ଦିଗପହଣ୍ଡି,୧୩ା୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି-ଚିକିଟି ମୁଖ୍ୟରାସ୍ତା କଡ଼ରେ ଥିବା ଗଣେଶ ରାଇସ୍ ମିଲ ନିକଟରୁ ମୁମ୍ବାଇ ସମତାନଗର ଥାନା ପୋଲିସ ଜଣେ ଫେରାର ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ସାନଖେମୁଣ୍ଡି ବ୍ଲକ ପାଟପୁର ଥାନା ପଳାସପୁର ଗ୍ରାମର ବିଜୟ ଗୌଡ଼(୨୬)। ମୁମ୍ବାଇର ସମତାନଗର ଏସ.ଆଇ ଅତୁଲ ଲାଞ୍ଜେ, କନଷ୍ଟେବଲ ମହେଶ ଧୋବୀ, ବାଲା ସାହେବ ବେଣ୍ଡାଟେ ସ୍ଥାନୀୟ ପୋଲିସ ସହାୟତାରେ ଗୁରୁବାର ରାତି ୧୧ଟାରେ ଚଢ଼ାଉ କରି ବିଜୟଙ୍କୁ ଗିରଫ କରିଛନ୍ତି। ଶୁକ୍ରବାର ମୁମ୍ବାଇ ପୋଲିସ ଅଭିଯୁକ୍ତଙ୍କୁ ଦିଗପହଣ୍ଡି କୋର୍ଟରେ ହାଜର କରାଇ ୪ ଦିନ ପାଇଁ ଟ୍ରାଞ୍ଜିଟ ରିମାଣ୍ଡ ପାଇଁ ଆବେଦନ କରିଥିଲେ। ମାଜିଷ୍ଟ୍ରେଟ ମାମଲାର ଗୁରୁତ୍ତ୍ୱ ଦୃଷ୍ଟିରୁ ତାଙ୍କୁ ରିମାଣ୍ଡ ପାଇଁ ଅନୁମତି ଦେବା ପରେ ପୋଲିସ ଟିମ ଅଭିଯୁକ୍ତଙ୍କୁ ସାଙ୍ଗରେ ନେଇ ମୁମ୍ବାଇ ଫେରିଥିବା ଜଣାପଡ଼ିଛି। ମୁମ୍ବାଇ ସମତାନଗର ଥାନା ଅଧୀନ ପଶ୍ଚିମ କାନ୍ଦିଭାଲିର ସାଇୟା କନଷ୍ଟ୍ରକ୍ସନ ଶ୍ରମିକ କ୍ୟାମ୍ପରେ ଘଟିଥିବା ଏକ ମରଣାନ୍ତକ ଆକ୍ରମଣ ଘଟଣାରେ ବିଜୟ ସମ୍ପୃକ୍ତ ଥାଇ ଫେରାର ହୋଇଯାଇଥିଲେ। ଗତ ଜାନୁଆରୀ ୧ ତାରିଖ ବିଳମ୍ବିତ ରାତିରେ ଶ୍ରମିକ କ୍ୟାମ୍ପରେ ମହିଳା ଶ୍ରମିକ ସୁମନ ସମ୍ପାମୋହନ କୁଟି,ମହମ୍ମଦ ରିଜୱାନଙ୍କୁ ସେ ମାରଣାସ୍ତ୍ରରେ ସଂଘବଦ୍ଧ ଆକ୍ରମଣ କରିଥିଲେ। ଅନ୍ୟ ଶ୍ରମିକମାନେ ଉଭୟଙ୍କୁ ସଙ୍କଟାପନ୍ନ ଅବସ୍ଥାରେ ଉଦ୍ଧାର କରି ସ୍ଥାନୀୟ ଡ଼. ବାବା ସାହେବ ଆମ୍ବେଡକର ଶତାବ୍ଦୀ ହସ୍ପିଟାଲରେ ଭର୍ତ୍ତି କରିଥିଲେ। ଏନେଇ ସୁମନ ସମ୍ପାମୋହନ କୁଟି ଥାନାରେ ଏତଲା ଦେବା ପରେ ନଂ.୧୨/୨୬ରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଥିଲା। ଫେରାର ଅଭିଯୁକ୍ତଙ୍କ ମୋବାଇଲ ସିଡିଆର ଯାଞ୍ଚ ପରେ ଲୋକେଶନ ଦିଗପହଣ୍ଡି ଅଞ୍ଚଳ ଦେଖାଇଥିଲା। ପୋଲିସ ଡେପୁଟି କମିଶନରଙ୍କ ନିର୍ଦ୍ଦେଶରେ ଏସ୍ଆଇଙ୍କ ନେତୃତ୍ୱରେ ପୋଲିସ ଟିମ୍ ଦିଗପହଣ୍ଡିରେ ପହଞ୍ଚିି ଅଭିଯୁକ୍ତ ବିଜୟଙ୍କୁ ଗିରଫ କରିଥିଲା।
