ନୂଆଦିଲ୍ଲୀ,୭।୧୧(ଆଇଏଏନ୍ଏସ୍):କଶ୍ମୀର ଉପତ୍ୟକାରେ ଗତ ୩୦ ବର୍ଷ ମଧ୍ୟରେ ୫ ହଜାରରୁ ଅଧିକ ରାଜନୈତିକ ନେତା ଓ କର୍ମକର୍ତ୍ତାଙ୍କୁ ହତ୍ୟା କରାଯାଇଛି। ୧୯୮୯ରୁ ୨୦୧୯ ମଧ୍ୟରେ ପାକ୍ ସମର୍ଥିତ ଆତଙ୍କବାଦୀଙ୍କ ଦ୍ୱାରା ଏଭଳି କାଣ୍ଡ ରଚାଯାଇଛି। ତେବେ ୨୦୦୦ ମସିହାରେ ଭାଜପାର ୮ ଜଣଙ୍କୁ ମିଶାଇ ମୋଟ ୧୦ ଜଣଙ୍କୁ ହତ୍ୟା କରାଯାଇଥିବା ଜଣାପଡ଼ିଛି। ପୂର୍ବରୁ କୌଣସି ରାଜନୈତିକ ହତ୍ୟାକାଣ୍ଡ ପରେ ଆତଙ୍କବାଦୀ ଗୋଷ୍ଠୀ ପକ୍ଷରୁ ନିଜକୁ ଦାୟୀ କରାଯାଉଥିଲା। ଏବେ ଆଉ ପ୍ରାୟ ସେଭଳି ଘଟୁନି କି ସେଭଳି ପ୍ରତିକ୍ରିୟା ପ୍ରକାଶ ପାଉନାହିଁ।
୧୯୮୯ ଅଗଷ୍ଟ ୨୧ରେ ନ୍ୟାଶନାଲ କନ୍ଫରେନ୍ସର କର୍ମକର୍ତ୍ତା ମହମ୍ମଦ ୟୁସୁଫ ହଲ୍ଓ୍ବାଇଙ୍କୁ ହତ୍ୟା କରାଯାଇଥିଲା। ପରେ ଭାରତୀୟ ଜନସଂଘ ନେତା ଟିକାଲାଲ୍ ଟାପ୍ଲୁଙ୍କୁ ଶ୍ରୀନଗରରେ ଗୁଳିମାଡ଼ କରାଗଲା। ସ୍ବାଧୀନ ବିଧାୟକ ମୀର୍ ମୁସ୍ତାଫାଙ୍କୁ ଅପହରଣ ପରେ ହତ୍ୟା କରାଯାଇଥିଲା। ସିପିଆଇ ନେତା ଅବ୍ଦୁଲ ସତାର ରଞ୍ଜୁରଙ୍କୁ ମାର୍ଚ୍ଚ ୧୯୯୦ରେ ଟାର୍ଗେଟ କରାଗଲା। ପୂର୍ବତନ ମନ୍ତ୍ରୀ ଶେଖ୍ ଜାବର, ପୂର୍ବତନ ବିଧାୟକ ଶେଖ୍ ମନ୍ସୁର, ପୂର୍ବତନ ବିଧାୟକ ଗୁଲାମ୍ କାଦିର ଓ୍ବାନି ଓ ତାଙ୍କ ପୁଅ ତଥା ପୂର୍ବତନ ବିଧାୟକ ନାଜିର ଅହମଦ ଓ୍ବାନିଙ୍କୁ ହତ୍ୟା କରାଯାଇଥିଲା। ପୂର୍ବତନ ବିଧାୟକ ପୀର ମହମଦ ସାଫି, ମୋହମ୍ମଦ ଶୁଭମ୍ ଭଟଙ୍କୁ ୧୯୯୧ରେ ଗୁଳିମାଡ଼ କରାଯାଇଥିଲା। ୧୯୯୦ରେ ମୀରଓ୍ବରଇଜ ଫାରୁକ ଓ ୧୯୯୪ରେ ନାସିର ଅହମଦଙ୍କୁ ହତ୍ୟା କରାଗଲା। ବିଚ୍ଛିନ୍ନତାବାଦୀ ନେତା ଓ ସରକାର ଏଥିଲାଗି ପରସ୍ପରକୁ ଦୋଷାରୋପ କରିଥିଲେ। ପରେ ଭାଜପା ନେତା ଗୁଲାମ କାଦିର, ବାନ୍ଦିପୋରାରେ ବାପା ଓ ଭାଇଙ୍କ ସହ ଭାଜପା ନେତା ଶେଖ୍ ଓ୍ବାସିମ୍ ବାରି, କଂଗ୍ରେସ ସରପଞ୍ଚ ଅଜୟ ପଣ୍ଡିତାଙ୍କୁ ଲାର୍କିପୋଡାରେ ହତ୍ୟା କରାଯାଇଥିଲା। ଭାଜପା ସରପଞ୍ଚ ଶେଖ୍ ସାଜାଦ୍ ଅହମଦ, ଅବଦୁଲ ହମିର ନାଜ୍ଜାରଙ୍କୁ ଗୁଳିମାଡ଼ କରାଯାଇଥିଲା। ପୂର୍ବତନ ମନ୍ତ୍ରୀ ଓ୍ବାଲି ମୋହମ୍ମଦ ଇତୁ, ପୂର୍ବତନ ବିଧାୟକ ଗୁଲାମ୍ ନବୀ ଦରଙ୍କୁ ୧୯୯୪ରେ ହତ୍ୟା କରାଯାଇଥିଲା। ୧୯୯୬ରେ ନ୍ୟାଶ୍ନାଲ କନ୍ଫରେନ୍ସ କ୍ଷମତାକୁ ଆସିବା ପରେ ବିଧାୟକ ଅବ୍ଦୁଲ ଆହଦଓ୍ବାନି, ଗୁଲାମ ହାସନ ଭଟ, କଂଗ୍ରେସ ନେତା ଆଗା ସୟେଦ ମେହଦିଙ୍କୁ ଗୁଳିକରି ହତ୍ୟା କରାଯାଇଥିଲା। ୨୦୦୨ରେ ମନ୍ତ୍ରୀ ମୁସ୍ତାକ ଅହମଦ ଲୋନ, ୨୦୦୪ରେ ପୂର୍ବତନ ମନ୍ତ୍ରୀ ସଫ୍ଦର ଅଲି ବେଗ୍ଙ୍କୁ ଆତଙ୍କବାଦୀମାନେ ହତ୍ୟା କରିଥିଲେ। ଏହା ପରେ ବିଚ୍ଛିନ୍ନତାବାଦୀ ନେତା ତଥା ପିପୁଲ୍ସ କନ୍ଫରେନ୍ସ ଅଧ୍ୟକ୍ଷ ଅବ୍ଦୁଲ ଗନି ଲୋନ୍, ପିଡିପି ନେତା ଗୁଲାମ୍ ନବୀ ଲୋନ୍ଙ୍କ ସମେତ ଅନେକ ପଞ୍ଚାୟତ ସଦସ୍ୟଙ୍କୁ ହତ୍ୟା କରାଯାଇଛି। ବିଚ୍ଛିନ୍ନତାବାଦୀ ନେତା ଓ ସ୍ଥାନୀୟ ଯୁବକମାନେ ଆତଙ୍କବାଦୀଙ୍କ ସହ ଭିତିରି ସମ୍ପର୍କ ରଖି ଏଭଳି ହତ୍ୟାକାଣ୍ଡକୁ ପ୍ରୋତ୍ସାହନ ଦେଇଥିଲେ। ପରେ ବିଭିନ୍ନ ହାଇପ୍ରୋଫାଇଲ ନେତାଙ୍କୁ ଟାର୍ଗେଟ କରାଯାଇଥିଲା।
