ବ୍ରହ୍ମପୁର ଅଫିସ,୨ା୬: ଗଞ୍ଜାମ ଜିଲାରୁ ନବୀନ ପଟ୍ଟନାୟକ ରାଜନୀତି ଆରମ୍ଭ କରିବାର ୨୫ ବର୍ଷ ବିତିଛି। ଏହି ସମୟ ମଧ୍ୟରେ ସେ ୩ ଲୋକ ସଭା ଓ ୫ ବିଧାନସଭା ନିର୍ବାଚନ ଲଢ଼ିଛନ୍ତି। ସବୁ ନିର୍ବାଚନରେ ଅପରାଜିତ ହୋଇ ରାଜନୈତିକ କ୍ଷେତ୍ରରେ ରେକର୍ଡ ସୃଷ୍ଟି କରିଛନ୍ତି। ଅପରପକ୍ଷରେ ହିଞ୍ଜିଳି ବିଧାନସଭା କ୍ଷେତ୍ରରୁ ୨୦୦୦ରୁ ୨୦୧୯ ମଧ୍ୟରେ ହୋଇଥିବା ୫ ନିର୍ବାଚନରେ ଲଗାତର ଭାବେ ବିଜେଡି ପ୍ରାର୍ଥୀ ରୂପେ ନିର୍ବାଚିତ ହୋଇ ସେ ୫ଥର ମୁଖ୍ୟମନ୍ତ୍ରୀ ହୋଇଛନ୍ତି। ୫ମ ପାଳି ମୁଖ୍ୟମନ୍ତ୍ରିତ୍ୱକୁ ୩ ବର୍ଷ ପୂରିଛି। ଓଡ଼ିଶାରେ ନବୀନଙ୍କ ବିକଳ୍ପ ଏଯାବତ ସୃଷ୍ଟି ହୋଇ ନ ଥିବା ବେଳେ ଜାତୀୟ ରାଜନୀତିରେ ମଧ୍ୟ ଲୋକପ୍ରିୟ ମୁଖ୍ୟମନ୍ତ୍ରୀ ଭାବେ ଗୌରବ ଆଣିଛନ୍ତି। ଅନେକ ନୂଆ ପଦକ୍ଷେପ ନେଇ ସେ ଚର୍ଚ୍ଚାକୁ ଆସିଛନ୍ତି।
ସୂଚନାଯୋଗ୍ୟ, ୧୯୯୬ ଲୋକ ସଭା ନିର୍ବାଚନରେ ସ୍ବର୍ଗତ ବିଜୁ ପଟ୍ଟନାୟକ ଆସିକା କ୍ଷେତ୍ରରୁ ଜନତା ଦଳରୁ ନିର୍ବାଚିତ ହୋଇଥିଲେ। କଂଗ୍ରେସ ପ୍ରାର୍ଥୀ ପୂର୍ବତନ କେନ୍ଦ୍ରମନ୍ତ୍ରୀ ରାମଚନ୍ଦ୍ର ରଥଙ୍କୁ ପରାସ୍ତ କରିଥିଲେ। ୧୯୯୭ ଏପ୍ରିଲ ୧୭ରେ ତାଙ୍କର ପରଲୋକ ହୋଇଥିଲା। ତେଣୁ ସେଠାରେ ହୋଇଥିବା ଉପନିର୍ବାଚନରେ ପୁତ୍ର ନବୀନ ଜନତା ଦଳରୁ ପ୍ରତିଦ୍ୱନ୍ଦ୍ୱିତା କରି କଂଗ୍ରେସ ପ୍ରାର୍ଥୀ ରାମଚନ୍ଦ୍ର ରଥଙ୍କୁ ହରାଇଥିଲେ। ୧୯୯୮ରେ ହୋଇଥିବା ମଧ୍ୟବର୍ତ୍ତିକାଳୀନ ଲୋକ ସଭା ନିର୍ବାଚନରେ ନବୀନ ସେହି ଆସିକା ଆସନରୁ ବିଜେଡି ପ୍ରାର୍ଥୀ ହୋଇଥିଲେ। କଂଗ୍ରେସ ପ୍ରାର୍ଥୀ ଚନ୍ଦ୍ରଶେଖର ସାହୁଙ୍କୁ ବିପୁଳ ଭୋଟରେ ପରାସ୍ତ କରି ଏମ୍ପି ହେଲେ। ୧୯୯୯ ଲୋକ ସଭା ନିର୍ବାଚନରେ ନବୀନ ଆସିକାରୁ ତୃତୀୟ ଥର ନିର୍ବାଚିତ ହୋଇଥିଲେ। ନବୀନ କେନ୍ଦ୍ରରେ ମଧ୍ୟ ଦୁଇଥର କ୍ୟାବିନେଟ ମନ୍ତ୍ରୀ ପଦ ପାଇଥିଲେ। ବିଜୁବାବୁଙ୍କ ପୁଅ ଭାବେ ସେତେବେଳେ ସେ ଅଟଳ ବିହାରୀ ବାଜପେୟୀ ଓ ଲାଲକୃଷ୍ଣ ଆଡଭାନୀଙ୍କ ସମେତ ଅନ୍ୟ ଜାତୀୟ ନେତାମାନଙ୍କ ଆଦରଣୀୟ ହୋଇଥିଲେ। ତେଣୁ ଭାଜପା ସହ ବିଜେଡିର ଗଠବନ୍ଧନ କରାଯାଇଥିଲା। ରାଜ୍ୟରେ ମେଣ୍ଟ ରାଜନୀତି ଆରମ୍ଭ ହେଲା।
୨୦୦୦ ବିଧାନସଭା ନିର୍ବାଚନରେ ନବୀନ ହିଞ୍ଜିଳିକୁ ବାଛିଥିଲେ। ଜିତିବା ପରେ ମେଣ୍ଟ ସରକାରର ସେ ପ୍ରଥମେ ମୁଖ୍ୟମନ୍ତ୍ରୀ ହୋଇଥିଲେ। ସେଠାରୁ ଲଗାତର ଭାବେ ନିର୍ବାଚିତ ହୋଇ ୫ ଥର ମୁଖ୍ୟମନ୍ତ୍ରୀ ହୋଇଛନ୍ତି। ହିଞ୍ଜିଳି ଅଞ୍ଚଳରେ ବହୁମୁଖୀ ବିକାଶ କରାଇ ଚେହେରା ବଦଳାଇ ଦେଇଛନ୍ତି। ହିଞ୍ଜିଳି ସମେତ ସମଗ୍ର ଗଞ୍ଜାମ ଜିଲାବାସୀଙ୍କ ଗଭୀର ଆସ୍ଥାଭାଜନ ହୋଇଛନ୍ତି। ପଞ୍ଚାୟତଠାରୁ ସବୁ ନିର୍ବାଚନରେ ଏହି ଜିଲାରେ ବିଜେଡିର ବିଜୟବାନା ଉଡୁଛି। ବିରୋଧୀ ଦଳକୁ ସେ ପଛରେ ପକାଇ ଦେଇଥିବାରୁ ବିଜେଡି ମାଡ଼ି ଚାଲିଛି। ତେଣୁ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା କ୍ରମଶଃ ବଢ଼ି ଚାଲିଛି। ଆଗାମୀ ଦିନରେ ମଧ୍ୟ ଏହି ରାଜନୈତିକ ସ୍ଥିତି ଅପରିବର୍ତ୍ତିତ ରହିବ ବୋଲି ବିଭିନ୍ନ ମହଲରେ ଆଲୋଚନା ଚାଲିଛି।
