ଟିକିରି,୯ା୫(ଡି.ଏନ୍.ଏ.): ଟେକ୍ନୋଲୋଜି ଯୁଗରେ ମନୁଷ୍ୟ ନିଜର ଆବଶ୍ୟକତାକୁ ପୂରଣ କରିବା ଦିଗରେ ପ୍ରତ୍ୟେକ ଜିନିଷକୁ ସରଳ କରିବାକୁ ଉଦ୍ୟମ ଚଳାଇଛି। ସେହିପରି ଏବେକା ସମୟରେ ବିଭିନ୍ନ ସ୍ଥାନରେ କ୍ୟୁଆର୍ କୋଡ୍(କ୍ୱିକ୍ ରେସ୍ପନ୍ସ କୋଡ୍) ବିଭିନ୍ନ କ୍ଷେତ୍ରରେ ବ୍ୟବହାର ହେଉଛି। ପ୍ରାୟ ସମସ୍ତ ଦୋକାନ, ଶୋ’ରୁମ୍, ହସ୍ପିଟାଲ, ରେସ୍ତୋରାଁ, ଶପିଂମଲ୍ ଆଦିରେ ଏହା ବ୍ୟବହାର କରାଯାଉଛି। ଏହି ଆଧୁନିକ ଟେକ୍ନୋଲୋଜି ଦ୍ୱାରା କୌଣସି ଜିନିଷ ବିଷୟରେ ସୂଚନା, ଡକ୍ୟୁମେଣ୍ଟ ଆଦିକୁ ଷ୍ଟୋର୍ କରି ରଖିବା ସହଜ ଏବଂ ସୁରକ୍ଷିତ ହୋଇଥାଏ। ତେବେ କୋରାପୁଟ ଜିଲା ଜୟପୁର ସହରର ଯୁବ ଇଞ୍ଜିନିୟର ଶିଶିର କୁମାର ମଲ୍ଲିକ ଏହାକୁ ଆହୁରି ସରଳ କରିବାକୁ ଯାଇ ନେଲ୍ କ୍ୟୁଆର୍ କୋଡ୍ ପ୍ରସ୍ତୁତ କରିଛନ୍ତି। ଏହା ଏକ ନାନୋ(ଛୋଟ) କ୍ୟୁଆର୍ କୋଡ୍। କମ୍ପ୍ୟୁଟର ପ୍ରୋଗ୍ରାମିଂ ଜରିଆରେ କରାଯାଇଥିବା ଏହି କୋଡ୍କୁ ଷ୍ଟିକର ଭଳି କମ୍ ଦିନ ପାଇଁ ବ୍ୟବହାର କରିପାରିବେ। ସେହିପରି ଟାଟୁଭଳି ସ୍ଥାୟୀ ରୂପେ ଏହାକୁ ନିଜ ହାତ ନଖରେ ପ୍ରିଣ୍ଟ୍ କରିପାରିବେ। ଭାରତରେ ଏହା ପ୍ରଥମ ବୋଲି ଶିଶିର ଦାବି କରିଛନ୍ତି।
ଦୁଇ ମାସ ଧରି ପରିଶ୍ରମ କରି ଶିଶିର ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରି ନିଜ ନଖ ଉପରେ ଏହି ଛୋଟ କ୍ୟୁଆର୍ କୋଡ୍ର ରୂପ ଦେବାରେ ସଫଳ ହୋଇଛନ୍ତି। ଏହି କୋଡ୍ ଦ୍ୱାରା ଟଙ୍କା କରବାରଠାରୁ ଆରମ୍ଭ କରି ଆଧାର କାର୍ଡ, ବିଭିନ୍ନ ପରିଚୟ ପତ୍ର, ସାର୍ଟିଫିକେଟ, ବ୍ୟାଙ୍କ ତଥ୍ୟ, ୟୁଜର