ମା’ ଆଉ ପିଲାର ସମ୍ପର୍କ କେତେ ନିବିଡ ତାହା କହିବା ବାହୁଲ୍ୟ। ପିଲାଟିକୁ ଗର୍ଭରେ ଧାରଣ କରି ତାକୁ ଜନ୍ମ ଦେଇ ତା’ପରେ ତାହାର ଲାଳନ ପାଳନ କରିଥାଏ ସେ। ଆଉ ତା’ ସ୍ନେହରେ ଲୁଚି ରହିଥାଏ ମା’ର ମମତା। ସେପରି ଏକ କାହାଣୀକୁ ଆଧାର କରି ନିର୍ମିତ ହୋଇଛି ଓଡ଼ିଆ ସିନେମା ‘ଧନ ଧନ ଡାକି ଗଲା ମୋ ଜୀବନ’। ହେଲେ ଏଥିରେ ଜଗତର ନାଥ ଜଗନ୍ନାଥଙ୍କ ତତ୍ତ୍ୱ ମଧ୍ୟ ରହିଛି। ଉକ୍ତ ସିନେମାର ସମସ୍ତ କାର୍ଯ୍ୟ ଶେଷ ହୋଇଛି ଏବଂ ଖୁବ୍ ଶୀଘ୍ର ପରଦା ଉପରକୁ ଆସିବ ବୋଲି ପ୍ରଯୋଜନା ସଂସ୍ଥା ସୂତ୍ରରୁ ପ୍ରକାଶ। ଏପରି ଏକ ଭିନ୍ନ ଧରଣର କାହାଣୀ ରଚନା କରିଛନ୍ତି ମନ୍ମୟ କୁମାର ମହାପାତ୍ର। କେବଳ ସେତିକି ନୁହେଁ, ସେ ଏହାର ଚିତ୍ରନାଟ୍ୟ ରଚନା କରିବା ସହ ପ୍ରଥମ ଥର ପାଇଁ ବଡ ପରଦା ଲାଗି ନିର୍ଦ୍ଦେଶନା ମଧ୍ୟ ଦେଇଛନ୍ତି।ଏହାପୂର୍ବରୁ ସେ ବେଶ୍ କେତୋଟି ଆଲବମର ନିର୍ଦ୍ଦେଶନା ଦେବା ସହ କେତୋଟି ଓଡ଼ିଆ ସିନେମାରେ ସହ ନିର୍ଦ୍ଦେଶକ ଭାବରେ କାମ କରିସାରିଛନ୍ତି। ମଞ୍ଜୁରାଣୀ ଫିଲ୍ମସ ବ୍ୟାନରର ଏହି ଚିତ୍ରର ପ୍ରଯୋଜନା କରିଛନ୍ତି ମଞ୍ଜୁରାଣୀ ପ୍ରଧାନ। ଉକ୍ତ ସିନେମାର ବିଭିନ୍ନ ଭୂମିକାରେ ଜ୍ୟୋତି, ପ୍ରିୟଙ୍କା, ଭୁପତି ତ୍ରିପାଠୀ, ବ୍ରଜ ସିଂ, ଚକ୍ରଧର ଜେନା, ବିଜୁ ବଡଜେନା, ଲୋପାମୁଦ୍ରା, ଥିନ, ଅସୀତ ପତି, ବାବୁ ପ୍ରଧାନ, ପ୍ରିୟ ମିଶ୍ର ପ୍ରମୁଖ କଳାକାର ଅଭିନୟ କରିଛନ୍ତି।
