ନୂଆଦିଲ୍ଲୀ, ୧୦।୯ : ଭାରତ-ଚାଇନା ସୀମାରେ ପାଟ୍ରୋଲିଂ ବେଳେ ବର୍ତ୍ତମାନ ଉଭୟ ଦେଶର ସୈନିକଙ୍କ ମଧ୍ୟରେ ମୁହାଁମୁହିଁ ହେବାର ଆଶଙ୍କା କମ୍ ହେବାରେ ଲାଗିଛି। ୮୦ ମାନ୍ଦାରିନ ଶବ୍ଦ ମାଧ୍ୟମରେ,ଆଇଟିବିପି ଚାଇନା ସୈନ୍ୟକୁ ବହୁତ ଭଲ ଭାବରେ ଜବାବ ଦେଉଛନ୍ତି। ଆଇଟିବିପି ଏହାର ଯବାନଙ୍କଠାରୁ ଆରମ୍ଭ କରି ବରିଷ୍ଠ ଅଧିକାରୀଙ୍କ ପର୍ଯ୍ୟନ୍ତ ଚାଇନାର ଭାଷା ମାନ୍ଦାରିନ ଶିଖିବାକୁ ବାଧ୍ୟତାମୂଳକ କରିଛି। ମାନ୍ଦାରିନ କହିବା ଏବଂ ଲେଖିବା ଦୁନିଆର ସବୁଠାରୁ କଷ୍ଟଦାୟକ ଭାଷାରେ ଅନ୍ତର୍ଭୁକ୍ତ ହୋଇଛି। ଏହା ସତ୍ତ୍ୱେ ଆଇଟିବିପି କର୍ମଚାରୀମାନେ ଅକ୍ଲାନ୍ତ ପରିଶ୍ରମ ଏହାକୂ ଶିକ୍ଷା କରିବାରେ ସଫଳ ହୋଇଛନ୍ତି । ଏହା ପୂର୍ବରୁ ଏଲସିରେ ପୋଷ୍ଟ କରାଯାଇଥିବା ଉଭୟ ଦେଶର ସୈନିକଙ୍କ ମଧ୍ୟରେ ବିବାଦ ଲାଗି ରହିଥିଲା। ସଠିକ ଭାବରେ ଯୋଗାଯୋଗ କରିବାରେ ସକ୍ଷମ ନହେବା ଯୋଗୁ ମୁହାଁମୁହିଁ ସ୍ଥିତି ସୃଷ୍ଟି ହେଉଥିଲା।
ତେବେ ଏଭଳି ଘଟଣା ଏଡାଇବା ଲାଗି ଆଇଟିବିପି ଅନ୍ତର୍ଜାତୀୟ ସୀମା ପ୍ରତିରକ୍ଷା ନିୟମ ଅନୁଯାୟୀ ଚାଇନା ସୈନିକମାନଙ୍କ ସହ ଯୋଗାଯୋଗ କରୁଛି। ପାଟ୍ରୋଲିଂ ସମୟରେ ଆଇଟିବିପି ଏବଂ ଚାଇନା ସୈନ୍ୟମାନେ ପାଖାପାଖି ଯାଇଥାନ୍ତି। ପୂର୍ବରୁ ଅଙ୍ଗଭଙ୍ଗୀ କରି ସେମାନଙ୍କୁ ଉତ୍ତର ଦେବା ଦ୍ୱାରା ସମସ୍ୟା ଉପୁଜୁଥିଲା। ତେଣୁ ଏହାର ସମାଧାନ ପାଇଁ ମାନ୍ଦାରିନ୍ ଭାଷା ଶିକ୍ଷା ଉପରେ ଗୁରୁତ୍ୱାରୋପ କରାଯାଇଥିଲା। ଆଇଟିବିପିରେ, ୨୦୧୮ରେ ମାନ୍ଦାରିନ ଭାଷା ଶିକ୍ଷା ଦିଆଯିବା ଆରମ୍ଭ ହୋଇଥିଲା। ନିୟମିତ ପାଠ୍ୟକ୍ରମ ବିଷୟରେ କହିବାକୁ ଗଲେ ଏହି ଭାଷା ଶିଖିବାକୁ ଦୁଇ-ତିନି ବର୍ଷ ସମୟ ଲାଗିଥାଏ।
