ଲକ୍ଷ୍ନୌ,୧୬ା୮: ଉତ୍ତରପ୍ରଦେଶରେ ଏକ ବାଇକ୍ରେ ୭ ଜଣ ଲୋକ ଯାଉଥିବାର ଦେଖି ପୋଲିସ ଆଶ୍ଚର୍ଯ୍ୟ ହୋଇଯାଇଛି। ୟୁପି ପୋଲିସ ଏହି ବାଇକ୍ରେ ଯାଉଥିବା ଲୋକଙ୍କ ଫଟୋ ସୋସିଆଲ ମିଡିଆରେ ଶେୟାର କରି ଲୋକଙ୍କୁ ସଚେତନ କରୁଛି। ୟୁପି ପୋଲିସ ନିଜ ଟୁଇଟର ଆକାଉଣ୍ଟରେ ଏହି ଫଟୋକୁ ଶେୟାର କରି ଲେଖିଛି, ‘ଚାଲାଣକୁ ନୁହଁ, ଯମରାଜଙ୍କୁ ତ ଡର’।
ୟୁପି ପୋଲିସର ଏହି କଥା ସମ୍ପୂର୍ଣ୍ଣ ଠିକ୍। ସଡ଼କରେ କେବଳ ଚାଲାଣକୁ ଡରନ୍ତୁ ନାହିଁ ସମସ୍ତ ନିୟମ ମାନି ଚଳିବା ଉଚିତ୍। ନିୟମ ପାଳନ କଲେ ଲୋକେ ସୁରକ୍ଷିତ ରହିବେ।
ୟୁପି ପୋଲିସ ଶେୟାର କରିଥିବା ଏହି ଫଟୋରେ ଜଣେ ବ୍ୟକ୍ତି ମହିଳାଙ୍କ ବ୍ୟତୀତ ୫ ଶିଶୁଙ୍କୁ ବସାଇ ଯାଉଛନ୍ତି। ଖାଲି ଏତିକି ନୁହେଁ, ନିଜେ ମଧ୍ୟ ହେଲମେଟ୍ ପିନ୍ଧିନାହାନ୍ତି। ଏହି ବ୍ୟକ୍ତିଙ୍କୁ ରାସ୍ତାରେ ଦେଖି ପୋଲିସ କର୍ମଚାରୀ ତାଙ୍କୁ ହାତଯୋଡ଼ି ନମସ୍କାର କରିଛନ୍ତି।
ଏହି ଦୃଶ୍ୟ ଦେଖିବାକୁ ମିଳିଛି ଏଟା ଜିଲା ମାୟା ପ୍ୟାଲେସ ଛକରେ। ଏଠାରେ ପୋଲିସ ଜଣେ ଲୋକ ୭ ଜଣଙ୍କୁ ବାଇକ୍ରେ ବସାଇ ଯାଉଥିବାର ଦେଖି ଅଟକାଇଥିଲା। ପଚାରିବାରୁ ବ୍ୟକ୍ତିଜଣକ କହିଲେ, ସେ ହସ୍ପିଟାଲ ଯାଇଥିଲେ। ନିଜ ପରିବାର ସହ ଘରକୁ ଫେରୁଛନ୍ତି। ପୋଲିସ ଚାଲାଣ ବି କାଟିଲା ଏଥିସହିତ ତାଙ୍କୁ ଟ୍ରାଫିକ୍ ନିୟମ ବିଷୟରେ ମଧ୍ୟ ସଚେତନ କଲା।
