ନରସିଂହପୁର, ୧୭ା୯ (ସ୍ବ.ପ୍ର.): କଟକ ଜିଲା ନରସିଂହପୁର ବ୍ଲକ ଅନ୍ତର୍ଗତ ପଦାମାଳ ଗ୍ରାମରେ ଶୁକ୍ରବାର ରୋଷେଇ ବେଳେ ଗ୍ୟାସ ଲିକ୍ ହୋଇ ନିଆଁ ଲାଗିଯାଇଥିଲା। ପରେ ଗ୍ୟାସ ଟାଙ୍କି ଫାଟି ଘର ଜଳିଯାଇଛି। ନିଆଁ ଲିଭାଇବାକୁ ଉଦ୍ୟମ କରି ୧୫ରୁ ଊର୍ଦ୍ଧ୍ୱ ଲୋକ ଆହତ ହୋଇଛନ୍ତି। ପ୍ରକାଶ ଯେ, ପଦାମାଳ ଗ୍ରାମର ଦଣ୍ଡଧର ସାହୁଙ୍କ ସ୍ତ୍ରୀ ଜହ୍ନ ଶୁକ୍ରବାର ସନ୍ଧ୍ୟାରେ ଘରେ ରୋଷେଇ କରୁଥିଲେ। ଏହି ସମୟରେ ଟାଙ୍କିରୁ ଗ୍ୟାସ ଲିକ୍ ହୋଇଥିଲା। ସେ ଭୟରେ ବାହାରକୁ ଆସି ପଡ଼ୋଶୀଙ୍କୁ ଡାକିଥିଲେ। ଲୋକେ ଘର ଭିତରେ ପଶିଲା ବେଳକୁ ନିଆଁ ହୁ ହୁ ହୋଇ ଜଳୁଥିଲା। ପରେ ଗ୍ୟାସ ଟାଙ୍କି ଫାଟି ଯାଇଥିଲା। ଫଳରେ ନିଆଁ ଲିଭାଇବାକୁ ଯାଇଥିବା ଲୋକ ଆହତ ହୋଇଛନ୍ତି। ଖବରପାଇ ନରସିଂହପୁର ଅଗ୍ନିଶମବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି। ଆହତମାନଙ୍କୁ ସ୍ଥାନୀୟ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ଥିବାରୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ବିଶ୍ୱମ୍ବର ନାୟକ, ବ୍ରଜବନ୍ଧୁ ରାଉତ ଓ ଦିଲୀପ ଟାଉତଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି । ପଦାମାଲ ସରପଞ୍ଚ ରାଜକିଶୋର ରାଉତ ବିପନ୍ନଙ୍କ ପରିବାର ନିକଟରେ ପହଞ୍ଚତ୍ ସହାୟତା ଯୋଗାଇ ଦେଇଛନ୍ତି।
