ବରଗଡ଼,୧୨।୩(ପ୍ରେମାନନ୍ଦ ଖମାରୀ)- ନୂଆଦିଲ୍ଲୀର ଉଦ୍ୟୋଗ ଭବନରେ ବୁଧବାର ଜାତୀୟ ବୁଣାକାର, ହସ୍ତଶିଳ୍ପୀ ସମ୍ମିଳନୀ ଅନୁଷ୍ଠିତ ହୋଇଯାଇଛି। ଦେଶର ହସ୍ତତନ୍ତ୍ର ଶିଳ୍ପର ସମସ୍ୟା, ଉନ୍ନତି ଓ ଭବିଷ୍ୟତ ଯୋଜନା ସମ୍ପର୍କରେ ମତ ବିନିମୟ କରିବା ପାଇଁ ଆୟୋଜିତ ଏହି ଉଚ୍ଚସ୍ତରୀୟ ସମ୍ମିଳନୀରେ ଭାରତର ବୟନ ଶିଳ୍ପ ମନ୍ତ୍ରୀ ଗିରିରାଜ ସିଂହ ଅଧ୍ୟକ୍ଷତା କରିଥିଲେ। ଦେଶର ବିଭିନ୍ନ ରାଜ୍ୟର ପ୍ରମୁଖ ବୁଣାକାର, ହସ୍ତଶିଳ୍ପୀ, ପଦ୍ମଶ୍ରୀ ପୁରସ୍କାରପ୍ରାପ୍ତ କଳାକାର, ସନ୍ଥ କବୀର ପୁରସ୍କାରପ୍ରାପ୍ତ ବୁଣାକାର, ଡିଜାଇନର ଓ ଉଦ୍ୟୋଗୀମାନଙ୍କୁ ଏହି ସମ୍ମିଳନୀରେ ଆମନ୍ତ୍ରଣ କରାଯାଇଥିଲା। ସେମାନଙ୍କର ଅନୁଭବ, ପରାମର୍ଶ ଓ ଭାବନା ଆଧାରରେ ଦେଶର ହସ୍ତତନ୍ତ୍ର ଶିଳ୍ପକୁ ଆହୁରି ସୁଦୃଢ଼ କରିବା ସହ ଏହି କ୍ଷେତ୍ରର ଉନ୍ନତି ପାଇଁ ଆଗାମୀ ଦିନର ଯୋଜନା ଓ ନୀତି ପ୍ରଣୟନ କରିବା ଏହି ସଭାର ମୁଖ୍ୟ ଉଦ୍ଦେଶ୍ୟ ଥିଲା। ଏହି ସମ୍ମିଳନୀରେ ଓଡ଼ିଶାରୁ ଏକମାତ୍ର ପ୍ରତିନିଧି ଭାବେ ବରଗଡ଼ ଜିଲାର ପ୍ରସିଦ୍ଧ ବୁଣକାର ତଥା ସନ୍ଥ କବୀର ପୁରସ୍କାରପ୍ରାପ୍ତ ରାମକୃଷ୍ଣ ମେହେର ଯୋଗଦେବା ସୁଯୋଗ ପାଇଥିଲେ।
ଭୁବନେଶ୍ୱରସ୍ଥିତ ବୁଣାକାର ସେବା କେନ୍ଦ୍ର ପକ୍ଷରୁ ତାଙ୍କୁ ଏହି ଆଲୋଚନା ସଭାରେ ଯୋଗଦାନ ପାଇଁ ଆମନ୍ତ୍ରଣ କରାଯାଇଥିଲା। ହସ୍ତତନ୍ତ ଶିଳ୍ପ କ୍ଷେତ୍ରରେ ତାଙ୍କର ଦୀର୍ଘ ଦିନର ଅନୁଭୂତି, ସମ୍ବଲପୁରୀ ଶାଢ଼ୀର ପ୍ରଚାର, ପ୍ରସାର ଓ ବୁଣକାର ସମାଜ ପାଇଁ ତାଙ୍କର ଉଲ୍ଲେଖନୀୟ ଅବଦାନକୁ ଦୃଷ୍ଟିରେ ରଖି ତାଙ୍କୁ ଏହି ସମ୍ମିଳନୀକୁ ଆମନ୍ତ୍ରଣ କରାଯାଇଥିଲା। ଉକ୍ତ ସମ୍ମିଳନୀରେ ଯୋଗଦେଇ ମେହେର ସର୍ବଭାରତୀୟ ସ୍ତରରେ ହସ୍ତତନ୍ତ କ୍ଷେତ୍ରର ବର୍ତ୍ତମାନ ସମସ୍ୟା ଓ ବୁଣାକାର ମାନଙ୍କ ସ୍ଥିତି ସମ୍ପର୍କରେ ନିଜର ମତାମତ ରଖିଥିଲେ। ବୁଣାକାରମାନଙ୍କ ଜୀବିକା ସୁରକ୍ଷା ଓ ଆୟ ବୃଦ୍ଧି, ହସ୍ତତନ୍ତର ବଜାର ବିସ୍ତାର, ଆଧୁନିକ ଡିଜାଇନ ଓ ରଙ୍ଗରେ ପରିବର୍ତ୍ତନ ଆଣିବାର ଆବଶ୍ୟକତା, ଡିଜିଟାଲ୍ ମାଧ୍ୟମରେ ବଜାର ସୁଯୋଗ ସୃଷ୍ଟି କରିବା ସହ ଯୁବପିଢ଼ୀଙ୍କୁ ଏହି ପେଶା ପ୍ରତି ଆକର୍ଷିତ କରିବା ପାଇଁ ଯଥୋଚିତ ଯୋଜନା ଗଠନ କରିବା ଭଳି ଗୁରୁତ୍ୱପୂର୍ଣ୍ଣ ବିଷୟରେ ସେ ବସ୍ତ୍ର ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ ବୋଲି ମେହେର ସୂଚନା ଦେଇଛନ୍ତି । ସେହିପରି କେନ୍ଦ୍ର ବୟନ ଶିଳ୍ପ ମନ୍ତ୍ରୀ ସିଂଙ୍କୁ ଓଡିଶାର ବୁଣାକାର ହବ୍ ରୂପେ ପରିଚିତ ବରଗଡ଼କୁ ଆସି ଭାରତୀୟ ହସ୍ତଶିଳ୍ପ ପ୍ରଯୁକ୍ତି ପ୍ରତିଷ୍ଠାନ( ଆଇଆଇଏଚଟି) ଏବଂ ବାଲିଯୋରୀ ବୁଣାକାର ବଜ଼ାର ପରିଦର୍ଶନ କରିବାକୁ ଅନୁରୋଧ କରିଛନ୍ତି ବୋଲି ମେହେର କହିଛନ୍ତି।