ଆଇଡି ଆଦିକୁ ଏହି କ୍ୟୁଆର୍ କୋଡ୍ ଦ୍ୱାରା ଗୁପ୍ତ ଏବଂ ସୁରକ୍ଷିତ ଭାବେ ରଖାଯାଇପାରିବ। ନଖରେ କ୍ୟୁଆର୍ କୋଡ୍ ରହୁଥିବାରୁ ଆବଶ୍ୟକ ସ୍ଥଳେ କୌଣସି ଉକ୍ୟୁମେଣ୍ଟ ସାଙ୍ଗରେ ନ ନେଇ ମଧ୍ୟ ମୋବାଇଲ୍ରେ କ୍ୟୁଆର୍ କୋଡ୍ ସ୍କାନର ସାହାଯ୍ୟରେ ବାହାର କରି ବ୍ୟବହାର କରାଯାଇପାରିବ। ଏଥିରେ ପାସ୍ଓ୍ବାର୍ଡ ବ୍ୟବହାର ହେଉଥିବାରୁ ଅନ୍ୟ କେହି ନିଜ ମୋବାଇଲ୍ରେ ସ୍କାନ୍ କରି ବ୍ୟକ୍ତିଗତ ତଥ୍ୟ ମଧ୍ୟ ନେଇପାରିବେନି ବୋଲି ଶିଶିର କହିଛନ୍ତି। ଏମିତିକି କୌଣସି ଡକ୍ୟୁମେଣ୍ଟର ହାର୍ଡକପି ହଜିଯାଇଥିଲେ ମଧ୍ୟ କ୍ୟୁଆର୍ କୋଡ୍ ଜରିଆରେ ଷ୍ଟୋର୍ ରଖାଯାଇଥିବା ଡକ୍ୟୁମେଣ୍ଟ ସହଜରେ ପାଇପାରିବେ। ସ୍କୁଲ, କଲେଜରେ ଛାତ୍ରୀଛାତ୍ରଙ୍କ ବିଭିନ୍ନ ତଥ୍ୟ, ରେଜିଷ୍ଟ୍ରେଶନ ନମ୍ବର, ପିଲାଙ୍କ ପରିଚୟପତ୍ର ଆଦି କ୍ୟୁାଆର୍ କୋଡ୍ ଜରିଆରେ ଷ୍ଟୋର୍ କରାଯାଇପାରିବ। ଅଫିସରେ କର୍ମଚାରୀଙ୍କ ଉପସ୍ଥାନ ପାଇଁ ବ୍ୟବହାର କରାଯାଇପାରିବ।
ଶିଶିର ରାୟଗଡ଼ାସ୍ଥିତ ଆର୍ଆଇଟିଏଏମ୍(ରିତମ୍)ରୁ ବି. ଟେକ୍ ପାସ୍ କରିଥିବାବେଳେ ଏବେ ଉତ୍କଳ ଆଲୁମିନା କମ୍ପାନୀରେ ଟେକ୍ନିସିଆନ ଭାବେ କାମ କରୁଛନ୍ତି। ସେ କାମ ସାରି ଘରକୁ ଯିବା ପରେ ନୂତନ କିଛି ସୃଷ୍ଟି କରିବାରେ ବ୍ୟସ୍ତ ରୁହନ୍ତି। ନେଲ୍ କ୍ୟୁାଆର୍ କୋଡ୍ ବ୍ୟତୀତ ଶିଶିର ପୂର୍ବରୁ ରୋବୋ ହେଲ୍ମେଟ, କରୋନା ସ୍ମାର୍ଟକାର୍ଡ, ଜିପିଏସ୍ ଯୁକ୍ତ ବେଲ୍ଟ ଆଦି ପ୍ରସ୍ତୁତ କରି ଚର୍ଚ୍ଚାକୁ ଆସିଛନ୍ତି। ଲୋକଙ୍କ ସୁବିଧାକୁ ନଜରରେ ରଖି ସେ ଏସବୁ କରୁଛନ୍ତି। ଆଗକୁ ଅନେକ ଯୋଜନା ରହିଥିବା ସେ କହିଛନ୍ତି।
