ନୂଆଦିଲ୍ଲୀ,୨୪ା୧୧ : କେନ୍ଦ୍ରରେ କ୍ଷମତାସୀନ ଯେକୌଣସି ଦଳ ସବୁଦିନ କ୍ଷମତାରେ ରହିବାକୁ ଚାହେଁ। ଏଥିଲାଗି ବର୍ତ୍ତମାନ ବ୍ୟବସ୍ଥା ଅଧୀନରେ ଶାସକ ଦଳ ଜଣେ ‘ବୋଲକରା’ଙ୍କୁ ନିର୍ବାଚନ କମିଶନର (ଇସି) ରୂପେ ନିଯୁକ୍ତ କରିପାରେ। ଜଣେ ନିର୍ବାଚନ କମିଶନର ଏପରି ହେବା କଥା, ଯିଏକି ଦେଶର ପ୍ରଧାନମନ୍ତ୍ରୀଙ୍କୁ ପ୍ରଶ୍ନ କରିପାରୁଥିବେ। ଆବଶ୍ୟକ ସ୍ଥଳେ ସେ ପ୍ରଧାନମନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇପାରୁଥିବେ। ତେଣୁ ଏହି ସାମ୍ବିଧାନିକ ପଦରେ କାହାକୁ ନିଯୁକ୍ତ କରାଯିବ, ତାହା କେବଳ କେନ୍ଦ୍ର କ୍ୟାବିନେଟ ଦ୍ୱାରା ସ୍ଥିର କରା ନ ଯାଉ। କମିଶନଙ୍କ ସ୍ବାଧୀନତା ସୁନିଶ୍ଚିତ କରିବା ପାଇଁ ନିଯୁକ୍ତି ପ୍ରକ୍ରିୟା ବେଳେ ଭାରତର ପ୍ରଧାନ ବିଚାରପତି (ସିଜେଆଇ)ଙ୍କ ପରାମର୍ଶ ନିଆଯିବା ଉଚିତ ବୋଲି ବୁଧବାର ସାମ୍ବିଧାନିକ ପୀଠ ପ୍ରସ୍ତାବ ଦେଇଛନ୍ତି।
ମୁଖ୍ୟ ନିର୍ବାଚନ କମିଶନର (ସିଇସି) ଏବଂ ଇସିମାନଙ୍କ ନିଯୁକ୍ତି ପାଇଁ କଲେଜିୟମ୍ ଭଳି ବ୍ୟବସ୍ଥା ଆପଣାଯିବା ସକାଶେ ସୁପ୍ରିମକୋର୍ଟରେ ଏକାଧିକ ପିଟିଶନ ଦାଖଲ ହୋଇଛି। ଜଷ୍ଟିସ୍ କେ.ଏମ୍. ଜୋସେଫ୍ଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠରେ ବୁଧବାର ସେଗୁଡ଼ିକର ଶୁଣାଣି ବେଳେ ଶୀର୍ଷ ଅଦାଲତ ନିର୍ବାଚନ କମିଶନରଙ୍କ ସ୍ବାଧୀନତା ଓ ନିଯୁକ୍ତି ପ୍ରକ୍ରିୟାକୁ ନେଇ ପ୍ରଶ୍ନ ଉଠାଇଛନ୍ତି। ଏହି ପରିପ୍ରେକ୍ଷୀରେ ଗତ ନଭେମ୍ବର ୧୯ରେ ନିର୍ବାଚନ କମିଶନର ଭାବେ ଅବସ୍ଥାପିତ ଅରୁଣ ଗୋଏଲଙ୍କ ନିଯୁକ୍ତି ପ୍ରକ୍ରିୟା ସମ୍ପର୍କିତ ଫାଇଲ ଦାଖଲ କରିବା ପାଇଁ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି। ଗୋଏଲ ନିକଟରେ ନିଜ ଚାକିରିରୁ ସ୍ବେଚ୍ଛାକୃତ ଅବସର (ଭିଆର୍ଏସ୍) ନେଇଥିବାରୁ ତାଙ୍କୁ ତରବରିଆ ଭାବେ ନିଯୁକ୍ତି ଦିଆଯାଇଛି କି ବୋଲି ପୀଠ ଜାଣିବାକୁ ଚାହିଁଛନ୍ତି।
