କୋହିମା,୨୫।୪: କିଛି ସମୟର ବିରତି ପରେ ପୁଣି ଥରେ ଦେଶରେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି। ଯାହା ସରକାର ଓ ଜନସାଧାରଣଙ୍କ ଚିନ୍ତା ଆହୁରି ବଢ଼ାଇ ଦେଇଛି। ଇତିମଧ୍ୟରେ ଉତ୍ତର-ପୂର୍ବ ରାଜ୍ୟ ନାଗାଲାଣ୍ଡରୁ ଏକ ଖୁସି ଖବର ସାମ୍ନାକୁ ଆସିଛି। ନାଗାଲାଣ୍ଡ ଏବେ କରୋନା ମୁକ୍ତ ରାଜ୍ୟ ହୋଇଯାଇଛି। ସୂଚନାଯୋଗ୍ୟ, ନାଗାଲାଣ୍ଡର ଦିମାପୁର ସହରରେ ମାତ୍ର ଜଣେ କରୋନା ସଂକ୍ରମିତ ଚିକିତ୍ସିତ ହେଉଥିବା ବେଳେ ରବିବାର ହସ୍ପିଟାଲରୁ ତାଙ୍କୁ ଡିସଚାର୍ଜ କରାଯାଇଛି। ଏହାପରେ ନାଗାଲାଣ୍ଡରେ ଏବେ ଜଣେ ବି କରୋନା ସଂକ୍ରମିତ ନ ଥିବା କୁହାଯାଉଛି। ଦେଶର ପ୍ରଥମ ରାଜ୍ୟ ଭାବେ ନାଗାଲାଣ୍ଡ କରୋନା ମୁକ୍ତ ହୋଇଛି। ନାଗାଲାଣ୍ଡରେ ୨୦୨୦ ମେ’ ୨୫ରେ ପ୍ରଥମ କରୋନା ସଂକ୍ରମିତ ଚିହ୍ନଟ ହୋଇଥିଲେ। ଏହାପୂର୍ବରୁ ୩ କରୋନା ଆକ୍ରାନ୍ତ ଚେନ୍ନାଇରୁ ଫେରିଥିଲେ। ସେମାନଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି ପରେ କରୋନା ସଂକ୍ରମଣ ବଢାଇଥିଲେ। ରାଜ୍ୟରେ ଏପର୍ଯ୍ୟନ୍ତ ମୋଟ ୩୫ହଜାର ୪୮୮ଜଣ କରୋନାରେ ଆକ୍ରାନ୍ତ ହୋଇଥିବା ବେଳେ ସେଥିମଧ୍ୟରୁ ୩୩ହଜାର ୨୪୪ଜଣ ସୁସ୍ଥ ହୋଇସାରିଛନ୍ତି। ଏଥିସହ କରୋନାଜନିତ ୭୬୦ଜଣ ନିଜର ପ୍ରାଣ ହରାଇଛନ୍ତି। ନାଗାଲାଣ୍ଡରେ ୯୩.୬୮ ପ୍ରତିଶତ ଲୋକ କରୋନାରୁ ସୁସ୍ଥ ହୋଇଥିବା ସୂଚନା ରହିଛି। ସୂଚନା ମୁତାବକ, ଗତ ୨୪ଘଣ୍ଟାରେ କରୋନା ସଂକ୍ରମଣର ଗୋଟିଏ ବି ନୂଆ ମାମଲା ସାମ୍ନାକୁ ଆସିନାହିଁ। ଏନେଇ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି।
