ନୂଆଦିଲ୍ଲୀ,୩।୧ : ମଧ୍ୟପ୍ରଦେଶ ହାଇକୋର୍ଟ ଧର୍ମାନ୍ତରୀକରଣର ଆଇନ ଉପରେ ଦେଇଥିବା ନିଷ୍ପତ୍ତିକୁ ଚ୍ୟାଲେଞ୍ଜ କରି ରାଜ୍ୟ ସରକାରଙ୍କ ଆବେଦନ ଶୁଣାଣି କରିବାକୁ ସୁପ୍ରିମକୋର୍ଟ ରାଜି ହୋଇଛନ୍ତି। ଏହା ସହିତ ସର୍ବୋଚ୍ଚ ନ୍ୟାୟାଳୟ ମଙ୍ଗଳବାର କହିଛନ୍ତି ଯେ ସମସ୍ତ ଧର୍ମାନ୍ତରୀକରଣର ମାମଲାକୁ ବେଆଇନ ବୋଲି ଧରାଯିବ ନାହିଁ।
ମଧ୍ୟପ୍ରଦେଶ ହାଇକୋର୍ଟ ଜିଲାପାଳଙ୍କ ଅନୁମତି ବିନା ଆନ୍ତର୍ଧାର୍ମିକ ବିବାହ କରୁଥିବା ଦମ୍ପତିଙ୍କୁ ଦୋଷୀ ସାବ୍ୟସ୍ତ କରିବାକୁ ରାଜ୍ୟ ସରକାରଙ୍କୁ ବାରଣ କରିଛନ୍ତି। ସର୍ବୋଚ୍ଚ ଅଦାଲତରେ ରାଜ୍ୟ ସରକାର ଏହାକୁ ଚ୍ୟାଲେଞ୍ଜ କରିଛନ୍ତି। ଏହି ପ୍ରସଙ୍ଗରେ ନୋଟିସ ଜାରି କରି ସୁପ୍ରିମକୋର୍ଟର ଜଷ୍ଟିସ ଏମ.ଆର. ଶାହା ଏବଂ ଜଷ୍ଟିସ ସି.ଟି. ରବିକୁମାରଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହାର ଶୁଣାଣି ପାଇଁ ଫେବୃୟାରୀ ୭ ତାରିଖ କୁ ତାଲିକାଭୁକ୍ତ କରିଛନ୍ତି।
ସୋଲିସିଟର ଜେନେରାଲ ତୁଷାର ମେହେଟ୍ଟା ମଧ୍ୟ ପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶ ଉପରେ ରୋକ ଲଗାଇବାକୁ ଅନୁରୋଧ କରିଥିଲେ ମଧ୍ୟ ସୁପ୍ରିମକୋର୍ଟ କୌଣସି ନିର୍ଦ୍ଦେଶ ଜାରି ଲାଗି ମନା କରିଦେଇଥିଲେ। ମେହେଟ୍ଟା କହିଛନ୍ତି ଯେ ବେଆଇନ ଧର୍ମାନ୍ତରୀକରଣର ପାଇଁ ବିବାହ କରାଯାଉଛି ଏବଂ ଆମେ ଏନେଇ ଆଖି ବନ୍ଦ କରି ବସି ପାରିବୁ ନାହିଁ।
ହାଇକୋର୍ଟ ମଧ୍ୟବର୍ତ୍ତୀକାଳୀନ ଆଦେଶରେ ମଧ୍ୟପ୍ରଦେଶ ଧାର୍ମିକ ସ୍ବାଧୀନତା ଅଧିନିୟମର ଧାରା ୧୦ ଅନୁଯାୟୀ ଆନ୍ତର୍ଧାର୍ମିକ ବିବାହ କରୁଥିବା ବୟସ୍କ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ନ କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି।
ନଭେମ୍ବର ୧୪ ରେ ହାଇକୋର୍ଟ କହିଥିଲେ ଯେ ଉକ୍ତ ଆଇନର ଧାରା ୧୦ ଅଣ-ସାମ୍ବିଧାନିକ ଅଟେ। ଏହା ଅନ୍ତର୍ଗତ ଆନ୍ତର୍ଧାର୍ମିକ ବିବାହ କରିବାକୁ ଚାହୁଁଥିବା ବ୍ୟକ୍ତିମାନେ, ଜିଲାପାଳଙ୍କ ପୂର୍ବ ଅନୁମୋଦନ ନେବା ବାଧ୍ୟତାମୂଳକ। ରାଜ୍ୟର ଧାର୍ମିକ ସ୍ବାଧୀନତା ଅଧିନିୟମ ଅନୁଯାୟୀ ମିଥ୍ୟା କିମ୍ବା ପ୍ରତାରଣା, ପ୍ରଲୋଭନ, ଧମକ, ଅନୁଚିତ ପ୍ରଭାବ, ବାଧ୍ୟତାମୂଳକ ବିବାହ କିମ୍ବା ଅନ୍ୟ କୌଣସି ଠକେଇ ମାଧ୍ୟମରେ ଧର୍ମାନ୍ତରୀକରଣ କରିବା ନିଷେଧ ।
ମଧ୍ୟପ୍ରଦେଶ ହାଇକୋର୍ଟ ଏହି ଆଇନର ଧାରାକୁ ଚ୍ୟାଲେଞ୍ଜ କରୁଥିବା ସାତୋଟି ଆବେଦନ ଉପରେ ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ଦେଇଛନ୍ତି। ଏହି ଅଧିନିୟମ ଅନୁଯାୟୀ ରାଜ୍ୟ ସରକାରଙ୍କୁ ସମ୍ପୃକ୍ତ ବ୍ୟକ୍ତି ବିଶେଷଙ୍କୁ ଦୋଷୀ ସାବ୍ୟସ୍ତ ନକରିବା ନେଇ ରୋକିବାକୁ ମଧ୍ୟବର୍ତ୍ତୀକାଳୀନ ନିର୍ଦ୍ଦେଶ ଦେଇଥିଲେ।