ଶୁଣାଣି ଚାଲିଥିବାବେଳେ ଗୋଏଲଙ୍କ ନିଯୁକ୍ତି ସମ୍ପର୍କିତ ଫାଇଲ ଦେଖାଯାଇପାରିବ ନାହିଁ ବୋଲି ଆଟର୍ନି ଜେନେରାଲ ଆର୍. ଭେଙ୍କଟରମଣି ବାଢ଼ିଥିବା ଯୁକ୍ତିକୁ ସାମ୍ବିଧାନିକ ପୀଠ ଖାରଜ କରିଦେଇଥିଲେ। ଜଷ୍ଟିସ୍ ଅଜୟ ରସ୍ତୋଗି, ଅନିରୁଦ୍ଧ ବୋଷ, ହୃଷୀକେଶ ରୟ ଏବଂ ସି.ଟି. ତ୍ୟାଗୀଙ୍କୁ ନେଇ ଗଠିତ ପୀଠରେ ଭେଙ୍କଟରମଣି କହିଥିଲେ, ସିଇସି ଏବଂ ଇସିମାନଙ୍କ ନିଯୁକ୍ତି ପ୍ରକ୍ରିୟାଗତ ବୃହତ୍ ପ୍ରସଙ୍ଗରେ ଶୁଣାଣି ଚାଲିଥିବାବେଳେ ଓକିଲ ପ୍ରଶାନ୍ତ ଭୂଷଣଙ୍କ ଦ୍ୱାରା ଦାଖଲ ଏକ ବ୍ୟକ୍ତିଗତ ମାମଲାର ଅନୁଧ୍ୟାନ କରାଯାଇପାରି ନାହିଁ। ଏହା ଉପରେ ଜଷ୍ଟିସ୍ ଜୋସେଫ୍ କହିଥିଲେ, ସାମ୍ବିଧାନିକ ପୀଠରେ ଶୁଣାଣି ବେଳେ ମଧ୍ୟ ଫାଇଲ ଦେଖାଯାଇପାରିବ। ଗୋଏଲଙ୍କୁ କେଉଁ ବ୍ୟବସ୍ଥା ଅନୁସାରେ ନିଯୁକ୍ତି ଦିଆଯାଇଛି ତାହା ଆମେ ଦେଖିବାକୁ ଚାହୁଁ। ଏହାକୁ ଆମେ ରେକର୍ଡରେ ରଖିବୁ। ଉକ୍ତ ପ୍ରସଙ୍ଗରେ ଆମ ଶୁଣାଣି ଜାରି ଥିବାବେଳେ ଗୋଏଲଙ୍କୁ ନିଯୁକ୍ତି ଦିଆଯାଇଥିବାରୁ ଏହି ମାମଲାକୁ ତା’ ସହ ଯୋଡ଼ାଯାଇପାରେ କହି ଗୁରୁବାର ସୁଦ୍ଧା ନିଯୁକ୍ତିର ସମସ୍ତ ଦସ୍ତାବିଜ ଦାଖଲ କରିବାକୁ ପୀଠ ନିର୍ଦ୍ଦେଶ ଦେଇଛନ୍ତି।
ଆବେଦନକାରୀ ଅନୁପ ବରନଓ୍ବାଲଙ୍କ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ ନିଜ ଆଡ଼ୁ ମଧ୍ୟ ଆପତ୍ତି ଉଠାଇଥିଲେ। ସେ କହିଥିଲେ, କେନ୍ଦ୍ର ସରକାର ଅତି ତରବରିଆ ଭାବେ ଜଣେ ନିର୍ବାଚନ କମିଶନରଙ୍କୁ ନିଯୁକ୍ତ କରିଛନ୍ତି। ସମ୍ପୃକ୍ତ ଇସି ଗୁରୁବାର ଯାଏ ସରକାରଙ୍କ ଜଣେ ସଚିବସ୍ତରୀୟ ଅଧିକାରୀ ରୂପେ କାର୍ଯ୍ୟ କରୁଥିଲେ। ଶୁକ୍ରବାର ସେ ହଠାତ୍ ଭିଆର୍ଏସ୍ ନେବା ପରେ ତାଙ୍କୁ ଏହି ନିଯୁକ୍ତି ପ୍ରଦାନ କରାଯାଇଛି। ଜଷ୍ଟିସ୍ ଜୋସେଫ୍ କହିଥିଲେ, ଭିଆର୍ଏସ୍ ନେବା ପାଇଁ ୩ ମାସ ଲାଗିଥାଏ। ପ୍ରକାଶ ଯେ, ୧୯୮୫ ବ୍ୟାଚ୍ ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀ ଗୋଏଲଙ୍କୁ ଗତ ୧୯ରେ ଇସି ନିଯୁକ୍ତ କରାଯାଇଛି। ସେ ଆସନ୍ତା ଡିସେମ୍ବର ୩୧ରେ ୬୦ ବର୍ଷରେ ପଦାର୍ପଣ ସହ ଭାରୀ ଶିଳ୍ପ ମନ୍ତ୍ରଣାଳୟ ସଚିବ ପଦରୁ ଅବସର ନେଇଥାଆନ୍ତେ। ସେ ବର୍ତ୍ତମାନର ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଏବଂ ଇସି ଅନୁପ ଚନ୍ଦ୍ର ପାଣ୍ଡେଙ୍କ ସହ କାର୍ଯ୍ୟ କରିବେ। ରାଜୀବ କୁମାର ୨୦୨୫ରେ ଅବସର ନେବା ପରେ ଗୋଏଲ ସିଇସି ହୋଇପାରନ୍ତି। ପୂର୍ବତନ ସିଇସି ସୁଶୀଲ ଚନ୍ଦ୍ର ଗତ ମେ’ରେ ଅବସର ନେବା ପରେ ଗୋଟିଏ ଇସି ପଦ ଖାଲିପଡ଼ିଥିଲା।