ଯେତେବେଳେ ସୀମାରେ ପାଟ୍ରୋଲିଂ କରିବା ସମୟରେ ଉଭୟ ଦେଶର ସୈନିକଙ୍କ ମଧ୍ୟରେ କଳହ ଲାଗିଥାଏ। ସେତେବେଳେ ଏଥିରେ ଏକ ସାଧାରଣ ବିଷୟ ରହିଥାଏ। ଯେପରି, ତୁମେ ଆମର ସୀମା ଅତିକ୍ରମ କରିଛ। ଏଠାରୁ ବାହାରି ଯାଅ। ଏହା ଆମର ସୀମା । ଏହି କ୍ଷେତ୍ରଟି ଆପଣଙ୍କର ନୁହେଁ । ନମସ୍କାର, ତୁମେ ଭଲରେ ରୁହ, ପ୍ରବଳ ପବନ ପ୍ରବାହିତ ହେଉଛି, ତୁମର କମାଣ୍ଡରଙ୍କ ସହ କଥା ହୁଅ, ଅନାବଶ୍ୟକ ବିବାଦ ସୃଷ୍ଟି କର ନାହିଁ, ଉଭୟ ଦେଶ ବନ୍ଧୁ, ସୀମା ବିବାଦ ଠିକ ନୁହେଁ । ଧୈର୍ଯ୍ୟର ସହିତ କାମ କର। ଠେଲିବା ପରିବର୍ତ୍ତେ, ଏକ କଥାବାର୍ତ୍ତା ମନୋଭାବ ରଖ। ପାଟ୍ରୋଲିଂରେ ଯାଉଥିବା ପ୍ରତ୍ୟେକ ସୈନିକଙ୍କୁ ପ୍ରାୟ ଏଭଳି ୮୦ ଟି ଶବ୍ଦ ଶିଖାଯାଇଥିଲା।
ଏହାର ଫଳପ୍ରଦ ଫଳାଫଳ ମଧ୍ୟ ଦେଖାଗଲା ଆଇଟିବିପି ବର୍ତ୍ତମାନ ଚାଇନିଜ ଭାଷା ମାନ୍ଦାରିନକୁ ଏହାର ମୌଳିକ ପାଠ୍ୟକ୍ରମରେ ଅନ୍ତର୍ଭୁକ୍ତ କରିଛି। ଏହି ଫୋର୍ସରେ ପ୍ରାୟ ଦୁଇଶହ ପଚାଶ ମାଷ୍ଟର ଟ୍ରେନର ଅଛନ୍ତି। ସେମାନେ ଜେଏନୟୁ, ବିଦେଶୀ ଭାଷା ଇନଷ୍ଟିଚ୍ୟୁଟ, ତେଜପୁର ଏବଂ ସାନଚି ବିଶ୍ୱବିଦ୍ୟାଳୟ ଇତ୍ୟାଦି ଅନୁଷ୍ଠାନରୁ ପାଠ୍ୟକ୍ରମରେ ଶିକ୍ଷାଲାଭ କରିଛନ୍ତି। ଏହି ପାଠ୍ୟକ୍ରମର ଅବଧି ଏକ ବର୍ଷରୁ ଅଧିକ। ଏହି ମାଷ୍ଟର ଟ୍ରେନରମାନଙ୍କ ଦ୍ୱାରା ସମସ୍ତ ଯବାନ ଏବଂ ଅଧିକାରୀଙ୍କୁ ମାନ୍ଦାରିନ ଭାଷା ଶିକ୍ଷା ଦିଆଯାଉଛି।
ବର୍ତ୍ତମାନ ପର୍ଯ୍ୟନ୍ତ ଆଇଟିବିପି ପ୍ରାୟ ୬୫୦୦ ଯବାନ ଏବଂ ଅଧିକାରୀଙ୍କୁ ମାନ୍ଦାରିନ ଭାଷା ଶିକ୍ଷା ପ୍ରଦାନ କରିଛି। ପ୍ରଶିକ୍ଷଣ ସମୟରେ, ସୈନିକମାନଙ୍କୁ ଡ୍ରିଲ, ଶାରୀରିକ ବ୍ୟାୟାମ, ସୀମା ରକ୍ଷାକାରୀ ଜ୍ଞାନ କିମ୍ବା ଚାକିରିର ପ୍ରକୃତି ଅଧ୍ୟୟନ କରାଯିବା ପରି ଚାଇନିଜ ଭାଷା ଶିକ୍ଷା ଦିଆଯାଏ। ଭାଷା ଶିକ୍ଷା ଦେବାବେଳେ, ବିଶେଷ ଯତ୍ନ ନିଆଯାଏ ଯେପରି କୌଣସି ଗୁରୁତ୍ୱପୂର୍ଣ୍ଣ ଶବ୍ଦକୁ ଛାଡି ଦିଆ ନଯାଏ। ଯେଉଁ କାରଣରୁ ଶବ୍ଦର ବିପରୀତ ଅର୍ଥ ସୃଷ୍ଟି ହେବାର ଆଶଙ୍କା ରହିଥାଏ। ସୈନିକମାନଙ୍କୁ ବାରମ୍ବାର ତାଲିମ ଦିଆଯିବା ସହିତ ଯୋଗାଯୋଗ କ୍ଷେତ୍ରରେ ଅଡିଓ-ଭିଡିଓ ମିଡିଆର ସାହାଯ୍ୟ ମଧ୍ୟ ନିଆଯାଇଥାଏ।
