ମୁମ୍ବାଇ,୮।୬ : ଏନସିପି ମୁଖ୍ୟ ତଥା ପୂର୍ବତନ କେନ୍ଦ୍ର ମନ୍ତ୍ରୀ ଶରଦ ପାୱାର ଔରଙ୍ଗାବାଦରେ କହିଛନ୍ତି ରାଜନୈତିକ ଦଳମାନେ ପ୍ରଥମେ କେଉଁ ଆସନ ଜିତିବେ ସେନେଇ ନିଶ୍ଚିତ ହେବା ପରେ ନିବ;ାଚନରେ ପ୍ରତିଦ୍ୱନ୍ଦ୍ୱିତା କରିବା ନେଇ ଆକଳନ କରିବା ଉଚିତ। କିନ୍ତୁ ଏହା ମଧ୍ୟ ମନେ ରଖିବା ଉଚିତ ଯଦି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି, ତା’ହେଲେ ତାଙ୍କର ଉପସ୍ଥିତି ଶାସକ ଦଳମାନଙ୍କୁ ଯେପରି କୌଣସି ପ୍ରକାରେ ସାହାଯ୍ୟ ନ କରେ।
ସେହିଭଳି ଯେତେବେଳେ ତାଙ୍କୁ ପଚରାଗଲା କୌଣସି ରାଜନୈତିକ ଦଳ ରାଜ୍ୟର ପ୍ରତ୍ୟେକ ଭାଗରେ ନିର୍ବାଚନ ଲଢ଼ିବା ସ୍ଥିତିରେ ନାହାଁନ୍ତି ଏବଂ ଏହା ଦଳର ଦୁର୍ବଳତାର ସଙ୍କେତ ଅଟେ କି? ଏହା ଉପରେ ଏନସିପି ସଭାପତି କହିଛନ୍ତି ଦଳମାନେ ଯେକୌଣସି ଆସନରୁ ନିର୍ବାଚନ ଲଢ଼ିପାରିବେ, କିନ୍ତୁ ସେମାନେ କାହିଁକି ଏପରି କରୁଛନ୍ତି ତାହା ପ୍ରଥମେ ଚିନ୍ତା କରିବା ଉଚିତ। ଦଳଗୁଡିକ ପ୍ରଥମେ ସିଟରେ ପ୍ରତିଦ୍ୱନ୍ଦ୍ୱିତା କରି ଶାସକ ଦଳକୁ ସାହାଯ୍ୟ କରୁଛନ୍ତି କି ନାହିଁ ତାହା ଯାଞ୍ଚ କରିବା ଜରୁରୀ। ଯେଉଁ ସ୍ଥାନରୁ ସେମାନେ ଜିତିବା ନିଶ୍ଚିତ ସେମାନଙ୍କୁ ଏଭଳି ସିଟ ଉପରେ ଧ୍ୟାନ ଦେବାକୁ ପଡିବ। କାରଣ ଏହା ରାଜନୈତିକ ଦୃଷ୍ଟିରୁ ସମ୍ବେଦନଶୀଳ ।
ବାସ୍ତବରେ ଆସନ୍ତା ବର୍ଷ ମେ ୨୦୨୪ ରେ ଲୋକସଭା ନିର୍ବାଚନ ହେବାକୁ ଥିବାବେଳେ ଆସନ୍ତା ବର୍ଷ ନଭେମ୍ବର-ଡିସେମ୍ବରରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ହେବ। ଏଭଳି ପରିସ୍ଥିତିରେ ଶିବସେନା (ୟୁବିଟି), ଏନସିପି ଏବଂ କଂଗ୍ରେସର ମହା ବିକାଶ ଅଘାଡି (ଏମଭିଏ) ମିଳିତ ଭାବେ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଥିବାବେଳେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ନେତୃତ୍ୱରେ ଶିବସେନା ଏବଂ ଭାଜପା ଏକାଠି ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଇଛନ୍ତି।
