ଆଇଜଲ, ୧୦।୭: ମିଜୋରାମ ଗୃହମନ୍ତ୍ରୀ ଲାଲଚାମାଲିଆନା ସୋମବାର କହିଛନ୍ତି ଯେ, ରାଜ୍ୟ ସରକାରଙ୍କୁ ହିଂସା ପ୍ରଭାବିତ ମଣିପୁରର ୧୨,୩୦୦ରୁ ଅଧିକ ଆଭ୍ୟନ୍ତରୀଣ ବିସ୍ଥାପିତ ଲୋକଙ୍କୁ ରିଲିଫ ଯୋଗାଇବା ପାଇଁ କେନ୍ଦ୍ର ପକ୍ଷରୁ କୌଣସି ସହାୟତା ପାଇନାହାଁନ୍ତି। ନିଜ ରାଜ୍ୟରେ ଜାତିଗତ ହିଂସା କାରଣରୁ ଆଶ୍ରୟ ନେଇଥିବା ପଡୋଶୀ ମଣିପୁରର ଲୋକଙ୍କୁ ସହାୟତା ଯୋଗାଇବା ପାଇଁ ମିଜୋରାମ ସରକାର କେନ୍ଦ୍ରରୁ ୧୦ କୋଟି ଟଙ୍କା ମାଗିଥିଲେ।
ସେ କହିଛନ୍ତି, ମୁଖ୍ୟମନ୍ତ୍ରୀ ଜୋରାମଥାଙ୍ଗା ଉଭୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ମେ’ରେ ଚିଠି ଲେଖି ବିସ୍ଥାପିତ ଲୋକଙ୍କ ପାଇଁ ୧୦ କୋଟି ଟଙ୍କା ସହାୟତା ମାଗିଥିଲେ। ସେ କହିଛନ୍ତି, ପର୍ଯ୍ୟଟନ ମନ୍ତ୍ରୀ ରବର୍ଟ ରୋମାଭିଆ ରୋଏଟେଙ୍କ ନେତୃତ୍ୱରେ ଏକ ପ୍ରତିନିଧୀମଣ୍ଡଳ ଏବଂ ଗୃହ କମିଶନର ଏବଂ ସଚିବ ଏଚ ଲାଲେମାଭିଆଙ୍କ ସମେତ ଅନ୍ୟ ଅଧିକାରୀମାନେ ମଧ୍ୟ ଗତ ମାସରେ କେନ୍ଦ୍ର ଗୃହ ସଚିବ ଅଜୟ କୁମାର ଭଲ୍ଲାଙ୍କୁ ଭେଟିଥିଲେ।
ଲାଲଚାମାଲିଆନା କହିଛନ୍ତି, ଯଦିଓ ଦିଲ୍ଲୀର ରୋଏଟ ଏବଂ ଅନ୍ୟ ଅଧିକାରୀଙ୍କ ସହ ତାଙ୍କର ସାକ୍ଷାତ ସମୟରେ କେନ୍ଦ୍ର ଗୃହ ସଚିବ ଆମକୁ ସାହାଯ୍ୟ କରିବାକୁ ନିଶ୍ଚିତ କରିଥିଲେ, କିନ୍ତୁ ଆଜି ପର୍ଯ୍ୟନ୍ତ କୌଣସିି ସାହାଯ୍ୟ ଆମ ପାଖରେ ପହଞ୍ଚି ନାହିଁ କିମ୍ବା କେନ୍ଦ୍ରରୁ କୌଣସି ଯୋଗାଯୋଗ ହୋଇନାହିଁ।
