ଆରଡ଼ି,୧୬।୫(ଡି.ଏନ.ଏ.): ସରକାରଙ୍କ ମୋ କୁଡ଼ିଆ, ବିଜୁ ପକ୍କାଘର, ଇନ୍ଦିରା ଆବାସ ଓ ପ୍ରଧାନମନ୍ତ୍ରୀ ଆବାସ ଯୋଜନା ଏଠି ପହଞ୍ଚିପାରି ନାହିଁ। ଘରଡିହ ୧ ଡିସିମିଲରୁ କମ୍ ହୋଇଥିଲେ ବି ବସୁନ୍ଧରା ଯୋଜନା ଫିକା ପଡ଼ିଛି। ସବୁଦିନ ପର ଘରେ ମୂଲ ଲାଗୁଥିଲେ ବି ଲେବର କାର୍ଡଟିଏ ନାହିଁ। ଘରେ ଘରେ ବିଜୁଳି ଜଳିବା ପାଇଁ ଥିବା ରାଜୀବ ଜ୍ୟୋତି ଯୋଜନା ବି ଡିବିରିକୁ ଲିଭାଇ ପାରୁନି। ସବୁ ନାହିଁ ନାହିଁ ଭିତରେ ଜୀବନ ବିତାଉଛନ୍ତି ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଓଳଗ ପଞ୍ଚାୟତ ସାନ ଓଳଗ ଗଁାର ଦମ୍ପତି ରୁଗା ଜେନା ଓ ତାଙ୍କ ସ୍ତ୍ରୀ କମଳା ଜେନା।
ବର୍ଷ ତଳେ ବାତ୍ୟାରେ ସେମାନଙ୍କ ଝାଟିମାଟି ଘର ଭାଙ୍ଗିଯାଇଥିଲା। ଘରଭଙ୍ଗା ସାହାଯ୍ୟ ତ ମିଳିଲା ନାହିଁ, ମୁଣ୍ଡ ଗୁଞ୍ଜିବାକୁ ପଲିଥିନ ଖଣ୍ଡେ ବି କେହି ଦେଲେନାହିଁ। ଭାଗ୍ୟକୁ ଆଦରି ନିଜ ମୂଲ ଲଗା ଟଙ୍କାରେ ପଲିଥିନ କିଣି କୁଡ଼ିଆ ଖଣ୍ଡେ ତିଆରି କରି ରହୁଛନ୍ତି ଏହି ଦମ୍ପତି। ବର୍ଷାଦିନେ ସନ୍ତସନ୍ତିଆ ଘରେ ସାପ ଭୟ, ଶୀତଦିନେ ଦୁଆରେ ଦିଆଯାଇଥିବା ବରଡ଼ାପତ୍ର ତାଟିକୁ ଭେଦ କରି ବହିଆସୁଥିବା ଶୀତ ଲହରୀ ଆଉ ଖରାଦିନେ ଅସହ୍ୟ ତାତି ସାଙ୍ଗକୁ ଗୁଳୁଗୁଳିରେ ମଧ୍ୟ ଏହି କୁଡ଼ିଆରେ ଏମାନଙ୍କ ଦିନ କଟିଥାଏ। ପଲିଥିନରେ ତିଆରି ହୋଇଥିବା ଉକ୍ତ ଘରେ ଛିଡ଼ା ହେଲେ ମୁଣ୍ଡ ବାଜିବ। ଘର ଭିତରକୁ ଆଣ୍ଠେଇ ଆଣ୍ଠେଇ ଯିବାକୁ ପଡ଼ିଥାଏ। ସରକାରୀ ଯୋଜନାରେ ଏହି ଦମ୍ପତିଙ୍କୁ ନା ଘର ଖଣ୍ଡେ ଯୋଗାଇ ଦିଆଯାଇଛି ନା ପାଇଖାନା। ମୌଳିକ ସୁବିଧାରୁ ବଞ୍ଚିତ ଏହି ପରିବାର ପ୍ରତି ସ୍ଥାନୀୟ ପଞ୍ଚାୟତ କର୍ତ୍ତୃପକ୍ଷଙ୍କଠାରୁ ଆରମ୍ଭ କରି ବ୍ଲକ ପ୍ରଶାସନର ନଜର ପଡୁନି। ସରକାରଙ୍କ ପକ୍ଷରୁ ଏହି ଦମ୍ପତିଙ୍କୁ ତୁରନ୍ତ ଆବାସ ଯୋଗାଇ ଦେବାକୁ ବିଭିନ୍ନ ସାମାଜିକ ସଙ୍ଗଠନ ଦାବି କରିଛନ୍ତି। ଦୁଇମାସ ଭିତରେ ମୌଳିକ ଆବଶ୍ୟକତା ଯୋଗାଇ ଦିଆ ନ ଗଲେ ଏହି ପରିବାର ମାନବିକ ଅଧିକାର କମିଶନରଙ୍କ ଦ୍ୱାରସ୍ଥ ହେବେ ବୋଲି ସଙ୍ଗଠନର କର୍ମକର୍ତ୍ତା ଚେତାବନୀ ଦେଇଛନ୍ତି। ଏ ସମ୍ପର୍କରେ ସ୍ଥାନୀୟ ସରପଞ୍ଚ ପ୍ରଫୁଲ୍ଲ ବେହେରା କହିଛନ୍ତି, ତାଲିକାରେ ଏହି ଦମ୍ପତିଙ୍କ ନଁାରେ ଥିଲେ ଯଥାଶୀଘ୍ର ଆବାସ ଯୋଗାଇ ଦିଆଯିବାର ବ୍ୟବସ୍ଥା କରାଯିବ। ଚାନ୍ଦବାଲି ବିଡିଓ ଜ୍ୟୋତି ବିକାଶ ଦାଶଙ୍କୁ ପଚାରିବାରୁ ଅନୁଧ୍ୟାନ କରି ଏ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି।
