ଖରାପ ବିଷୟବସ୍ତୁ ଅଥବା ନିୟମ ଉଲ୍ଲଂଘନ କରିବାର କାରଣରୁ ସୋସିଆଲ ମିଡିଆରେ କାହାକୁ ବାରଣ କରାଯିବା କଥା ଆପଣ ଶୁଣିଥାଇପାରନ୍ତି। ହେଲେ ବେଶି ସୁନ୍ଦର ହେବା ଯୋଗୁ ଜଣେ ମଡେଲଙ୍କୁ ଡେଟିଂ ଆପ୍ ଟିଣ୍ଡର ବାରମ୍ବାର ତାଙ୍କ ଅଫିସିଆଲ ଆକାଉଣ୍ଟକୁ ବାରଣ କରୁଛି। ନିଜର ସୌନ୍ଦର୍ଯ୍ୟ ଯୋଗୁ ତାଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି ବୋଲି ମଡେଲଜଣଙ୍କ କୁହନ୍ତି। ସେ ହେଲେ ୨୧ ବର୍ଷୀୟ ଇନ୍ଷ୍ଟାଗ୍ରାମ ମଡେଲ ଲୁନା ବେନା।
ଲୁନା ନିଜ ଆକାଉଣ୍ଟରେ ଲେଖିଛନ୍ତି, ମୁଁ ବହୁତ ହଟ୍। ଏଣୁ ଟିଣ୍ଡରରେ ଅନେକ ଅଦ୍ଭୁତ ଏବଂ ନିର୍ବୋଧ ବାର୍ତ୍ତା ପାଇଛି। ବହୁତ ଆକର୍ଷଣୀୟ ହୋଇଥିବା ଯୋଗୁ ଟିଣ୍ଡର ବାରମ୍ବାର ମୋ ଆକାଉଣ୍ଟକୁ ବାରଣ କରୁଛି। ୨୦୧୭ରେ ଏହି ଆପ୍ ସହ ମୁଁ ଯୋଡ଼ି ହୋଇଥିଲେ। ଏହାର କିଛି ଦିନ ପରେ ଲୋକେ ମୋ ଫଟୋ ଚୋରି କରି ନକଲି ଆକାଉଣ୍ଟ କରିବା ଆରମ୍ଭ କଲେ। ଏପରିକି ସୁନ୍ଦରତାକୁ ନେଇ ମୋତେ ଧମକ ମଧ୍ୟ ମିଳିଲା। ନକଲି ଆକାଉଣ୍ଟଗୁଡ଼ିକ ବିଷୟରେ ଅଭିଯୋଗ କରିବା ପରେ ତାଙ୍କୁ ବ୍ଲକ କରିଦିଆଯାଇଥିବା ଲୁନା ଅଭିଯୋଗ କରିଛନ୍ତି।
ରିପୋର୍ଟ ମୁତାବକ ଲୁନାଙ୍କ ନାମରେ ଅସଂଖ୍ୟ ନକଲି ଆକାଉଣ୍ଟ ସୃଷ୍ଟି ହୋଇଛି। ଟିଣ୍ଡର କେଉଁଟି ସତ କେଉଁଟି ନକଲି ତାହା ଚିହ୍ନଟ କରିବାରେ ଅସମର୍ଥ । ତେଣୁ ତାଙ୍କ ଆକାଉଣ୍ଟ ବ୍ଲକ ରହୁଛି।
ଲୁନାଙ୍କ ଲୋକପ୍ରିୟତାକୁ ଯଦି ଦେଖାଯାଏ ତେବେ ଇନ୍ଷ୍ଟାରେ ତାଙ୍କର ୧.୨ ମିଲିୟନ ଲୋକେ ଫଲୋ କରନ୍ତି। ତାଙ୍କର ଫଟୋରେ ଲକ୍ଷ ଲକ୍ଷ ଲୋକ ଲାଇକ୍ ଏବଂ କମେଣ୍ଟ କରନ୍ତି।
