ନୂଆଦିଲ୍ଲୀ,୮।୭: ରାଷ୍ଟ୍ରୀୟ ଯାଞ୍ଚ ଏଜେନ୍ସି (ଏନଆଇଏ)ବିଦେଶରେ ବିସିଥିବା ଖଲିସ୍ତାନୀ ସମର୍ଥକ ଆତଙ୍କବାଦୀଙ୍କ ବିରୋଧରେ ବଡ କାର୍ଯ୍ୟାନୁଷ୍ଠାନ କରିବାକୁ ଯାଉଛି।ଏନଆଇଏ ପ୍ରାୟ ୨୧ ଜଣ ଆତଙ୍କବାଦୀଙ୍କ ନାମ ମୋଷ୍ଟ ଓ୍ବାଣ୍ଟେଡ ଲିଷ୍ଟରେ ସାମିଲ କରିଛି। ଏଥିରେ କନାଡା, ଆମେରିକା ଓ ପାକିସ୍ତାନରେ ଥିବା ଆତଙ୍କବାଦୀଙ୍କ ନାମ ସାମିଲ ରହିଛି।
ଏନଆଇଏ ଓ୍ବେବସାଇଟରେ ଏହି ଖଲିସ୍ତାନୀଙ୍କ ନାମ ସହ ଫଟୋ ଦିଆଯାଇଛି। ଲିଷ୍ଟରେ ଲଖବୀର ସିଂ ଲଣ୍ଡା, ମନଦୀପ ସିଂ, ସତନାମ ସିଂ, ଅମରିକ ସିଂଙ୍କ ଭଳି ଖଲିସ୍ତାନ ସମର୍ଥକ ଓ ଆତଙ୍କବାଦୀଙ୍କ ତଥ୍ୟ ରହିଛି। ସୁରକ୍ଷା ଏଜେନ୍ସିର ଲିଷ୍ଟରେ ସବୁଠାରୁ ଉପରେ ଶିଖ ଫର ଜଷ୍ଟିଶର ପଳାତକ ଗୁରୁପତଓ୍ବନ୍ତ ସିଂହ ପନ୍ନୁ ରହିଛନ୍ତି।
ଏନଆଇଏରୁ ମିଳିଥିବା ସୂଚନା ଅନୁଯାୟୀ ବିଦେଶରେ ବସିଥିବା ଖାଲିସ୍ତାନୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଜୁଲାଇ ୧୭ ପରେ ଖୁବ ଶୀଘ୍ର, ଏନଆଇଏର ଏକ ୫ ଜଣିଆ ଟିମ ଆମେରିକାର ସାନଫ୍ରାନ୍ସିସ୍କୋକୁ ଯିବେ, ଯେଉଁଠାରେ କନସୁଲେଟରେ ହୋଇଥିବା ଆକ୍ରମଣର ଯାଞ୍ଚ କରାଯିବ। ଖାଲିସ୍ତାନ ସମର୍ଥକମାନେ ଏହି ଆକ୍ରମଣ କରିଥିଲେ।
ଗୁଇନ୍ଦା ସୂତ୍ରର ସୂଚନା ଅନୁଯାୟୀ, ଏନଆଇଏ ଇଣ୍ଟେଲିଜେନ୍ସ ବ୍ୟୁରୋ ଏବଂ ରାଜ୍ୟ ପୋଲିସ ସହିତ ସୁରକ୍ଷା ଏଜେନ୍ସି ଏକ ଡୋଜିୟର ପ୍ରସ୍ତୁତ କରିଛନ୍ତି। ଏଥିରେ ବ୍ରିଟେନ, ଆମେରିକା ଏବଂ କାନାଡାର ଦୂତାବାସ ଉପରେ ହୋଇଥିବା ଆକ୍ରମଣ ସଂପର୍କରେ ଏନଆଇଏ ଖାଲିସ୍ତାନ ସମର୍ଥକ ଆତଙ୍କବାଦୀଙ୍କ ସମ୍ପୂର୍ଣ୍ଣ ତାଲିକା ପ୍ରସ୍ତୁତ କରିଛି।
