ଖୋର୍ଦ୍ଧା/ବେଗୁନିଆ,୧୫ା୧୦(ପ୍ରଭାତ ପାଣିଗ୍ରାହୀ/ହର ପ୍ରସନ୍ନ ପଣ୍ଡା)ଆଗକୁ ଆସୁଛି ଦଶହରା ଓ ଆଲୋକର ପର୍ବ ଦୀପାବଳି। ଏଥିପାଇଁ ବିଭିନ୍ନ ସ୍ଥାନରେ ଏବେଠୁ ବାଣ ବିକ୍ରି ଚାଲିଲାଣି। ତେବେ ବେଆଇନ ଭାବେ ବାଣ ପ୍ରସ୍ତୁତ ହେଉଥିବା ଖୋର୍ଦ୍ଧା ଜିଲା ବେଗୁନିଆ ଥାନା ଅଧୀନ କଣ୍ଟାବାଡ଼ ସ୍ଥିତ ମୁକୁନ୍ଦପୁର ଗ୍ରାମରେ ଶନିବାର ପୋଲିସ ଚଢ଼ାଉ କରି ଜଣେ ବ୍ୟବସାୟୀଙ୍କୁ ଗିରଫ କରିଛି। ସେ ହେଲେ ବିଶ୍ୱନାଥ ମହାପାତ୍ର। ଆତସବାଜି ପ୍ରସ୍ତୁତ ହେଉଥିବା କୋଠରିରୁ ୨୫ କେଜି ବାରୁଦ ସହିତ ୧୨ଲକ୍ଷରୁ ଊର୍ଦ୍ଧ୍ୱ ଟଙ୍କାର ବିଭିନ୍ନ ପ୍ରକାର ବାଣ ଜବତ କରାଯାଇଛି। ଏ ସମ୍ପର୍କରେ ପୋଲିସ ଏକ ମାମଲା (ନଂ.୩୬୪/୨୩) ରୁଜୁକରି ଅଧିକ ତଦନ୍ତ ଚଳାଇଛି।
ସୂଚନା ମୁତାବକ, ମୁକୁନ୍ଦପୁର ଗ୍ରାମରେ ବେଆଇନ ଭାବେ ବାଣ ପ୍ରସ୍ତୁତ ହେଉଥିବା ନେଇ ପୋଲିସକୁ ସୂଚନା ମିଳିଥିଲା। ଏହା ପରେ ଏସ୍ପି ସିଦ୍ଧାର୍ଥ କଟ୍ଟାରିଆ ଓ ଏସ୍ଡିପିଓ ଦିଲୀପ ଦାସଙ୍କ ନିର୍ଦ୍ଦେଶକ୍ରମେ ବେଗୁନିଆ ଥାନା ଅଧିକାରୀ ବିଶ୍ବଜିତ୍ ରାଉତରାୟଙ୍କ ସମେତ ଅନ୍ୟ କର୍ମଚାରୀଙ୍କୁ ନେଇ ଏକ ଟିମ୍ ଗଠନ କରାଯାଇଥିଲା। ଏହି ଟିମ୍ ଶନିବାର ସକାଳେ ମୁକୁନ୍ଦପୁର ଗ୍ରାମର ବିଶ୍ୱନାଥଙ୍କ ଘରେ ଚଢ଼ାଉ କରିଥିଲା। ଏକ କୋଠରିରେ ଗଚ୍ଛିତ ଥିବା ଭଳିକି ଭଳି ହାତ ତିଆରି ଧପିଧପି, କୁମ୍ପି ବାଣ, ବାଡିଆ ବାଣ, ଝରଝରି ଆଦି ୫୦ପେଟିରୁ ଊର୍ଦ୍ଧ୍ୱ ବିଭିନ୍ନ ପ୍ରକାର ବାଣ ଜବତ କରିଥିଲା। ଏଥିସହ ବାଣ ପ୍ରସ୍ତୁତ ପାଇଁ ଥିବା ବାରୁଦ ୨୫କେଜି ଜବତ ହୋଇଛି। ଜବତ ବାଣଗୁଡିକୁ ଦୁଇଟି ମିନି ଟ୍ରକ୍ରେ ଥାନାକୁ ଅଣାଯାଇଛି। ଉକ୍ତ ବେଆଇନ କାର୍ଯ୍ୟରେ ସମ୍ପୃକ୍ତ ଥିବାରୁ ବିଶ୍ୱନାଥଙ୍କୁ ଗିରଫ କରାଯାଇଛି। ଏହି ଚଢ଼ାଉରେ ଏସ୍ଆଇ ଉମାକାନ୍ତ ବେହେରା, ଏଏସ୍ଆଇ ଜେ.ପୂଜାରୀ, ପି.କେ. ଆଚାର୍ଯ୍ୟ, ଏମ୍. ବେହେରା, ବି.ବଳବନ୍ତରାୟ, ପି.କେ. ବେହେରା ପ୍ରମୁଖ ସାମିଲ ଥିଲେ। ସୂଚନାଥାଉ କି, ୨୦୨୦ ଅଗଷ୍ଟ ୧୬ରେ ବିଶ୍ବନାଥଙ୍କ ଘରେ ବାଣ ପ୍ରସ୍ତୁତ ବେଳେ ବଡ଼ଧରଣର ଅଘଟଣ ଘଟିଥିଲା। ୪ରୁ ୫ ବଖରା ଘର କ୍ଷତିଗ୍ରସ୍ତ ହୋଇଥିଲା। ବେଗୁନିଆ ପୋଲିସ ପହଞ୍ଚି ବିଶ୍ୱନାଥଙ୍କ ଘରୁ ୨ଲକ୍ଷ ଟଙ୍କାର ବାଣ ଜବତ କରିଥିଲା। ବେଆଇନ ବାଣ ପ୍ରସ୍ତୁତ ଓ ବିକ୍ରି କରୁଥିବା ଅଭିଯୋଗରେ ଥାନାରେ ଏକ ମାମଲା (ନଂ.୧୬୬/୨୦) ରୁଜୁ ହୋଇଥିଲା। ତେବେ ପୁଣି ୩ବର୍ଷ ପରେ ବିଶ୍ୱନାଥଙ୍କ ଘରୁ ୧୨ଲକ୍ଷ ଟଙ୍କାର ବିଭିନ୍ନ ପ୍ରକାର ବାଣ ଏବଂ ବାରୁଦ ଜବତ କରାଯାଇଛି।
