ନୂଆଦିଲ୍ଲୀ, ୨୭।୮(ପି.ଟି.): କରୋନା ସଂକ୍ରମଣ ରୋକିବାରେ ଏନ୍୯୫ ମାସ୍କ ସବୁଠୁ ଅଧିକ ପ୍ରଭାବୀ ବୋଲି ଭାରତୀୟ ବୈଜ୍ଞାନିକମାନେ କରିଥିବା ଏକ ଅଧ୍ୟୟନରୁ ଜଣାପଡିଛି। ଏଥିରେ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ)ବୈଜ୍ଞାନିକମାନେ ମଧ୍ୟ ସାମିଲ ଅଛନ୍ତି। ଆଦୌ ମାସ୍କ ନ ପିନ୍ଧିବା ଅପେକ୍ଷା ଯେକୌଣସି ମାସ୍କ ପିନ୍ଧିବା ଭଲ ବୋଲି ସେମାନେ କହିଛନ୍ତି। କାଶିବା କିମ୍ବା ଛିଙ୍କିବାବେଳେ ନିଃଶ୍ୱାସରେ ବାହାରୁଥିବା ଜଳକଣାର କରୋନା ସଂକ୍ରମଣରେ ପ୍ରମୁଖ ଭୂମିକା ରହିଛି। ଜଣେ ବ୍ୟକ୍ତି କାଶିବା ସମୟରେ ପାଟିରୁ ବାହାରୁଥିବା ଜଳକଣାଗୁଡ଼ିକ କିପରି ପ୍ରବାହିତ ହେଉଛି, ତା’ର ଏକ ଭିଜୁଆଲ ପ୍ରସ୍ତୁତ କରିଛନ୍ତି ଇସ୍ରୋ ବୈଜ୍ଞାନିକ ପଦ୍ମନାଭ ପ୍ରସନ୍ନ ସିମ୍ହା ଏବଂ କର୍ନାଟକର ଶ୍ରୀଜୟଦେବ ଇନ୍ଷ୍ଟିଚ୍ୟୁଟ ଅଫ୍ କାର୍ଡିଓଭାସ୍କୁଲାର ସାଇନ୍ସେସ୍ ଆଣ୍ଡ ରିସର୍ଚ୍ଚର ପ୍ରସନ୍ନ ସିମ୍ହା ମୋହନ ରାଓ। ଏହା ଫିଜିକ୍ସ ଅଫ୍ ଫ୍ଲୁଇଡ୍ସ ପତ୍ରିକାରେ ପ୍ରକାଶ ପାଇଛି। ଏନ୍୯୫ ମାସ୍କ ପିନ୍ଧିଲେ କାଶିବା ସମୟରେ ଜଳକଣାର ଭୂସମାନ୍ତରାଳ ପ୍ରବାହ ଯଥେଷ୍ଟ କମ୍ ହୋଇଥାଏ ବୋଲି ଏହି ପରୀକ୍ଷାରୁ ଜଣାପଡିଛି। କାରଣ ଏହି ମାସ୍କ ଯୋଗୁ କାଶର ପ୍ରାରମ୍ଭିକ ବେଗକୁ ୧୦ ଭାଗ ପର୍ଯ୍ୟନ୍ତ କମାଇଦେଇଥାଏ। ଫଳରେ ଏହାର ବେଗ ୦.୧ରୁ ୦.୨୫ ମିଟର ମଧ୍ୟରେ ରହିଥାଏ ବୋଲି ଗବେଷକମାନେ କହିଛନ୍ତି। ମୁହଁ ବନ୍ଦ ନ କରି କାଶିଲେ ଜଳକଣା ୩ ମିଟର ପର୍ଯ୍ୟନ୍ତ ଯାଇଥାଏ। ସାଧାରଣ ମାସ୍କରେ ଏହାର ବେଗ ୦.୫ ମିଟରକୁ ହ୍ରାସ ପାଇଥାଏ।
