ରାଉରକେଲା,୧୨।୧୦ (ବିପ୍ଳବରଞ୍ଜନ ଦାଶ): ଓଡିଆ, ସମ୍ବଲପୁରୀ, ହିନ୍ଦୀ ଓ ତେଲଗୁ ଭାଷାରେ ନିର୍ମିତ ବଲାଙ୍ଗିର ପାଟଣାଗଡ ପାର୍ସଲ ବୋମା ବିସ୍ପୋରଣ ଘଟଣା ଉପରେ ଆଧାରିତ ଚଳଚ୍ଚିତ୍ର ମାଇଣ୍ଡଗେମ ବିଷୟରେ ସବିଶେଷ ସୂଚନା ଦେଇଛନ୍ତି ଅଭିନେତା ମନୋଜ ମିଶ୍ର। ବୁଧବାର ରାଉରକେଲା କ୍ଲବଠାରେ ଆୟୋଜିତ ଖବରଦାତା ସମ୍ମିଳନୀରେ ମନୋଜ ମିଶ୍ର ଯୋଗଦେଇ ଚଳଚ୍ଚିତ୍ରର ସସ୍ପେନ୍ସ, ଡ୍ରାମା ଏବଂ ଥ୍ରୀଲର ଆଦି ଦୃଶ୍ୟ ଦର୍ଶକ ପସନ୍ଦ କରୁଥିବା କହିଥିଲେ। ଚଳଚ୍ଚିତ୍ରଟି ବିଭିନ୍ନ ଓଡିଆ ଖବର କାଗଜରେ ପ୍ରକାଶିତ ହୋଇଥିବା ପାର୍ଶଲ ବୋମା ଆର୍ଟିକିଲ ଆଧାରରେ ନିଖୁଣ ଭାବେ ନିର୍ମାଣ କରାଯାଇଛି ବୋଲି କହିବା ସହିତ ସମସ୍ତଙ୍କୁ ଚଳଚ୍ଚିତ୍ରଟି ଦେଖିବାକୁ ଅନୁରୋଧ କରିଥିଲେ। ଚଳିତ ମାସର ୬ରୁ ପ୍ରେକ୍ଷାଳୟରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରକୁ ଦର୍ଶକମାନେ ଅଧିକରୁ ଅଧିକ ପସନ୍ଦ କରିବେ ବୋଲି କହିଥିଲେ। ଚଳଚ୍ଚିତ୍ରରେ ବଲିଉଡ ଜଗତର ସୁନାମଧନ୍ୟ ଅଭିନେତା ଅତୂଲ କୁଲକର୍ଣ୍ଣୀଙ୍କ ସହ ବହୁ ବରିଷ୍ଠ ଓଡିଆ,ହିନ୍ଦୀ ଓ ତେଲଗୁ ଭାଷୀୟ ଅଭିନେତା, ଅଭିନେତ୍ରୀ ଜୀବନ୍ତ ଅଭିନୟ କରିଥିବା ଉଲ୍ଲେଖ କରିଥିଲେ। ପରେ ଅଭିନେତା ମନୋଜ ମିଶ୍ର ରାଉରକେଲା ସହରର ତିନୋଟି ସିନେମାହଲରେ ଚାଲିଥିବା ମାଇଣ୍ଡଗେମ ଚଳଚ୍ଚିତ୍ର ଦର୍ଶକଙ୍କ ସହିତ ମିଶି ଦେଖିଥିଲେ।
