ମୁମ୍ବାଇ,୨୩।୪ : ଭାରତୀୟ ଜନତା ପାର୍ଟି ନେତା ତଥା ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଏନସିପି ନେତା ଅଜିତ ପାୱାରଙ୍କ ମନ୍ତବ୍ୟ ନେଇ ନିଜର ଉତ୍ତର ରଖିଛନ୍ତି। ଅଜିତ କହିଥିଲେ ସେ ରାଜ୍ୟର ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିବାକୁ ପ୍ରସ୍ତୁତ ଅଛନ୍ତି। ଏହାର ଊତ୍ତରରେ ଫଡନାଭିସ କହିଛନ୍ତି କାହାକୁ ମଧ୍ୟ ମୁଖ୍ୟମନ୍ତ୍ରୀ କରିବାରେ କିଛି ଭୁଲ ନାହିଁ। କିନ୍ତୁ ଯେ କେହି ମୁଖ୍ୟମନ୍ତ୍ରୀ ହୋଇପାରିବେ ନାହିଁ ।
ଅଜିତ ପାୱାରଙ୍କ ଉପରେ କଡ଼ା ମନ୍ତବ୍ୟ ଦେଇଥିବା ଶିବସେନା (ୟୁବିଟି) ସାଂସଦ ସଞ୍ଜୟ ରାଉତ ତାଙ୍କୁ ସମର୍ଥନ କରି କହିଛନ୍ତି ଏନସିପି ନେତାଙ୍କ ମୁଖ୍ୟମନ୍ତ୍ରୀ ହେବାର କ୍ଷମତା ରହିଛି। ତେବେ ଅଜିତ ପାୱାରଙ୍କ ବକ୍ତବ୍ୟରେ କଂଗ୍ରେସ ଦଳ କହିଛି, ଉଦ୍ଧବ ଠାକରେଙ୍କ ସହ କାମ କରିବା ଅଧିକ ସୁବିଧାଜନକ ଥିବାବେଳେ ପୃଥ୍ବୀରାଜ ଚୌହ୍ବାନଙ୍କ ସହ କାମ କରିବାର କୌଣସି ବିକଳ୍ପ ନ ଥିଲା। ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲ କହିଛନ୍ତି, ଯଦି ଅଜିତ ପୃଥ୍ବୀରାଜ ସରକାରଙ୍କ ଉପରେ ଅସନ୍ତୁଷ୍ଟ ଥିଲେ ତେବେ ସେ ସେତେବେଳେ କ୍ୟାବିନେଟ ଛାଡିଦେବାର ଜରୁରୀ ଥିଲା।
ଫଡନାଭିସ କହିଛନ୍ତି , ସେ ଅଜିତଙ୍କ ବିବୃତ୍ତି ଦେଖି ନାହାଁନ୍ତି। ଜଣେ ନେତାଙ୍କ ମୁଖ୍ୟମନ୍ତ୍ରୀ ହେବାକୁ ଇଚ୍ଛାରେ କିଛି ଭୁଲ ନାହିଁ । ଅନେକ ଲୋକ ମୁଖ୍ୟମନ୍ତ୍ରୀ ହେବାକୁ ଇଚ୍ଛା କରନ୍ତି। କିନ୍ତୁ ସମସ୍ତେ ମୁଖ୍ୟମନ୍ତ୍ରୀ ହୋଇପାରିବେ ନାହିଁ। ଆମେ କେବଳ ଏନେଇ ଅଜିତଙ୍କୁ ଶୁଭେଚ୍ଛା ଜଣାଇ ପାରିବା। ମହା ବିକାଶ ଆଘାଡିରେ କଣ ଚାଲିଛି ମୁଁ ଜାଣେ ନାହିଁ। ଉଲ୍ଲେଖନୀୟ କଥା ହେଉଛି, ଅଜିତ ଏକ କାର୍ଯ୍ୟକ୍ରମରେ କହିଥିଲେ ୨୦୨୪ରେ ରାଜ୍ୟ ନିର୍ବାଚନରେ ମୁଖ୍ୟମନ୍ତ୍ରୀ ହେବାକୁ ଅପେକ୍ଷା କରିବାକୁ ସେ ଚାହୁଁ ନାହାନ୍ତି। ୨୦୨୪ କାହିଁକି, ବର୍ତ୍ତମାନ ଏନସିପି ଏହି ପଦବୀ ପାଇଁ ପ୍ରସ୍ତୁତ ଅଛି। ୨୦୦୪ ରେ ଜନସାଧାରଣଙ୍କ ଦ୍ୱାରା ଏହି ଆସନ ଜିତିଥିଲା, ସେହି ଦୃଷ୍ଟିରୁ, ଏନସିପି ମୁଖ୍ୟମନ୍ତ୍ରୀ ପଦ ପାଇବା ଉଚିତ। କିନ୍ତୁ ରାଜନୀତିରେ ଅନେକ ନିଷ୍ପତ୍ତି ଶୀର୍ଷ ନେତୃତ୍ୱ ନେଇଛନ୍ତି। ଦଳରେ ଶୃଙ୍ଖଳା ବଜାୟ ରହିଛି, ତେଣୁ ନେତୃତ୍ୱ କ’ଣ କହୁଛନ୍ତି ତାହା ଆମେ ଶୁଣିଥାଉ।
ଅଜିତ ପାୱାରଙ୍କ ବିବୃତ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ, କାରଣ ଭାଜପା ସହିତ ତାଙ୍କର ଘନିଷ୍ଠତା ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି। ତେବେ ସଞ୍ଜୟ ରାଉତ କହିଛନ୍ତି, ଅଜିତଙ୍କ ନାମରେ ସର୍ବାଧିକ ଥର ଉପମୁଖ୍ୟମନ୍ତ୍ରୀ ହେବାର ରେକର୍ଡ ରହିଛି। ଏଭଳି ପରିସ୍ଥିତିରେ କିଏ ଅଛନ୍ତି, ଯେ କି ମୁଖ୍ୟମନ୍ତ୍ରୀ ହେବାକୁ ଆଶା ରଖିବେନି। ଅଜିତ ବହୁ ବର୍ଷ ଧରି ରାଜନୀତିରେ ଅଛନ୍ତି । ସେଥିପାଇଁ ସମସ୍ତେ ଭାବନ୍ତି ସେ ମୁଖ୍ୟମନ୍ତ୍ରୀ ହେବା ଉଚିତ। ମୁଁ ତାଙ୍କୁୁ ଶୁଭେଚ୍ଛା ଜଣାଉଛି।
