ଭୋପାଳ, ୩୦।୬- ଫ୍ରି ସର୍ଭିସ କରାଇଦେବା ନାମରେ ଜଣେ ଅଟୋମୋବାଇଲ ଇଞ୍ଜିନିୟର ମହିଳାଙ୍କଠାରୁ କାର୍ ଲୁଟ୍ କରିନେଇଛନ୍ତି। ତେବେ କାରରେ ରହିଯାଇଥିବା ମହିଳାଙ୍କ ଫୋନ ହିଁ ଲୁଟେରାକୁ ଧରାଇବାରେ ପୋଲିସକୁ ସହାୟତା କରିଥିଲା। ଏଭଳି ଏକ ଘଟଣା ମଧ୍ୟପ୍ରଦେଶର ରାଜଧାନୀ ଭୋପାଳରେ ଦେଖିବାକୁ ମିଳିଛି। ଶାହପୁର ବାସିନ୍ଦା ଶିନା ଥୋମାସ ସ୍ଥାନୀୟ ଏକ କଲେଜରେ ଚାକିରି କରନ୍ତି। ଶିନାଙ୍କ ନିକଟକୁ ରବିବାର ସନ୍ଧ୍ୟାରେ ଏକ ଫୋନ ଆସିଥିଲା। ଯେଉଁଥିରେ ତାଙ୍କ କାର୍କୁ ମାଗଣା ସର୍ଭିସ କରାଯିବ ବୋଲି ଅଯୋଦ୍ଧା ନଗରର ଦୀପକ ଶର୍ମା ନାମକ ଜଣେ ଯୁବକ କହିଥିଲେ। ସୋମବାର ସକାଳେ କାର ସର୍ଭିସ ପାଇଁ ସମୟ ଧାର୍ଯ୍ୟ ହୋଇଥିଲା। ପରଦିନ ଦୀପକ ଶିନାଙ୍କ ଘରକୁ ଆସି ମହିଳାଙ୍କ ବାଲେନୋ କାର୍ର ଚାବି ଓ ରେଜିଷ୍ଟ୍ରି କାର୍ଡ ମାଗିଥିଲେ। ଏହାପରେ ସର୍ଭିସିଂ ବାହାନାରେ କାର୍କୁ ଦେଖିଥିଲେ। ମହିଳା ଜଣଙ୍କ କିଛି ସମୟ ପାଇଁ ଘର ଭିତରକୁ କୌଣସି ଏକ କାମରେ ଯାଇଥିବାବେଳେ ଦୀପକ ଗାଡ଼ି ଧରି ସେଠାରୁ ଫେରାର ହୋଇଯାଇଥିଲେ। ଏହାପରେ ମହିଳା ଜଣକ ଯେତେବେଳେ ବାହାରକୁ ଆସି କାର୍କୁ ନ ଥିବାର ଦେଖିଲେ ସଙ୍ଗେ ସଙ୍ଗେ ପୋଲିସକୁ ଖବର ଦେଇଥିଲେ। ସୌଭାଗ୍ୟବଶତଃ କାର୍ ମଧ୍ୟରେ ମହିଳାଙ୍କ ମୋବାଇଲା ରହିଯାଇଥିଲା। ଯାହାକି ପୋଲିସକୁ ଦୀପକଙ୍କୁ ଧରିବାରେ ସହାୟତା କରିଥିଲା। ପୋଲିସ ମୋବାଇଲ ଫୋନର ଲୋକେସନ ଆଧାରରେ ଦୀପକଙ୍କୁ ଶୋଇଥିବା ଅବସ୍ଥାରେ ତାଙ୍କ ଘରୁ ଗିରଫ କରିଥିଲା। ପୋଲିସ ସନ୍ଧାନ କରି ଜାଣିବାକୁ ପାଇଛି ଯେ, ଦୀପକ ଜଣେ ଅଟୋ ମୋବାଇଲ ଇଞ୍ଜିନିୟର। ପୂର୍ବରୁ ସେ ଏଭଳି ଅନେକ କାର୍ ଲୁଟ୍ କରିଥିବା ସ୍ବୀକାର କରିଛି।
