ପୁରୀ ଅଫିସ,୨୦।୯: ସ୍ବର୍ଗଦ୍ୱାର ନିକଟରେ ବିଦେଶୀ ମଦ ଦୋକାନ ପ୍ରସଙ୍ଗ କ୍ରମଶଃ ବିବାଦୀୟ ହେବାରେ ଲାଗିଛି। ଏଠାରେ ପ୍ରଶାସନ ମଦ ଦୋକାନ ବନ୍ଦ ପାଇଁ କୁନ୍ଥୁକୁନ୍ଥୁ ହେଉଥିବା କୁହାଯାଉଛି। ତେବେ ରବିବାର ଲୋକଦେଖାଣିଆ ଭାବେ କେତେକ ମଦ ଦୋକାନକୁ ବନ୍ଦ କରାଯାଇଥିବା ଜଣାପଡ଼ିଛି। ମହାପ୍ରଭୁଙ୍କ ଅମୃତ ମଣୋହୀ ଜମି ତଥା ସ୍ଥିତିବାନ ପ୍ଲଟରେ ଥିବା ମଦ ଦୋକାନକୁ ତୁରନ୍ତ ବନ୍ଦ କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଅବକାରୀ ବିଭାଗକୁ ଚିଠି ଲେଖାଯାଇଥିଲା। ତେବେ କେବଳ ମହାପ୍ରଭୁଙ୍କ ଜମିରେ ଥିବା ମଦ ଦୋକାନ ବନ୍ଦ କରିବା ପାଇଁ ଅବକାରୀ ବିଭାଗ ମୌଖିକ ନିର୍ଦ୍ଦେଶ ଦେଇଛି। ମାତ୍ର ଏନେଇ ରବିବାର ସୁଦ୍ଧା କୌଣସି ଲିଖିତ ପତ୍ର କିମ୍ବା ନିର୍ଦ୍ଦେଶନାମା ଜାରି ହୋଇ ନ ଥିବା ଜଣାପଡ଼ିଛି।
ସୂଚନା ଅଧିକାର କର୍ମୀ ଦିଲୀପ କୁମାର ବରାଳ କହିଛନ୍ତି, ସ୍ବର୍ଗଦ୍ୱାର ପାଖରେ ମଦ ଦୋକାନ ଖୋଲାଯିବା ଦ୍ୱାରା ଏଠାକାର ପବିତ୍ରତା ଓ ଧାର୍ମିକ ପରିବେଶ ନଷ୍ଟ ହେଉଛି। କେବଳ ମହାପ୍ରଭୁଙ୍କ ଜମିରେ ଥିବା ମଦ ଦୋକାନକୁ ସାମୟିକ ଭାବେ ବନ୍ଦ କରାଯିବା ଓ ଅନ୍ୟ ଦୋକାନ ପୂର୍ବ ଭଳି ଖୋଲା ରହିବା ପ୍ରସଙ୍ଗରୁ ସ୍ପଷ୍ଟ ହେଉଛି ଯେ, ସରକାର ଏହି ପ୍ରସଙ୍ଗକୁ ଗୁରୁତ୍ୱ ଦେଉନାହାନ୍ତି। ମଦ ଦୋକାନ ବନ୍ଦ ନେଇ ଲିଖିତ ନିର୍ଦ୍ଦେଶନାମା ଜାରି ହୋଇନାହିଁ କାହିଁକି। ଅବକାରୀ ବିଭାଗ ମଦ ବ୍ୟବସାୟୀଙ୍କୁ ଘଣ୍ଟ ଘୋଡ଼ାଇବାକୁ ଚେଷ୍ଟା କରୁଛି କି ବୋଲି ସେ ପ୍ରଶ୍ନ କରିଛନ୍ତି। କିଛି ଦିନ ପରେ ବିବାଦ ଥମିଯିବ ଓ ପୁଣି ମଦ ଦୋକାନ ଖୋଲିଯିବ ବୋଲି ସାଧାରଣରେ ଆଲୋଚନା ହେଉଛି। ସେହିପରି ସ୍ବର୍ଗଦ୍ୱାର ନିକଟରେ ମଦ ଦୋକାନକୁ ପୁରୀ ସହରର ପ୍ରମୁଖ ସଙ୍ଗଠନଗୁଡ଼ିକ ପକ୍ଷରୁ ବିରୋଧ କରାଯାଉଥିବାବେଳେ ଅବକାରୀ ବିଭାଗ ତ୍ୱରିତ ପଦକ୍ଷେପ ନେଉନାହିଁ। ରାଜସ୍ବ ବିଭାଗ ପକ୍ଷରୁ ମଦ ଦୋକାନ ଜମି ଯାଞ୍ଚ କରି ଅବକାରୀ ବିଭାଗକୁ ରିପୋର୍ଟ ଦିଆସରିଥିଲେ ମଧ୍ୟ କାହିଁକି କାର୍ଯ୍ୟାନୁଷ୍ଠାନ ନିଆଯାଉନାହିଁ ସେନେଇ ପ୍ରଶ୍ନ ଉଠୁଛି। ଅନ୍ୟପକ୍ଷରେ ଏଭଳି ଅଭିଯୋଗକୁ ଖଣ୍ଡନ କରି ଅବକାରୀ ସୁପରିଣ୍ଟେଣ୍ଡେଣ୍ଟ ଅମରେନ୍ଦ୍ର ଜେନା କହିଛନ୍ତି, ଶ୍ରୀମନ୍ଦିର ମାଲିକାନା ଜମିରେ ମଦ ଦୋକାନକୁ ନେଇ ଶ୍ରୀମନ୍ଦିର ପ୍ରଶାସନର ବିରୋଧ ପରେ ତୁରନ୍ତ ମଦ ଦୋକାନ ବନ୍ଦ କରିବା ପାଇଁ କୁହାଯାଇଛି। ଆଗାମୀ ଦିନରେ ସ୍ଥାନ ପରିବର୍ତ୍ତନ ହେବ। ଶ୍ରୀମନ୍ଦିର ଜମିକୁ ଛାଡ଼ି ସ୍ବର୍ଗଦ୍ୱାର ନିକଟ ଅନ୍ୟ ଜମିରେ ମଦ ଦୋକାନ ରହିଥିଲେ ମଧ୍ୟ ଏହାକୁ ବନ୍ଦ କରିବା ଦାୟିତ୍ୱ ଜିଲା ପ୍ରଶାସନ ଉପରେ ଛାଡ଼ିଦିଆଯାଇଛି।
