ରାୟଗଡ଼ା ଅଫିସ, ୭।୫: ରାୟଗଡ଼ା ଜିଲା ଶେଷକାଲ ଥାନା ଅଧୀନ ଜେମାଦେଈପେଣ୍ଠ ଗ୍ରାମରେ ଏକ ଦୁଃଖଦ ଘଟଣା ଘଟିଛି। ଝିଅ ଜ୍ୱାଇଁଙ୍କଠାରୁ ଆଣିଥିବା ଧାର ଟଙ୍କା ଶୁଝି ନ ପାରିବାରୁ ମା’ପୁଅ ବିଷ ପିଇ ଆତ୍ମହତ୍ୟା କରିଛନ୍ତି। ମୃତକ ହେଲେ ମା’ ରଜନୀ ଗୁଡୁଲା ଏବଂ ପୁଅ ସମେସ ଗୁଡୁଲା। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ମିଳିଥିବା ସୂଚନା ମୁତାବକ, ମା’ପୁଅ ଏକ ହୋଟେଲ ଚଳାଉଥିଲେ। ହେଲେ କରୋନା ମହାମାରୀ ଯୋଗୁ ଏହା ବନ୍ଦ ହୋଇ ଯାଇଥିଲା। ହୋଟେଲକୁ ପୁଣିଥରେ ଚାଲୁ କରିବା ପାଇଁ ମା’ପୁଅ ଲୋକଙ୍କଠାରୁ ଧାର ଆକାରରେ ଲକ୍ଷାଧିକ ଟଙ୍କା ଆଣିଥିଲେ। ହେଲେ ପରବର୍ତ୍ତୀ ସମୟରେ ନିଜ ଝିଅ ଜ୍ୱାଇଁଙ୍କଠାରୁ ମଧ୍ୟ କିଛି ସୁନା ଅଳଙ୍କାର ଆଣି ବିକ୍ରି କରି ଲୋକଙ୍କ କିଛି ଟଙ୍କା ପରିଶୋଧ କରିଥିଲେ। ଏହାର କିଛି ମାସ ପରେ ଝିଅଜ୍ୱାଇଁ ସୁନା ଅଳଙ୍କାର ଫେରାଇ ଦେବାକୁ କହିଥିଲେ। ହେଲେ ପାଖରେ ଟଙ୍କା ନ ଥିବାରୁ ସୁନା ଅଳଙ୍କାର ଫେରାଇବାରେ ମା’ପୁଅଙ୍କର ବିଳମ୍ବ ହୋଇଥିଲା। ଏନେଇ ଝିଅଜ୍ୱାଇଁ ଏବଂ ଶାଶୁ ଏବଂ ଶଳାଙ୍କ ମଧ୍ୟରେ ମନୋମାଲିନ୍ୟ ହୋଇ ପାଟିତୁଣ୍ଡ ହୋଇଥିଲା। ଅନ୍ୟପକ୍ଷେ ଟଙ୍କା ପରିଶୋଧ କରିବା ନେଇ ମା’ପୁଅ ଚିନ୍ତାରେ ଥିଲେ। ବେଳକୁ ବେଳ ମା’ପୁଅଙ୍କ ଆର୍ଥିକ ସଂକଟ ଗୁରୁତର ହେବାରୁ ଏଥିରେ ମାନସିକ ଭାରସାମ୍ୟ ହରାଇ ଶୁକ୍ରବାର ରାତିରେ ମା’ ପୁଅ ବିଷ ପିଇ ଦେଇଥିଲେ। ରାତିରେ ପୁଅଙ୍କ ମୃତ୍ୟୁ ଘଟିଥିବା ବେଳେ ଶନିବାର ସକାଳେ ମା’ଙ୍କ ମୃତ୍ୟୁ ଘଟିଛି। ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
