ଯୋଡ଼ା/ଚମ୍ପୁଆ,୨୮ା୯(ଡି.ଏନ୍.ଏ): କେନ୍ଦୁଝର ଜିଲା ଚମ୍ପୁଆ ତହସିଲ ଅନ୍ତର୍ଗତ କଇନ୍ତା ଗ୍ରାମରେ ଥିବା ଆଦିବାସୀଙ୍କ ଜମିକୁ କାନପୁର ବୃହତ୍ ଜଳସେଚନ ପ୍ରକଳ୍ପ ପାଇଁ ଅଧିଗ୍ରହଣ ପରେ ବି ଆର୍ଥିକ କ୍ଷତିପୂରଣ ମିଳି ନ ଥିବା ଅଭିଯୋଗ ହୋଇଛି। ଦୀର୍ଘ ୧୦ ବର୍ଷ ହେଲା ଅଭିଯୋଗ କରିଆସୁଥିଲେ ବି କେହି କର୍ଣ୍ଣପାତ କରୁନଥିବା ବିସ୍ଥାପିତମାନେ କହିଛନ୍ତି।
କାନପୁର ପ୍ରକଳ୍ପ ଦ୍ବାରା ପୂର୍ବରୁ ବିସ୍ଥାପିତ ହୋଇଥିବା ରେଭେନ୍ସାପୁର (କ) ଗ୍ରାମର ଜଗନ୍ନାଥ ତିରିଆ, ନାରାୟଣ ତିରିଆ ଓ ଅମିତ୍ ତିରିଆଙ୍କ କଇନ୍ତା ଗ୍ରାମରେ ଥିବା ଖାତା ନଂ. ୧୬୧/୩୭ ଓ ପ୍ଲଟ ନଂ. ୬୦/୨୨୪୫ରେ ପ୍ରାୟ ୪୦ ଡିସିମିଲ ଜମି ରହିଥିଲା। ଏହାକୁ କାନପୁର ପ୍ରକଳ୍ପ ପକ୍ଷରୁ ଦୀର୍ଘ ୧୦ ବର୍ଷ ହେଲା ଜମି ଅଧିଗ୍ରହଣ କରାଯାଇ ସେଠାରେ ଶାଖା କେନାଲ ନିର୍ମାଣ କାର୍ଯ୍ୟ କରାଯାଉଛି। ମାତ୍ର ପର୍ଯ୍ୟନ୍ତ ସେମାନଙ୍କୁ କ୍ଷତିପୂରଣ ରାଶି ପ୍ରଦାନ କରାଯାଇ ନାହିଁ। ଏ ନେଇ ଜମି ମାଲିକମାନେ ଗତ ୪ ମେ ୨୦୧୬ ରେ ଲିଖିତ ଭାବେ ପ୍ରକଳ୍ପର ସ୍ବତନ୍ତ୍ର ଭୂ ଅର୍ଜନ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ମାତ୍ର ଦୀର୍ଘ ବର୍ଷ ବିତି ଯାଇଥିଲେ ମଧ୍ୟ ପ୍ରକଳ୍ପ କର୍ତ୍ତୃପକ୍ଷଙ୍କ ପକ୍ଷରୁ କ୍ଷତିପୂରଣ ଦିଆଯାଇ ନାହିଁ। ଜମିହରାମାନେ ଆହୁରି ମଧ୍ୟ ଅଭିଯୋଗରେ ଦର୍ଶାଇଛନ୍ତି ଯେ, ଓଡ଼ିଶା ସରକାରଙ୍କ ପୁନର୍ବାସ ଓ ପୁନଃ ଥଇଥାନ ନୀତି ୨୦୦୬ ଅନୁଯାୟୀ, ଯେଉଁ ପରିବାର ଏକାଧିକବାର ବିସ୍ଥାପିତ ହେଉଥିବେ, ତାଙ୍କୁ ସ୍ବାଭାବିକ ଭାବେ ପ୍ରାପ୍ୟ କ୍ଷତିପୂରଣ ବ୍ୟତୀତ ଉକ୍ତ ରାଶିର ଶତକଡ଼ା ୫୦ ପ୍ରତିଶତ ଅତିରିକ୍ତ କ୍ଷତିପୂରଣ ପ୍ରଦାନ କରାଯିବାର ବ୍ୟବସ୍ଥା ରହିଛି। ହେଲେ ଏଠାରେ ଏହାର ବ୍ୟତିକ୍ରମ ଘଟିଛି। କାରଣ ପୂର୍ବରୁ ବିସ୍ଥାପିତ ହୋଇ ପୁନର୍ବାର ଜମି ହରାଇଥିଲେ ହେଁ ସେମାନଙ୍କୁ ଆର୍ଥିକ କ୍ଷତିପୂରଣ ମିଳି ପାରି ନ ଥିବା ଜମି ମାଲିକ ଜଗନ୍ନାଥ ତିରିଆ ଅଭିଯୋଗ କରି କହିଛନ୍ତି। ଆଦିବାସୀ ଜମି ଅଧିଗ୍ରହଣ ପରେ ବି ପ୍ରକଳ୍ପ କର୍ତ୍ତୃପକ୍ଷ କାହିଁକି ଚୁପ୍ ରହିଛନ୍ତି। ସେମାନଙ୍କୁ କାହିଁକି କ୍ଷତିପୂରଣ ପ୍ରଦାନରେ ବିଳମ୍ବ କରାଯାଉଛି। ଏଥିପ୍ରତି ସରକାର ଦୃଷ୍ଟି ଦେବା ପାଇଁ ସେ ଗଣମାଧ୍ୟମ ଆଗରେ ଅଭିଯୋଗ କରିଛନ୍ତି।
