ଦିମାପୁର,୨୪ ।୨: ନାଗାଲାଣ୍ଡ ରାଜ୍ୟ ଗଠନ ହେବାର ୬ ଦଶକ ପରେ ବି ତା’ର ପ୍ରଥମ ମହିଳା ବିଧାୟକଙ୍କ ଅପେକ୍ଷାରେ ରହିଛି । ନେଫାରୁ ୧୯୬୩ରେ ଅଲଗା ହୋଇ ନାଗାଲାଣ୍ଡ ରାଜ୍ୟ ହୋଇଥିଲା । ଏଥର ଏଠାରେ ବିଧାନସଭା ନିର୍ବାଚନରେ ଭାଜପା, ଏନଡିପିପି ଓ କଂଗ୍ରେସରେ ମୋଟ ୪ ପ୍ରାର୍ଥୀଙ୍କୁ ଟିକେଟ ଦିଆଯାଇଛି ।
ପୂର୍ବରୁ ଏମିତି ସମୟ ଥିଲା ଯେତେବେଳେ କୌଣସି ମହିଳାଙ୍କୁ ଏଠି ଟିକେଟ ଦିଆଯାଉ ନ ଥିଲା । ଏହାର କାରଣ ହେଉଛି ନାଗା ପରମ୍ପରା ଅନୁଯାୟୀ ସାମାଜିକ ନିଷ୍ପତ୍ତି ନେବାର ଅଧିକାର କେବଳ ପୁରୁଷଙ୍କର ରହିଛି । ଏବେ ରାଜ୍ୟର ଦୁଇ ମହିଳା ଏମପି ହୋଇସାରିଛନ୍ତି । ପ୍ରଥମଥର ୧୯୭୭ରେ ରାନୋ ଏମ ଶାଜା ଏମପି ହୋଇଥିଲେ । ଏହାପରେ ୨୦୨୨ରେ ଭାରତୀୟ ଜନତା ପାର୍ଟି(ଭାଜପା)ର ଏସ ଫାନୋନ କୋନ୍ୟାକ ରାଜ୍ୟ ସଭା ସଦସ୍ୟ ହୋଇଥିଲେ । ନାଗାଲାଣ୍ଡର ୬୦ ସଦସ୍ୟ ବିଶିଷ୍ଟ ବିଧାନସଭା ଆସନ ମଧ୍ୟରୁ ୫୯ଟି ଆସନ ଲାଗି ୨୭ ଫେବୃୟାରୀରେ ମତଦାନ ହେବାକୁ ଯାଉଛି । ଗୋଟିଏ ଆସନରେ ଭାଜପା ପ୍ରାର୍ଥୀ କଝୋତୋ କିନିମି ନିର୍ବିରୋଧରେ ନିର୍ବାଚିତ ହୋଇଛନ୍ତି ।
