ଭୁବନେଶ୍ୱର, ୯।୯(ଅସମାପିକା ସାହୁ): ରାଜ୍ୟରେ ଆସନ୍ତା ୧୧ ତାରିଖରୁ ‘ଇଣ୍ଟେନ୍ସିଫାଏଡ୍ ମିଶନ ଇନ୍ଦ୍ରଧନୁଷ (ଆଇଏମ୍ଆଇ) ୫.୦’ ଅଭିଯାନ ଆରମ୍ଭ ହେବ। ୫ବର୍ଷ ବୟସ ପର୍ଯ୍ୟନ୍ତ ସମସ୍ତ ଶିଶୁ ଓ ଗର୍ଭବତୀ ମହିଳାଙ୍କୁ ଚିହ୍ନଟ ଏବଂ ପଞ୍ଜୀକରଣ କରି ଟିକାକରଣ କରିବା ହେଉଛି ଏହି ଅଭିଯାନର ମୂଳ ଲକ୍ଷ୍ୟ। ଆଇଏମ୍ଆଇ ୫.୦ ନଭେମ୍ବର ପର୍ଯ୍ୟନ୍ତ ତିନୋଟି ପର୍ଯ୍ୟାୟରେ କରାଯିବ ଓ ପ୍ରତି ପର୍ଯ୍ୟାୟ ଛଅ ଦିନ ରହିବ। ପ୍ରଥମ ପର୍ଯ୍ୟାୟ ୧୧ ରୁ ୧୬, ଦ୍ୱିତୀୟ ପର୍ଯ୍ୟାୟ ଅକ୍ଟୋବର ୯ରୁ ୧୪ ଏବଂ ତୃତୀୟ ପର୍ଯ୍ୟାୟ ନଭେମ୍ବର ୬ରୁ ୧୧ ପର୍ଯ୍ୟନ୍ତ ଚାଲିବ ବୋଲି ପରିବାର କଲ୍ୟାଣ ନିର୍ଦ୍ଦେଶକ ଡା. ବିଜୟ କୁମାର ପାଣିଗ୍ରାହୀ ସୂଚନା ଦେଇଛନ୍ତି। ଶୁକ୍ରବାର ପରିବାର କଲ୍ୟାଣ ନିର୍ଦ୍ଦେଶାଳୟ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଡା. ପାଣିଗ୍ରାହୀ କହିଛନ୍ତି, ୩୦ଟି ଜିଲାର ୩୧୪ଟି ବ୍ଲକ୍ରେ ଟିକା ନେଇ ନ ଥିବା କିମ୍ବା ଆଂଶିକ ଟିକା ନେଇଥିବା ୧,୦୪,୨୬୧ ଶିଶୁ ଏବଂ ୧୯,୮୯୬ ଗର୍ଭବତୀଙ୍କ ଟିକାକରଣ ସୁନିଶ୍ଚିତ କରାଯିବ। ୟୁନିସେଫ୍ର ସାମାଜିକ ଓ ସ୍ବଭାବ ପରିବର୍ତ୍ତନ ବିଶେଷଜ୍ଞ ଡ. ସୁଗତ ରଏ କହିଥିଲେ, ଟିକାର ଲାଭ ବିଷୟରେ ଜ୍ଞାନ ଅଭାବ ଯୋଗୁ ଶିଶୁ ଓ ଗର୍ଭବତୀ ମା’ମାନେ ଟିକାକରଣରେ ଭାଗ ନେଇ ନ ଥାନ୍ତି। ପରିବାର ସଦସ୍ୟଙ୍କୁ ସଚେତନ କରିବା ସହ ଟିକାକରଣ ପାଇଁ ଉତ୍ସାହିତ କରିବା ଦିଗରେ ଆମେ କାର୍ଯ୍ୟ କରିବୁ ବୋଲି ସୁଗତ କହିଛନ୍ତି। ଏହି ଅଭିଯାନରେ ୟୁନିସେଫ୍, ଡବ୍ଲ୍ୟୁଏଚ୍ଓ, ୟୁଏନ୍ଡିପି ଏବଂ ଜେଏସ୍ଆଇ ଆଦି ସଂସ୍ଥା ସହଯୋଗ କରିବେ।
ସୂଚନାଯୋଗ୍ୟ, ଏନ୍ଏଫ୍ଏଚ୍ଏସ୍ ୫ ରିପୋର୍ଟ ୨୦୧୯-୨୧ ଅନୁଯାୟୀ, ଦେଶରେ ସମ୍ପୂର୍ଣ୍ଣ ଟିକାରଣରେ ଓଡ଼ିଶାର ହାର ସର୍ବାଧିକ ରହିଛି। ଏପରିକି ଏ କ୍ଷେତ୍ରରେ କ୍ରମାଗତ ଉନ୍ନତି କରି ୩୬.୧% (ଏନ୍ଏଫ୍ଏଚ୍ଏସ୍ ୧ ରିପୋର୍ଟ ୧୯୯୨-୯୩)ରୁ ୯୦.୫% (ଏନ୍ଏଫ୍ଏଚ୍ଏସ୍ ୫ ରିପୋର୍ଟ ୨୦୧୯-୨୧) ପହଞ୍ଚତ୍ପାରିଛି। ଏହାଦ୍ୱାରା ରାଜ୍ୟରେ ରୋଗ ପ୍ରତିରୋଧକ ଟିକା ହେତୁ ଶିଶୁ ମୃତ୍ୟୁ ହାର ଉଲ୍ଲେଖନୀୟ ଭାବେ ହ୍ରାସ ପାଇଥିବା ପରିବାର କଲ୍ୟାଣ ନିର୍ଦ୍ଦେଶାଳୟ ପକ୍ଷରୁ ସୂଚନା ଦିଆଯାଇଛି।
