ନୂଆଦିଲ୍ଲୀ,୧୭।୧ : ମଙ୍ଗଳବାର ଦଳର ଜାତୀୟ କାର୍ଯ୍ୟକାରିଣୀ ବୈଠକରେ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଭାରତର ଜି-୨୦ର ଅଧ୍ୟକ୍ଷତା ଉପରେ ଏକ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାରର ଗତ ନଅ ବର୍ଷ ମଧ୍ୟରେ ସାରା ବିଶ୍ୱରେ ଦେଶର ଭାବମୂର୍ତ୍ତିକୁ ପରିବର୍ତ୍ତନ କରିଛନ୍ତି।
ସରକାରଙ୍କ କଲ୍ୟାଣ ଯୋଜନା ଦ୍ୱାରା କୋଟି କୋଟି ଲୋକ ଉପକୃତ ହୋଇଛନ୍ତି। କରୋନା ମହାମାରୀ ସମୟରେ ମୋଦି ସରକାରଙ୍କ ଉପଯୋଗୀ ପଦକ୍ଷେପ ଦ୍ୱାରା ଦେଶର ବଡ଼ ବିପଦରୁ ମୁକୁଳି ପାରିଛି। ମୋଦି ସରକାରଙ୍କ କରୋନା ନିୟନ୍ତ୍ରଣ କାର୍ଯ୍ୟକୁ ବିଶ୍ୱସ୍ତରରେ ପ୍ରଶଂସା କରାଯାଉଥିବା ସେ କହିଛନ୍ତି।
ମହାମାରୀ ସମୟରେ ଦେଶ ନିଜର ସୁରକ୍ଷା କରିବା ସହିତ ଅନ୍ୟ ଦେଶଙ୍କୁ ମଧ୍ୟ ଆବଶ୍ୟକ ମାନବୀୟ ସହାୟତା ଯୋଗାଇ ଦେଇଛି। ସେହିପରି ଦେଶ ନିଜର ଅର୍ଥ ବ୍ୟବସ୍ଥାକୁ ସୁଦୃଢ଼ କରିବାରେ ସଫଳ ରହିଛି ବୋଲି ସେ କହିଛନ୍ତି।
