ଅକ୍ଲାଣ୍ଡ, ୩୦ା୯ (ପି.ଟି.)-କୋଭିଡ୍ ଯୋଗୁ ୬ମାସରୁ ଅଧିକ ଦିନ ପରେ ନ୍ୟୁଜିଲାଣ୍ଡରେ ଅନ୍ତର୍ଜାତୀୟ କ୍ରିକେଟ ଆରମ୍ଭ ହେବ। ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ସି) ତରଫରୁ ଏଥିପାଇଁ ମଙ୍ଗଳବାର ବ୍ୟସ୍ତବହୁଳ କାର୍ଯ୍ୟସୂଚୀ ଘୋଷଣା କରାଯାଇଛି। ନଭେମ୍ବରରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଏକ ଟି୨୦ ସିରିଜ ସହ ଏହା ଆରମ୍ଭ ହେବ। ନଭେମ୍ବରରେ ଓ୍ବେଷ୍ଟଇଣ୍ଡିଜ ଓ ପାକିସ୍ତାନ ପରେ ଫେବୃୟାରୀରେ ଅଷ୍ଟ୍ରେଲିଆ ଏବଂ ମାର୍ଚ୍ଚରେ ବାଂଲାଦେଶ ଟୁର୍ରେ ଆସିବା କାର୍ଯ୍ୟକ୍ରମ ରହିଛି। ସରକାର କିନ୍ତୁ ପ୍ରଥମ ଦୁଇଟି ଟିମ୍ର ଗସ୍ତକ୍ରମକୁ ଅନୁମୋଦନ ଦେଇ ସାରିଥିବା ଏନ୍ଜେଡ୍ସି ମୁଖ୍ୟ କାର୍ଯ୍ୟନିର୍ବାହୀ ଡେଭିଡ୍ ହ୍ବାଇଟ୍ କହିଛନ୍ତି। ଅନ୍ୟ ଦୁଇଟି ଟୁର୍ ପାଇଁ ସରକାର ଖୁବ୍ଶୀଘ୍ର ସବୁଜ ସଙ୍କେତ ଦେବେ ବୋଲି ସେ କହିଛନ୍ତି। ନଭେମ୍ବର ୨୭ରେ ଇଡେନ୍ପାର୍କଠାରେ ଓ୍ବେଷ୍ଟଇଣ୍ଡିଜ ବିପକ୍ଷ ୩ ମ୍ୟାଚବିଶିଷ୍ଟ ସିରିଜ ଆରମ୍ଭ ହେବ। ସିରିଜ ଓପନର ପରେ ଅନ୍ୟ ଦୁଇଟି ମ୍ୟାଚ ନଭେମ୍ବର ୨୯ ଓ ନଭେମ୍ବର ୩୦ରେ ବେ’ ଓଭାଲଠାରେ ଖେଳାଯିବ। ଟି୨୦ ସିରିଜ ପରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଦୁଇଟି ଟେଷ୍ଟ ମ୍ୟାଚ ଆୟୋଜନ କରିବ ନ୍ୟୁଜିଲାଣ୍ଡ। ପ୍ରଥମ ଟେଷ୍ଟ ଡିସେମ୍ବର ୩ରୁ ହାମିଲଟନର ସେଡନ ପାର୍କ ଏବଂ ଦ୍ୱିତୀୟଟି ଓ୍ବେଲିଂଟନ୍ର ରିଜର୍ଭ ବେସିନଠାରେ ଡିସେମ୍ବର୧୧ରୁ ଖେଳାଯିବ। ଓ୍ବେଷ୍ଟଇଣ୍ଡିଜ ସିରିଜ ପରେ ନ୍ୟୁଜିଲାଣ୍ଡ ଡିସେମ୍ବର ୧୮ରୁ ପାକିସ୍ତାନ ବିପକ୍ଷରେ ୩ ମ୍ୟାଚବିଶିଷ୍ଟ ଟି୨୦ ସିରିଜ ଖେଳିବ। ପରେ ତୌରଙ୍ଗାଠାରେ ଡିସେମ୍ବର ୨୬ରୁ ଏକ ଟେଷ୍ଟ ସିରିଜ ଖେଳିବ। ସେହିପରି ଅଷ୍ଟ୍ରେଲିଆ ବିପକ୍ଷରେ ୫ ମ୍ୟାଚବିଶଷ୍ଟ ଏକ ଟି୨୦ ସିରିଜ ଫେବୃୟାରୀ ୨୨ରୁ ମାର୍ଚ୍ଚ ୭ ପର୍ଯ୍ୟନ୍ତ ଖେଳାଯିବା କାର୍ଯ୍ୟକ୍ରମ ରହିଛି।
