ୍ୟରେ ଜିଲଙ୍ଗ-ଲାଙ୍ଗଲୋଟା ଏବଂ ଗୁଆଳି ସାମିଲ ରହିଛି। ଖଣିଗୁଡ଼ିକରୁ ମାସିକ ୧୫ ଲକ୍ଷ ଟନ୍ ଉତ୍ପାଦନ କରିବା ନେଇ ଯୋଜନା ରଖାଯାଇଛି। ୨ ଖଣିରେ ମୋଟ ୨୭୫ ନିୟୁତ ଟନ୍ ଖଣିଜ ସମ୍ପଦ ରହିଥିବା ଜଣାପଡ଼ିଛି।
ଇସ୍ପାତ, ଆଲୁମିନିୟମ ଏବଂ ଅନ୍ୟ ଖଣିଜ ଶିଳ୍ପ ଉଦ୍ୟୋଗ କ୍ଷେତ୍ରରେ ଓଡ଼ିଶା ବିଶ୍ୱର ଏକ ପ୍ରମୁଖ ହବ୍ ହେବାର କ୍ଷମତା ରଖିଥିବା ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି। ସେ ପୁଣି କହିଛନ୍ତି, ଗତ ୨ଦଶନ୍ଧି ମଧ୍ୟରେ ରାଜ୍ୟ ଖଣି ଏବଂ ଖଣିଜ ଶିଳ୍ପ କ୍ଷେତ୍ରରେ ଅନେକ ଅଭିବୃଦ୍ଧି ହାସଲ କରିଛି। ରାଜ୍ୟ ସରକାର ଗ୍ରହଣ କରୁଥିବା ଶିଳ୍ପ ଉପଯୋଗୀ ନୀତି ଯୋଗୁ ନିବେଶକ ବେଶ୍ ଉତ୍ସାହିତ ହୋଇଛନ୍ତି। ଖଣି କ୍ଷେତ୍ରକୁ ଉତ୍ସାହିତ କରିବା ଲାଗି ବିଶେଷ ପଦକ୍ଷେପ ହାତକୁ ନିଆଯାଉଛି। ୫-ଟି ଅଧୀନରେ ହେଲ୍ପଡେକ୍ସ ଏବଂ ଫିଡ୍ବ୍ୟାକ୍ ସିଷ୍ଟମ କାର୍ଯ୍ୟକାରୀ ହୋଇଛି। ପ୍ରମୁଖ ଖଣିଗୁଡିକର ନିଲାମ ଏବଂ ଆଇ୩ଏମ୍ଏସ୍ ଭଳି ଆପ୍ଲିକେଶନର ବ୍ୟବହାର କରାଯାଉଛି। ଖଣି ଏବଂ ଖଣିଜ କ୍ଷେତ୍ରରେ ରହିଥିବା ସମ୍ଭାବନା ଦିଗରେ ଉଭୟ କେନ୍ଦ୍ର ଏବଂ ରାଜ୍ୟ ସରକାର ମିଳିତ ହୋଇ କାମ କରୁଥିବା ମୁଖ୍ୟମନ୍ତ୍ରୀ ମତ ପ୍ରକାଶ କରିଛନ୍ତି। ଖଣି କ୍ଷେତ୍ରର ସଂସ୍କାରକୁ ରାଜ୍ୟ ସରକାର ସମର୍ଥନ କରୁଥିବାରୁ ଏହାଦ୍ୱାରା ଉଭୟ ରାଜ୍ୟ ଏବଂ କେନ୍ଦ୍ର ସରକାର ଲାଭବାନ ହୋଇପାରିବେ। ୨ ଖଣିକୁ ଓଏମ୍ସିକୁ ପ୍ରଦାନ କରିଥିବାରୁ ସେ କେନ୍ଦ୍ର ଖଣି ମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି।
ଏହି ପରିପ୍ରେକ୍ଷୀରେ ଜୋଷୀ କହିଛନ୍ତି, ଖଣିଗୁଡିକ କ୍ଷୁଦ୍ରଶିଳ୍ପକୁ ଲୁହାପଥର ଯୋଗାଣରେ ସ୍ଥିତାବସ୍ଥା ବଜାୟ ରଖିବାକୁ ସକ୍ଷମ ହେବା ସହ ବୃହତ୍ ପରିମାଣର ନିଯୁକ୍ତି ସୁଯୋଗ ସୃଷ୍ଟି କରିବ। ନୂଆ ଖଣି ଦ୍ୱାରା ଓଡ଼ିଶା ସରକାର ବାର୍ଷିକ ପ୍ରାୟ ୪ ହଜାରରୁ ୫ ହଜାର କୋଟିର ରାଜସ୍ବ ପାଇବେ। ରାଜ୍ୟରେ ଅଧିକ ଖଣି ନିଲାମ ଏବଂ ବନ୍ଦ ପଡିଥିବା ଖଣିଗୁଡିକୁ କାର୍ଯ୍ୟକ୍ଷମ କରାଇବା, ଲୁହାପଥର ବ୍ଲକଗୁଡିକରୁ ଉତ୍ପାଦନ ବୃଦ୍ଧି ଏବଂ ରାଜସ୍ବ ସୃଷ୍ଟି ଉପରେ କାମ କରିବାକୁ ଜୋଷୀ ରାଜ୍ୟ ସରକାରଙ୍କୁ ନିବେଦନ କରିଛନ୍ତି। ଖଣିଜ ଉତ୍ପାଦନ କ୍ଷେତ୍ରରେ ଭାରତକୁ ଆତ୍ମନିର୍ଭର କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଦକ୍ଷେପ ନେଉଥିବାରୁ କେନ୍ଦ୍ର ସରକାର ରାଜ୍ୟକୁ ସମସ୍ତ ପ୍ରକାର ସହାୟତା ଯୋଗାଇ ଦେବେ ଜୋଷୀ ପ୍ରତିଶ୍ରୁତି ଦେଇଛନ୍ତି।
