ଖୋର୍ଦ୍ଧା ଅଫିସ,୨୯।୧: ଖୋର୍ଦ୍ଧା ଜିଲା ଜଟଣୀ ଫ୍ଲାଏ ଓଭରବ୍ରିଜ ନିର୍ମାଣ ଲାଗି ଅଧିକ ଜମିର ଆବଶ୍ୟକତା ରହିଛି। ଏଥିଲାଗି ସୀତାରାମ ଛକର ୧୪୦ରୁ ଊର୍ଦ୍ଧ୍ୱ ଦୋକାନୀଙ୍କୁ ଉଚ୍ଛେଦ କରାଯାଇଛି। ଜିଲା ପ୍ରଶାସନ ନିର୍ଦ୍ଦେଶକ୍ରମେ ଦୋକାନୀମାନେ ନିଜ ହାତରେ ନିଜ ଦୋକାନକୁ ଭାଙ୍ଗିଛନ୍ତି। ଦୀର୍ଘ ବର୍ଷ ଧରି ସୀତାରାମ ଛକର ଉଭୟ ପାର୍ଶ୍ୱରେ ଦୋକାନ ଦେଇ ନିଜ ପିଲାଛୁଆଙ୍କ ଭବିଷ୍ୟତ ଗଢିବାର ସ୍ବପ୍ନ ଦେଖିଥିବା ବହୁ ବ୍ୟବସାୟୀଙ୍କ ଆଶା ଏବେ ମାଟିରେ ମିଶିଛି। ଭଗ୍ନ ଦୋକାନର ମାଟିରେ ବସି ଅତୀତର ସ୍ମୃତିକୁ ସାଉଁଟି କଇଁ କଇଁ କାନ୍ଦୁଥିବା ଦେଖିବାକୁ ମିଳିଛି। ପ୍ରଶାସନ ଦେଇଥିବା ପ୍ରତିଶ୍ରୁତି ପାଳନ କରୁ ବୋଲି ଅନେକ ବ୍ୟବସାୟୀ ଗଣମାଧ୍ୟମ ଆଗରେ କହିଛନ୍ତି। ପୂର୍ବରୁ ଫ୍ଲାଏ ଓଭରବ୍ରିଜ ନିର୍ମାଣ ଲାଗି ୫ଶହରୁ ଊର୍ଦ୍ଧ୍ୱ ବ୍ୟବସାୟୀ ଉଚ୍ଛେଦ ହୋଇଥିଲେ। ଏପର୍ଯ୍ୟନ୍ତ ସେମାନଙ୍କୁ ଥଇଥାନ କରାଯାଇନାହିଁ। ଏବେ ପୁଣି ଉଚ୍ଛେଦ ବେଳେ ଜିଲା ପ୍ରଶାସନ ଅନୁରୂପ ଭାବେ ଥଇଥାନ ପ୍ରତିଶ୍ରୁତି ଦେଇଛି।
ପ୍ରକାଶ ଯେ, ଜଟଣୀ ସହରରେ ଟ୍ରାଫିକ ସମସ୍ୟା ଦିନକୁ ଦିନ ବଢିବାରେ ଲାଗିଛି। ବିଶେଷତଃ ସୀତାରାମ ଛକଠାରୁ କୁଦିଆରୀ ଛକ ପର୍ଯ୍ୟନ୍ତ ଟ୍ରାଫିକ ସମସ୍ୟା ସୃଷ୍ଟି ହେଉଛି। ଏହାକୁ ଏଡାଇବା ଲାଗି ଏଠାରେ ଫ୍ଲାଏ ଓଭରବ୍ରିଜ ନିର୍ମାଣ ଲାଗି ବିଭିନ୍ନ ମହଲରେ ଦାବି ହୋଇଥିଲା। ପରେ ଓଭରବ୍ରିଜ ନିର୍ମାଣ ଲାଗି ପ୍ରକ୍ରିୟା ଆରମ୍ଭ ହୋଇ ଟେଣ୍ଡର ହୋଇଥିଲା। ତେବେ ନିର୍ମାଣ କାର୍ଯ୍ୟରେ ଉଭୟ ପାର୍ଶ୍ୱରେ ରହିଥିବା ଦୋକାନ ବାଧକ ସାଜିଥିଲା। ପ୍ରଥମ ପର୍ଯ୍ୟାୟରେ କୁଦିଆରୀ ଛକ, ବଡବଜାର ଛକର ଉଭୟ ପାର୍ଶ୍ୱରୁ ଦୋକାନ ହଟାଗଲା। ଏବେ ପୁଣି ଅନ୍ୟ ଦୋକାନୀଙ୍କୁ ଉଚ୍ଛେଦ କରାଯାଇଛି। ଅନ୍ୟପଟେ ଓଭରବ୍ରିଜ ନିର୍ମାଣରେ ନିମ୍ନମାନର କାମ ଏବଂ ଅନିୟମିତତା ନେଇ ପ୍ରଥମେ ଠିକା ନେଇଥିବା କମ୍ପାନୀକୁ ହଟାଯାଇ ଅନ୍ୟ ଏକ କମ୍ପାନୀକୁ ଦିଆଯାଇଛି। ୫୪ କୋଟିରୁ ଆରମ୍ଭ ହୋଇ ଏହି କାର୍ଯ୍ୟ ୧୦୦ କୋଟିର ବଜେଟରେ ପହଞ୍ଚିଲାଣି। ମନ୍ଥରତା ଓ ଜମି ଉଚ୍ଛେଦ ପ୍ରକ୍ରିୟା ଶିଥିଳତା ଯୋଗୁ କାର୍ଯ୍ୟ ଆଗେଇ ପାରୁନାହିଁ। ଏହି ଓଭରବ୍ରିଜ ନିର୍ମାଣ ହେଲେ ଖୋର୍ଦ୍ଧା ଓ ପୁରୀ ମଧ୍ୟରେ ଯାତାୟାତ ସହଜ ହେବା ସହ ଟ୍ରାଫିକ ସମସ୍ୟା ଦୂର ହେବ। ବ୍ୟବସାୟିକ ଅଭିବୃଦ୍ଧି ମଧ୍ୟ ଘଟିବ। ଅନ୍ୟପକ୍ଷରେ ପୂର୍ବରୁ ଉଚ୍ଛେଦ ଦୋକାନୀଙ୍କୁ ଥଇଥାନ ଲାଗି ପ୍ରସ୍ତାବ ରହିଥିଲେ ମଧ୍ୟ ଅଦ୍ୟାବଧି ଏହାକୁ କାର୍ଯ୍ୟକାରୀ କରାଯାଇନାହିଁ। ପ୍ରଶାସନର ନାଲିଫିତା ତଳେ ଏହା ଚାପି ହୋଇ ରହିଛି ବୋଲି ବହୁ ଉଚ୍ଛେଦ ଦୋକାନୀ ଗଣମାଧ୍ୟମ ଆଗରେ କହିଛନ୍ତି। ଜଟଣୀ ବ୍ୟବସାୟୀ ମହାସଂଘ ସଭାପତି ସୁଦର୍ଶନ ସୁନ୍ଦରାୟ କହିଛନ୍ତି, ପ୍ରଶାସନ ପକ୍ଷରୁ ଥଇଥାନ ନେଇ ବ୍ୟବସାୟୀମାନଙ୍କୁ କୌଣସି ନିର୍ଭର ପ୍ରତିଶ୍ରୁତି ଦିଆଯାଇନାହିଁ। ପ୍ରଶାସନ ପ୍ରଥମେ ବ୍ୟବସାୟୀଙ୍କ ଥଇଥାନ କଥାକୁ ଗୁରୁତ୍ୱ ଦେବା ଆବଶ୍ୟକ। ସେହିପରି ବିଧାୟକ ସୁରେଶ କୁମାର ରାଉତରାୟ କହିଛନ୍ତି, ଉଚ୍ଛେଦ ହେବାକୁ ଥିବା ଦୋକାନୀମାନଙ୍କ ଥଇଥାନ ନେଇ ପୂର୍ବରୁ ଜିଲାପାଳଙ୍କ ସହ ଆଲୋଚନା କରାଯାଇଛି। ସେମାନଙ୍କ ପେଟପାଟଣା କଥା ଚିନ୍ତା କରି ପଦକ୍ଷେପ ନେବାକୁ ପ୍ରଶାସନକୁ କହିଛି। ଅନ୍ୟପକ୍ଷରେ ସୀତରାମ ଛକରୁ ଉଚ୍ଛେଦ ହେବାକୁ ଥିବା ବ୍ୟବସାୟୀମାନଙ୍କ ଥଇଥାନ ଲାଗି ବ୍ୟବସ୍ଥା କରାଯିବ
ବୋଲି ଜିଲାପାଳ ସନତ ମହାନ୍ତି କହିଛନ୍ତି।
