ନୂଆଦିଲ୍ଲୀ,୬।୪ : କଂଗ୍ରେସ ଜାତୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ନେତୃତ୍ୱରେ ୧୩ ବିରୋଧୀ ଦଳ ଗୁରୁବାର ଏକ ତ୍ରିରଙ୍ଗା ପଦଯାତ୍ରା କରିଥିଲେ। ଏହି ସମୟରେ ମଲ୍ଲିକାର୍ଜୁନ ଖବରଦାତାଙ୍କୁ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଗଣତନ୍ତ୍ର ବିଷୟରେ ଅନେକ କଥା କହୁଛନ୍ତି, କିନ୍ତୁ ଏହା ଅନୁଯାୟୀ ଚାଲିନାହାଁନ୍ତି।
୧୨ ମିନିଟରେ ୫୦ ଲକ୍ଷ କୋଟିର ବଜେଟ ପାରିତ ହୋଇଛି। ବିରୋଧୀ ଦଳ ଏନେଇ ଆଗ୍ରହୀ ନୁହଁନ୍ତି ବୋଲି ଶାସକ ଦଳ ପକ୍ଷରୁ କୁହାଯାଉଛି। ଯେତେବେଳେ ବିରୋଧୀ କହିବାକୁ ଉଠିଲେ, ସେମାନେ ଆମକୁ କହିବାକୁ ଅନୁମତି ଦେଲେ ନାହିଁ। ଜେପିସି ଗଠନ ପାଇଁ ଆମର ଦାବି ମଧ୍ୟ ପ୍ରତ୍ୟାଖ୍ୟାନ କରାଯାଇଛି। ଆମର ପ୍ରଶ୍ନ ହେଉଛି, ଆପଣ ଜେପିସି ଗଠନ କରିବାକୁ କାହିଁକି ଭୟ କରୁଛନ୍ତି?
ଏହି ପ୍ରସଙ୍ଗରୁ ଧ୍ୟାନ ହଟାଇବା ପାଇଁ ରାହୁଲ ଗାନ୍ଧୀଙ୍କ କ୍ଷମା ପ୍ରାର୍ଥନା’ ପ୍ରସଙ୍ଗ ଉଠା ଯାଇଥିଲା। ପ୍ରଧାନମନ୍ତ୍ରୀ ନିଜେ ସଂସଦରେ ରୁହନ୍ତି ନାହିଁ। ବିଦେଶରେ ରୁହନ୍ତି, ବାହାରେ ବୁଲି ନିର୍ବାଚନ ପ୍ରଚାର କରନ୍ତି, ଶିଳାନ୍ୟାସ କରନ୍ତି ଏବଂ ସବୁଥିରେ ଶ୍ରେୟ ନିଅନ୍ତି।
ରାହୁଲ ଗାନ୍ଧୀଙ୍କ ଅଯୋଗ୍ୟତା ସମ୍ପର୍କରେ ସେ କହିଛନ୍ତି, ଦୁଇ ବର୍ଷ ଜେଲ ଦଣ୍ଡାଦେଶ ପରେ ତାଙ୍କୁ କେତେ ଶୀଘ୍ର ଅଯୋଗ୍ୟ କରାଯାଇଛି। କିନ୍ତୁ ଗୁଜରାଟର ଏମ୍ପି ନାରାୟଣ ଭାଇଙ୍କୁ ତିନି ବର୍ଷ ଜେଲ ଦଣ୍ଡାଦେଶ ମିଳିଥିଲା, ତଥାପି ସେ ଅଯୋଗ୍ୟ ହୋଇ ନ ଥିଲେ। ତାଙ୍କୁ ୧୬ ଦିନ ସମୟ ଦିଆଯାଇଥିଲା। ଆମେ ନିୟମ ଅନୁଯାୟୀ ଲଢ଼ିବାକୁ ଶାସକ ଦଳ ଗଣତନ୍ତ୍ର ନୁହେଁ ବୋଲି କହୁଛନ୍ତି।
ସେ କହିଛନ୍ତି, ଆମେ ନ୍ୟାୟ ପାଇଁ ସଂଗ୍ରାମ କରୁଛୁ। ବିରୋଧୀ ଦଳର ସମସ୍ତ ନେତା ଏକାଠି ଏହି ପ୍ରସଙ୍ଗ ଏକଜୁଟ ହେବାରେ ଲାଗିଛନ୍ତି। ପ୍ରସଙ୍ଗ ହେଉଛି ଦେଶକୁ ବଞ୍ଚାଇବା।
ପ୍ରଧାନମନ୍ତ୍ରୀଙ୍କ ବଂଶବାଦ ମନ୍ତବ୍ୟ ନେଇ ଖାର୍ଗେ କହିଛନ୍ତି ୧୯୯୦ ମସିହାରୁ ଗାନ୍ଧୀ ପରିବାରର କୌଣସି ସଦସ୍ୟ ପ୍ରଧାନମନ୍ତ୍ରୀ କିମ୍ବା ମନ୍ତ୍ରୀ ହୋଇପାରିଛନ୍ତି କି? ସେମାନେ ଦେଶ ପାଇଁ ଲଢୁଥିବା ଲୋକଙ୍କ ବିରୋଧରେ ଇଡ଼ି ସିବିଆଇ ଚଢ଼ାଉ କରାନ୍ତି। ମାତ୍ର ଗାନ୍ଧୀ ପରିବାର ଦେଶକୁ ଏକଜୁଟ କରିବା ପାଇଁ କାର୍ଯ୍ୟ କରନ୍ତି। ଭାଜପା ଦେଶକୁ ବିଭାଜନ କରିବାରେ ଲାଗିଛି ବୋଲି ସେ ଅଭିଯୋଗ କରିଛନ୍ତି।
