ମେଲବୋର୍ନ,୧୭।୧୧: ଅଷ୍ଟ୍ରେଲିଆର କ୍ରିସ୍ମାସ ଦ୍ୱୀପରେ ୫ କୋଟିରୁ ଅଧିକ ଲାଲ୍ ରଙ୍ଗର ନରଭକ୍ଷୀ କଙ୍କଡ଼ା ଜମା ହୋଇଛନ୍ତି। କଙ୍କଡ଼ା ବ୍ରିଜ ପାର୍ ହୋଇ ରାସ୍ତାକ ପଳାଇ ଆସିଛନ୍ତି। ଏହାକୁ ନେଇ ଅଷ୍ଟ୍ରେଲିଆରେ ଥିବା ପର୍ଯ୍ୟଟକମାନେ ଆତଙ୍କିତ ହୋଇପଡ଼ିଛନ୍ତି। ଏହି କଙ୍କଡ଼ା ପ୍ରତିବର୍ଷ ଉତ୍ତର ପଶ୍ଚିମ ଅଷ୍ଟ୍ରେଲିଆର ଜଙ୍ଗଲରୁ ଜାତୀୟ ଉଦ୍ୟାନ କୂଳକୁ ଅଣ୍ଡା ଦେବାକୁ ଆସିଥାନ୍ତି। ଫଳରେ ସମ୍ପୂର୍ଣ୍ଣ ଦ୍ୱୀପ ଲାଲ ହୋଇଯାଇଥାଏ ।
ଏତେ ସଂଖ୍ୟକ ଲାଲ କଙ୍କଡ଼ା ଦେଖି ସେଠାରେ ଉପସ୍ଥିତ ପର୍ଯ୍ୟଟକ ଏବଂ ସ୍ଥାନୀୟ ଲୋକମାନେ ଦୂରରୂ ଭିଡିଓ ଏବଂ ଫଟୋ ଉଠାଇ ଏହାକୁ ସୋସିଆଲ୍ ମିଡ଼ିଆରେ ଅପଲୋଡ୍ କରିଛନ୍ତି। ଏସବୁ ଏବେ ଭାଇରାଲ ହେବାରେ ଲାଗିଛି। ଡକ୍ଟର ତାନିଆ ଡେଟ୍ଟୋ ଡେଲି ମେଲ ଅଷ୍ଟ୍ରେଲିଆକୁ କହିଛନ୍ତି ଯେ ୨୦୦୫ ପରଠାରୁ ପ୍ରଥମ ଥର ପାଇଁ ଏତେ ସଂଖ୍ୟକ କଙ୍କଡ଼ା ଏହି ଅଞ୍ଚଳକୁ ଆସିଛନ୍ତି। ସେ କହିଛନ୍ତି ଯେ ୫ କୋଟିରୁ ଅଧିକ କଙ୍କଡ଼ା ନିୟନ୍ତ୍ରଣ କରିବା ଲାଗି ସ୍ଥାନୀୟ ପରିବେଶ୍ବିତ୍ଙ୍କୁ କଠିନ ପରିଶ୍ରମ କରିବାକୁ ପଡୁଛି। ଯାହା ଦ୍ୱାରା ସେମାନେ ଫ୍ଲାଇଙ୍ଗ ଫିସ କୋଭ ପର୍ଯ୍ୟନ୍ତ ସୁରକ୍ଷିତ ଭାବେ ଯାତ୍ରା ଶେଷ କରିପାରିବେ।
ତାନିଆ କହିଛନ୍ତି ଯେ କିଛି କଙ୍କଡ଼ା କେତେକ ଲୋକଙ୍କ କୋଠାଘର ଉପରକୁ ମଧ୍ୟ ଚଢ଼ିଛନ୍ତି। ପ୍ରତିବର୍ଷ ଅକ୍ଟୋବର କିମ୍ବା ନଭେମ୍ବର ମାସରେ ପ୍ରଥମ ବର୍ଷା ପରେ ଏହି କଙ୍କଡାମାନେ ଅଣ୍ଡା ଦେବାକୁ ସ୍ଥଳଭାଗ ମୁହାଁ ହୋଇଥାନ୍ତି।
ଭାରତ ମହାସାଗରରେ ଆଗାମୀ ୫-୬ ଦିନ ଧରି ମାଈ କଙ୍କଡ଼ା ଅଣ୍ଡା ଦେବେ ବୋଲି ପରିବେଶ୍ବିତ୍ କହିଛନ୍ତି। ଗୋଟିଏ ମାସ ପରେ, ଅଣ୍ଡାରୁ ଛୋଟଛୋଟ ଲାଲ୍ କଙ୍କଡ଼ା ବାହାରି ସମୁଦ୍ର ମୁହାଁ ହେବେ। ତେବେ ସମୁଦ୍ରର ଅଧିକାଂଶ କଙ୍କଡାଙ୍କୁ କ୍ରିସ୍ମାସ୍ ଦ୍ୱୀପକୁ ଯିବା ବାଟରେ ମାଛ ଏବଂ ସାର୍କ ଖାଇ ଦେଇଥାନ୍ତି। ଏହି ଦୃଶ୍ୟକୁ ଦେଖିବାକୁ ପ୍ରତିବର୍ଷ ପୃଥିବୀର ବିଭିନ୍ନ ସ୍ଥାନରୁ ବହୁ ସଂଖ୍ୟାରେ ପର୍ଯ୍ୟଟକ ଏଠାରେ ପହଞ୍ଚିଥାନ୍ତି।
