କଟକ, ୨୫ା୪(ଶିଳ୍ପା ପ୍ରିୟଦର୍ଶିନୀ)ଆସନ୍ତା ନିର୍ବାଚନ ପାଇଁ ବାରବାଟୀ-କଟକ କଂଗ୍ରେସକୁ ଚିନ୍ତା ଘାରିଛି। ବରିଷ୍ଠ କଂଗ୍ରେସ ନେତା ଇଂ. ମହମ୍ମଦ ମୋକିମଙ୍କ ଜାମିନକୁ ସୁପ୍ରିମକୋର୍ଟ ମଞ୍ଜୁର କରିଛନ୍ତି ହେଲେ ନିମ୍ନ ଅଦାଲତଙ୍କ ରାୟ ନେଇ ସୁପ୍ରିମକୋର୍ଟ ସ୍ଥଗିତାଦେଶ କଦେଇନାହାନ୍ତି। ଏନେଇ ବୁଧବାର କଟକ ସେଲ୍ଟର ଛକସ୍ଥିତ କଂଗ୍ରେସ କାର୍ଯ୍ୟାଳୟରେ କର୍ମୀଙ୍କୁ ନେଇ ସକାଳେ ବୈଠକ ହୋଇଥିଲା। ଏଥିରେ ବରିଷ୍ଠ ନେତୃବୃନ୍ଦ ଓ କର୍ମୀମାନେ ଯୋଗଦେଇଥିଲେ। ମୋକିମ ନିର୍ବାଚନ ଲଢ଼ିପାରିବେନି ବୋଲି ସ୍ପଷ୍ଟ ହେବା ପରେ ଏହି ବୈଠକ ହୋଇଥିଲା। ସନ୍ଧ୍ୟାରେ ସମସ୍ତ କର୍ମୀଙ୍କୁ ନେଇ ଅନୁରୂପ ବୈଠକ ବସିଥିଲା। ଏଥିରେ ମୋକିମଙ୍କ ଝିଅ ସୋଫିଆ ଫିରଦୋସ୍ ଯୋଗଦେଇ ନିର୍ବାଚନ ସମ୍ପର୍କରେ ଆଲୋଚନା କରିଛନ୍ତି। ବୈଠକରେ କର୍ମୀମାନେ ସୋଫିଆଙ୍କୁ ସମ୍ବର୍ଦ୍ଧିତ କରି ସ୍ବାଗତ ଜଣାଇଛନ୍ତି। ବୈଠକରେ ମୋକିମ କର୍ମୀମାନଙ୍କୁ କଂଗ୍ରେସର ଗଡ଼ ବଞ୍ଚାଇବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ଏଭଳି ସମୟରେ କର୍ମୀମାନେ ଏକ୍ଜୁଟ ହୋଇ କଟକର ଝିଅ ଓ ବୋହୂଙ୍କୁ ଆପଣାଇଥିବାରୁ ଧନ୍ୟବାଦ ଜଣାଇଛନ୍ତି। ସେହିପରି ସୋଫିଆ କହିଛନ୍ତି, ଏଭଳି ସମୟରେ କଂଗ୍ରେସ ସହ ଯୋଡି ହୋଇଥିବାରୁ ହୃଦୟରୁ ଧନ୍ୟବାଦ ଜଣାଉଛି। କଟକରେ ମୋ ଜନ୍ମ ଏବଂ କଟକର ମୁଁ ବୋହୂ। ପୂର୍ବରୁ ବାପାଙ୍କ ପାଇଁ ପ୍ରଚାର କରୁଥିଲି। ସେଥିପାଇଁ ରାଜନୀତିରେ ମୁଁ ନୂଆ ନୁହେଁ। କର୍ମୀମାନେ ନେଇଥିବା ନିଷ୍ପତ୍ତିକୁ ଗ୍ରହଣ କଲି, ବାକି ନିଷ୍ପତ୍ତି ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନେବେ। ଚଳିତ ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କୁ ଡବଲ ମାର୍ଜିନ୍ରେ ଜିତାଇବା ପାଇଁ ସଂକଳ୍ପ ନେବା ବୋଲି ସୋଫିଆ କହିଛନ୍ତି। ଅପରପକ୍ଷରେ ମୋକିମ କହିଛନ୍ତି, ବୈଠକରେ କର୍ମୀମାନେ ସୋଫିଆଙ୍କ ନଁା ପ୍ରସ୍ତାବ ଦେଇଛନ୍ତି। ଏ ସମ୍ପର୍କରେ ପିସିସି ସଭାପତିଙ୍କୁ ଅବଗତ କରାଯିବ। ସେ ଯାହା ନିଷ୍ପତ୍ତି ନେବେ ସେଥିରେ ଆମେ ସହମତ ହେବୁ। କଂଗ୍ରେସ ପାଇଁ ଦୀର୍ଘ ସମୟ ହେବ କାମ କରିଆସୁଛି, ଆଗକୁ ମଧ୍ୟ କରିବି। କଟକ ସହରରେ ନିର୍ବାଚନ ଏକପାଖିଆ ହେବା ସୁନିଶ୍ଚିତ ବୋଲି ମୋକିମ କହିଛନ୍ତି। ଏହି ବୈଠକରେ ପୂର୍ବତନ ନଗର କଂଗ୍ରେସ ସଭାପତି ଗିରିବାଳା ବେହେରା, ବରିଷ୍ଠ ନେତ୍ରୀ ଶୈଳଭାମା ଜେନା, ଚାରୁଲତା ସାହୁ, କର୍ପୋରେଟର ସନ୍ତୋଷ କୁମାର ଭୋଳ, ଜନାର୍ଦ୍ଦନ ପରିଡା, ଲିଜାରାଣୀ ମହାପାତ୍ର, କଟକ ଜିଲା ମହିଳା ସଭାପତି ଅମ୍ରିତା ଦାସଙ୍କ ସମେତ ବହୁ କର୍ମୀ ଉପସ୍ଥିତ ଥିଲେ।
