କରାଚୀ,୨୯।୧: ଭାଗ୍ୟ ଲେଖନକୁ କେହି ବଦଳାଇ ପାରିବେ ନାହିଁ। ଏହାର ଏକ ଜ୍ୱଳନ୍ତ ଉଦାହରଣ ଭାବେ ସାମ୍ନାକୁ ଆସିଛନ୍ତି ପାକିସ୍ତାନର ଫଓ୍ବାଦ ଆଲାମ। ୨୦୦୯ରେ ପଦାର୍ପଣ କରିଥିଲେ ଆଲାମ। ବିଦେଶରେ ପ୍ରଥମ ଟେଷ୍ଟରେ ହିଁ ଶତକ ହାସଲ କରି ଆସିଥିଲେ ଚର୍ଚ୍ଚାକୁ। କିନ୍ତୁ ଇଂଲଣ୍ଡ ବିପକ୍ଷ ପ୍ରଥମ ଦୁଇଟି ଟେଷ୍ଟରେ ଖରାପ ପ୍ରଦର୍ଶନ ଯୋଗୁ ଜାତୀୟ ଦଳରୁ ବାଦ୍ ପଡ଼ିଥିଲେ।
୨୦୦୯ରୁ ୨୦୨୧ ମଧ୍ୟରେ ୭ ଜଣ ମୁଖ୍ୟ ଚୟନକର୍ତ୍ତା ଦେଖିଥିଲା ପାକିସ୍ତାନ କ୍ରିକେଟ ବୋର୍ଡ(ପିସିବି)। ଏମାନଙ୍କ ମଧ୍ୟରେ ଗୋଟିଏ କଥା ସମାନ ଥିଲା। କୌଣସି ଚୟନକର୍ତ୍ତା ଘରୋଇ କ୍ରିକେଟରେ କ୍ରମାଗତ ପ୍ରଦର୍ଶନ କରୁଥିବା ଫଓ୍ବାଦଙ୍କୁ ଜାତୀୟ ଦଳ ପାଇଁ ଯୋଗ୍ୟ ମଣି ନ ଥିଲେ। ଗତ ୧୧ ବର୍ଷ ମଧ୍ୟରେ ଫଓ୍ବାଦ ପ୍ରଥମ ଶ୍ରେଣୀ କ୍ରିକେଟରେ ୨୬ ଶତକ ଓ ୩୩ ଅର୍ଦ୍ଧଶତକ ସହ ୫୬.୪୮ ହାରରେ କରିଥିଲେ ୭,୯୬୫ ରନ୍। ଏହି ସମୟରେ ପାକିସ୍ତାନ ଖେଳିଥିବା ୮୮ ଟେଷ୍ଟରେ ୪୦ ନୂଆ ଖେଳାଳିଙ୍କୁ ମିଳିଥିଲା ପଦାର୍ପଣର ସୁଯୋଗ। ମାତ୍ର କେହି ଫଓ୍ବାଦଙ୍କ ଉପରେ ନଜର ପକାଇ ନ ଥିଲେ। ଦଳର ମଧ୍ୟକ୍ରମରେ ମିଶ୍ବା ଉଲ ହକ୍, ୟୁନିସ ଖାନ, ଆଝାର ଅଲି ଓ ଅସଦ ଶାଫିକ ଥିବାରୁ ଘରୋଇ କ୍ରିକେଟରେ ଭଲ ପ୍ରଦର୍ଶନ ସତ୍ତ୍ୱେ ଫଓ୍ବାଦଙ୍କୁ ସ୍ଥାନ ମିଳି ନ ଥିଲା।
ଦୀର୍ଘ ୧୧ ବର୍ଷ ପରେ ବଦଳିଲା ଭାଗ୍ୟ। ଯେଉଁ ବୟସରେ ପ୍ରାୟ ଖେଳାଳି ସନ୍ନ୍ୟାସ ନିଅନ୍ତି, ସେହି ବୟସରେ ଫଓ୍ବାଦ(୩୫)ଙ୍କୁ ମିଳିଲା ପାକିସ୍ତାନ ଟେଷ୍ଟ ଦଳରେ ସୁଯୋଗ। ଆଉ ପ୍ରତ୍ୟାବର୍ତ୍ତନ ମ୍ୟାଚ୍ରେ ହିଁ ଖେଳିଲେ ଶତକୀୟ ଇନିଂସ। ତାହା ପୁଣି ଶକ୍ତିଶାଳୀ ଦକ୍ଷିଣ ଆଫ୍ରିକା ବିପକ୍ଷରେ। ଘରୋଇ ଦଳ ୨୭ ରନ୍ରେ ୪ ଉଇକେଟ ହରାଇ ସଙ୍କଟରେ ପଡ଼ିଥିବାବେଳେ ସେ ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରି ୧୦୯ ରନ୍ ସ୍କୋର କରିଥିଲେ। ଦଳ ପ୍ରଥମ ଇନିଂସରେ ଅଗ୍ରଣୀ ହେବା ସହ ସହଜରେ ମ୍ୟାଚ୍ ଜିତିଥିଲା। ବିଜୟୀ ଦଳ ପାଇଁ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିବା ଫଓ୍ବାଦଙ୍କୁ ମିଳିଲା ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର।
”ମୁଁ କଦାପି କାହାକୁ ଦୋଷ ଦେଇ ନାହିଁ। ମୋ ଭାଗ୍ୟ ଲେଖନ, କେହି ବଦଳାଇ ପାରିବେ ନାହିଁ। ମୋତେ ମିଳୁଥିବା ସୁଯୋଗ ଉପରେ ହିଁ ଧ୍ୟାନ ଦେଉଥିଲି। ଜାତୀୟ ଦଳରେ ସୁଯୋଗ ମିଳିବାରେ ବିଳମ୍ବ ହୋଇଛି, ହେଲେ ମିଳିଛି। ମୋର ୧୦ ବର୍ଷ ବେକାର ଯାଇନାହିଁ। ମୋତେ ଏପର୍ଯ୍ୟନ୍ତ ଯାହା ମିଳିଛି, ହୁଏତ ତା’ଠୁ ଅଧିକ ସଫଳ ହୋଇପାରିଥାନ୍ତି। କିନ୍ତୁ ମିଳିଥିବା ସଫଳତାକୁ ପାଇ ମୁଁ ଖୁସି“ ବୋଲି ସେ କହିଛନ୍ତି।
