ମାଉଣ୍ଟ ମଙ୍ଗାନୁଇ, ୨୭ା୧୨ (ଏପି)-ସ୍ଥାନୀୟ ବେ’ ଓଭାଲଠାରେ ଘରୋଇ ନ୍ୟୁଜିଲାଣ୍ଡ ଏବଂ ପାକିସ୍ତାନ ମଧ୍ୟରେ ପ୍ରଥମ କ୍ରିକେଟ ଟେଷ୍ଟ ଶନିବାରଠାରୁ ଆରମ୍ଭ ହୋଇଛି। ଏଥିରେ ଟସ୍ରେ ହାରି ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ନ୍ୟୁଜିଲାଣ୍ଡ ପ୍ରଥମ ଦିନ ଖେଳ ଶେଷ ସୁଦ୍ଧା ୩ଉଇକେଟ ବିନିମୟରେ ୨୨୨ ରନ ସଂଗ୍ରହ କରି ନିଜ ସ୍ଥିତି ସୁଦୃଢ କରିଛି। ଅଧିନାୟକ କେନ୍ ଓ୍ବିଲିୟମସନ ୯୪ ଏବଂ ହେନ୍ରି ନିକୋଲ୍ସ ୪୨ ରନ କରି ଅପରାଜିତ ରହିଛନ୍ତି। ରସ୍ ଟେଲର ୭୦ ରନ କରି ଶାହିନ ଆଫ୍ରିଦୀଙ୍କ ବଲ୍ରେ ରିଜଓ୍ବାନଙ୍କ ଦ୍ୱାରା କ୍ୟାଚ୍ ଆଉଟ ହୋଇଯାଇଥିଲେ। ତେବେ ସେ ଆଉଟ ହେବା ପୂର୍ବରୁ ଓ୍ବିଲିୟମସନଙ୍କ ସହ ୧୨୦ ରନର ପାର୍ଟନରଶିପ୍ ହୋଇଥିଲା। ପୁନଶ୍ଚ ଓ୍ବିଲିୟମସନ ଓ ନିକୋଲ୍ସଙ୍କ ମଧ୍ୟରେ ଅପରାଜିତ ୮୯ରନର ପାର୍ଟରଶିପ୍ ହୋଇସାରିଛି। ପ୍ରଥମ ଦିବସରେ ଆଉଟ ହୋଇଥିବା ଅନ୍ୟ ଦୁଇ ବ୍ୟାଟ୍ସମ୍ୟାନ ଓପନର ଟମ୍ ଲଥାମ (୪) ଓ ଟମ୍ ବ୍ଲଣ୍ଡେଲ ମଧ୍ୟ ଶାହିନ ଆଫିଦୀଙ୍କ ବୋଲିଂର ଶିକାର ହୋଇଥିଲେ। ଏହି ଦୁଇ ବ୍ୟାଟ୍ସମ୍ୟାନ ଆଉଟ ହେବାବେଳେ ବୋର୍ଡରେ ଦଳର ସ୍କୋର ମାତ୍ର ୧୩ ରନ ରହିଥିଲା। ଆଫ୍ରିଦୀ ତାଙ୍କ ୨୦ ଓଭର ବୋଲିଂରେ ୫ ମେଡେନ ସହ ୫୫ ରନ ବିନିମୟରେ ୩ଟି ଯାକ ଉଇକେଟ ଅକ୍ତିଆର କରିଥିଲେ।
