ଦୁବାଇ, ୧୪ା୬ (ପି.ଟି.)-ବାଂଲାଦେଶର ପୂର୍ବତନ ଅଧିନାୟକ ମୁସ୍ଫିକର ରହିମ ଓ ସ୍କଟିଶ ଅଲ୍ରାଉଣ୍ଡର କ୍ୟାଥରିନ୍ ବ୍ରାଇସ୍ ଯଥାକ୍ରମେ ପୁରୁଷ ଓ ମହିଳା ବର୍ଗରେ ଆଇସିସି ପ୍ଲେୟର ଅଫ୍ ଦି ମନ୍ଥ୍ ବିବେଚିତ ହୋଇଛନ୍ତି। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ତରଫରୁ ସୋମବାର ଏକ ଖବରଦାତା ସମ୍ମିଳନୀରେ ଏହା ଘୋଷଣା କରାଯାଇଛି। ଉଇକେଟକିପର ବ୍ୟାଟ୍ସମ୍ୟାନ ମୁସ୍ଫିକର ମେ ମାସରେ ଶ୍ରୀଲଙ୍କା ବିପକ୍ଷରେ ଏକ ଟେଷ୍ଟ ଓ ୩ ଅନ୍ତର୍ଜାତୀୟ ଦିନିକିଆ ଖେଳିଛନ୍ତି। ଶ୍ରୀଲଙ୍କା ବିପକ୍ଷରେ ବାଂଲାଦେଶର ପ୍ରଥମ ଦିନିକିଆ ସିରିଜ ବିଜୟରେ ସେ ପ୍ରମୁଖ ଭୂମିକା ଗ୍ରହଣ କରିଥିଲେ। ଦ୍ୱିତୀୟ ଗେମ୍ରେ ସେ ୧୨୫ ରନ ସ୍କୋର କରିଥିଲେ। ଆଇସିସି ଭୋଟିଂ ଏକାଡେମୀରେ ପ୍ରତିନିଧିତ୍ୱ କରୁଥିବା ଭାରତର ପୂର୍ବତନ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ ମେ ମାସରେ ମୁସ୍ଫିକରଙ୍କ ପ୍ରଦର୍ଶନ ଉପରେ ତାଙ୍କର ମନ୍ତବ୍ୟ ରଖି କହିଛନ୍ତି ଉଚ୍ଚସ୍ତରରେ ୧୫ ବର୍ଷ ଖେଳିସାରିବା ପରେ ମଧ୍ୟ ବାଂଲାଦେଶର ଏହି ଖେଳାଳିଙ୍କର ରନ ସଂଗ୍ରହ କ୍ଷୁଧା ମେଣ୍ଟି ନାହିଁ। ସବୁଠାରୁ ଗୁରୁତ୍ୱପୂର୍ଣ୍ଣ ହେଲା ୧୯୯୬ ବିଶ୍ୱକପ୍ ଚାମ୍ପିୟନ ବିପକ୍ଷରେ ବାଂଲାଦେଶର ପ୍ରଥମ ଅନ୍ତର୍ଜାତୀୟ ଦିନିକିଆ ସିରିଜ ବିଜୟ ସଫଳତାରେ ଏହି ଖେଳାଳିଙ୍କର ବିଶେଷ ଅବଦାନ ରହିଛି। ମିଡିଲ ଅର୍ଡରରେ କ୍ରିଜ୍ରେ ଜମି ରହିବା ଏବଂ ଚମତ୍କାର ଉଇକେଟ କିପିଂ ତାଙ୍କ ଫିଟ୍ନେସ୍ ଓ ସ୍କିଲ୍ର ପ୍ରମାଣ ଦେଉଛି। ଅନ୍ୟପକ୍ଷରେ ବ୍ରାଇସ ସ୍କଟ୍ଲାଣ୍ଡର ଉଭୟ ପୁରୁଷ ଓ ମହିଳା ବିଭାଗରେ ପ୍ରଥମ ଖେଳାଳି ହିସାବରେ ବ୍ୟାଟିଂ ହେଉ ଅବା ବୋଲିଂ ନିକଟରେ ପ୍ରକାଶିତ ଏମ୍ଆର୍ଏଫ୍ ଟାୟାର୍ସ ଆଇସିସି ପ୍ଲେୟର ର଼୍ୟାଙ୍କିଙ୍ଗର ଟପ୍ ୧୦ରେ ସ୍ଥାନ ପାଇବାର ଗୌରବ ଅର୍ଜନ କରିଛନ୍ତି। ମେ ମାସରେ ଆୟର୍ଲାଣ୍ଡ ବିପକ୍ଷରେ ବ୍ରାଇସ୍ ୪ ଅନ୍ତର୍ଜାତୀୟ ଟି୨୦ ଖେଳିଛନ୍ତି। ସେ ୯୬ ରନ ସ୍କୋର କରିବା ସହ ୪.୭୬ ଇକୋନୋମି ରେଟ୍ରେ ୫ ଉଇକେଟ ଅକ୍ତିଆର କରିଛନ୍ତି।
