ନୂଆପଡ଼ା,୧୧ା୬(ମକାରୁ ବେମାଲ):ନୂଆପଡ଼ା ସଦର ଥାନା କେରମେଲି ଗାଁ ପାଟିଡଙ୍ଗର କଛା ଜଙ୍ଗଲ ଭିତରୁ ମଙ୍ଗଳବାର ପୋଲିସ ଜଣେ ଯୁବକଙ୍କ ଗଳିତ ଝୁଲନ୍ତା ମୃତଦେହ ଜବତ କରିଛି। ସେ ହେଲେ ବଲାଙ୍ଗୀର ଜିଲା ମୁରିବାହାଲ ଥାନା କୁମ୍ଭାରୀ ଗାଁର ବଳରାମ ହାତୀ (୩୮)। ତାଙ୍କ ସ୍ତ୍ରୀ ବିମୋଦିନି ହାତୀଙ୍କ ଅଭିଯୋଗ କ୍ରମେ ବଳାରାମ ୨୦୨୫ ଫେବୃଆରୀ ୧୨ରେ ନୂଆପଡ଼ା ଜିଲାର ପ୍ରଦୀପ ପରାଭୂଏଙ୍କ ସହ ମିଶି ନୂଆପଡା ଆସିଥିଲେ। ସେହି ଦିନଠାରୁ ସେ ଘରକୁ ଫେରି ନ ଥିଲେ। ଖୋଜାଖୋଜି ପରେ ଖବର ନ ମିଳିବାରୁ ମୁରିବାହାଲ ଥାନାରେ ନିଖୋଜ ଅଭିଯୋଗ ହୋଇଥିଲା। ଅଭିଯୋଗକୁ ଭିତ୍ତିକରି ମୁରିବାହାଲ ପୋଲିସ ତଦନ୍ତ ଆରମ୍ଭ କରିଥିଲା। ଏପରିସ୍ଥଳେ ସୋମବାର କେରମେଲି ଗାଁର କିଛି ଲୋକ ଜାଳେଣି କାଠ ପାଇଁ ପାଟିଡଙ୍ଗର କଛା ଜଙ୍ଗଲକୁ ଯାଇଥିବାବେଳେ ଏକ ଗଛରେ ଝୁଲନ୍ତା ମୃତଦେହ ଦେଖି ଭୟରେ ଗାଁକୁ ଫେରିଆସିଥିଲେ। ପରେ ଗାଁ ଲୋକେ ପୋଲିସକୁ ଖବର ଦେଇଥିଲେ। ନୂଆପଡା ସଦର ଥାନା ଅଧିକାରୀ ଗଙ୍ଗାଧର ମେହେରଙ୍କ ନେତୃତ୍ୱରେ ଏକ ପୋଲିସ ଟିମ, ଅଗ୍ନିଶମ ବାହିନୀ ଓ ମାଜିଷ୍ଟ୍ରେଟ ଦାୟିତ୍ୱରେ ଡେପୁଟି କଲେକ୍ଟର ହେମନ୍ତ ପୁଟା ମଙ୍ଗଳବାର ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ପରିଚୟ ମିଳି ନ ଥିବାରୁ ପୋଲିସ ମୃତକଙ୍କ ଶରୀର ନମୁନା ବିଭିନ୍ନ ଥାନାକୁ ପଠାଇଥିଲା। ମୁରିବାହାଲ ପୋଲିସ ନିଖୋଜ ପରିବାର ଲୋକଙ୍କୁ ଧରି ନୂଆପଡା ଆସି ମୃତଦେହ ଚିହ୍ନଟ କରିଥିଲେ। ବିନୋଦିନି ଚିହ୍ନଟ କରିବା ପରେ ପୋଲିସ ମୃତଦେହ ତାଙ୍କୁ ହସ୍ତାନ୍ତର କରିଛି। ଏ ନେଇ ନୂଆପଡ଼ା ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ପୋଲିସ ତଦନ୍ତ ଚଳାଇଛି।
