କିଭ୍,୩୦ା୧୨: ୟୁକ୍ରେନ୍ ଉପରେ ରୁଷିଆ ୨୨ ମାସ ହେଲା ଆକ୍ରମଣ ଜାରି ରଖିଥିବାବେଳେ ଶୁକ୍ରବାର ଆକାଶମାର୍ଗରୁ ସର୍ବବୃହତ୍ ଆକ୍ରମଣ କରିଛି। ୟୁକ୍ରେନ୍କୁ ଟାର୍ଗେଟ କରି ରୁଷିଆ ୧୨୨ଟି କ୍ଷେପଣାସ୍ତ୍ର ମାଡ଼ କରିବା ସହ ୩୬ଟି ଡ୍ରୋନ୍ ଆକ୍ରମଣ କରିଛି। ଏହି ଆକ୍ରମଣରେ ୧୩ ଜଣ ନାଗରିକ ନିହତ ହୋଇଛନ୍ତି। ତେବେ ୟୁକ୍ରେନ୍ ବାୟୁସେନା ୮୭ଟି କ୍ଷେପଣାସ୍ତ୍ର ଏବଂ ୨୭ଟି ଡ୍ରୋନ୍କୁ ପିଛା କରିଥିଲା ବୋଲି ଏହାର ସେନା ମୁଖ୍ୟ ଭାଲେରି ଜାଲୁଝ୍ନି କହିଛନ୍ତି।
୨୦୨୨ ଫେବୃୟାରୀରୁ ରୁଷିଆ ୟୁକ୍ରେନ୍ ଉପରେ ଆକ୍ରମଣ ଜାରି ରଖିଥିବାବେଳେ ଗୋଟିଏ ଦିନରେ ଏତେ ସଂଖ୍ୟାରେ କ୍ଷେପଣାସ୍ତ୍ର ଓ ଡ୍ରୋନ୍ ମାଡ଼ କରି ନ ଥିଲା। ଏହା ପୂର୍ବରୁ ଗତବର୍ଷ ନଭେମ୍ବରରେ ଗୋଟିଏ ଦିନରେ ୟୁକ୍ରେନ୍ ଉପରେ ରୁଷିଆ ସର୍ବାଧିକ ୯୬ କ୍ଷେପଣାସ୍ତ୍ର ମାଡ଼ କରିଥିଲା। ଚଳିତ ବର୍ଷ ମାର୍ଚ୍ଚ ୯ରେ ରୁଷିଆ ୟୁକ୍ରେନ୍କୁ ଟାର୍ଗେଟକରି ସର୍ବାଧିକ ୮୧ କ୍ଷେପଣାସ୍ତ୍ର ଛାଡ଼ିଥିଲା। ଗ୍ରୀଷ୍ମଋତୁରେ ୟୁକ୍ରେନ୍ ରୁଷିଆ ଆକ୍ରମଣର ଠିକଣା ଜବାବ ଦେଉଥିଲା। ଶୀତଦିନ ଯୋଗୁ ଆକ୍ରମଣ କିଛିଟା ଥମିଥିଲା। ୧,୦୦୦ କିଲୋମିଟର ବ୍ୟାପୀ ସୀମାରେ ଫ୍ରଣ୍ଟଲାଇନ ଆକ୍ରମଣ ବନ୍ଦ ରହିଥିଲା। ଶୁକ୍ରବାରର ଆକ୍ରମଣ ପରେ ୟୁକ୍ରେନ୍ କର୍ତ୍ତୃପକ୍ଷ ପାଶ୍ଚାତ୍ୟ ସହଯୋଗୀ ରାଷ୍ଟ୍ରଗୁଡ଼ିକୁ ଅଧିକ ଏୟାର ଡିଫେନ୍ସ ଯୋଗାଇ ଦେବାକୁ ଅନୁରୋଧ କରିଛନ୍ତି। ଆକାଶମାର୍ଗ ଆକ୍ରମଣରୁ ସୁରକ୍ଷା ପାଇଁ ଅଧିକ ଏୟାର ଡିଫେନ୍ସ ସିଷ୍ଟମ ଜରୁରୀ ହୋଇପଡ଼ିଛି। ପ୍ରାୟ ୧୮ ଘଣ୍ଟାର ଆକ୍ରମଣରେ ବହୁ ଘରଦ୍ୱାର ଧ୍ୱଂସହୋଇଥିବାରୁ ଏହା ତଳେ ଅନେକ ଲୋକ ପୋତିହୋଇ ରହିଥିବାବେଳେ ଅନେକ ଆହତ ହୋଇଛନ୍ତି। ୟୁକ୍ରେନ୍ର ଏକ ମାଟର୍ନିଟି ହସ୍ପିଟାଲ ସମେତ କେତେକ ଆପାର୍ଟମେଣ୍ଟ ଏବଂ ସ୍କୁୂଲ୍ ଆକ୍ରମଣରେ କ୍ଷତିଗ୍ରସ୍ତ ହୋଇଛି। ରୁଷିଆ ସୈନ୍ୟମାନେ ବାଲିଷ୍ଟିକ୍, କ୍ରୁଜ୍ ମିଶାଇଲ୍ ସମେତ ଅନେକ ପ୍ରକାର ଅସ୍ତ୍ର ବ୍ୟବହାର କରିଥିଲେ ବୋଲି ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କହିଛନ୍ତି। ଶୁକ୍ରବାର ରୁଷିଆ ପାଖାପାଖି ସବୁ ପ୍ରକାର ଅସ୍ତ୍ର ଆକ୍ରମଣରେ ବ୍ୟବହାର କରିଥିବା ଜେଲେନସ୍କି ସୋସିଆଲ ମିଡିଆ ଏକ୍ସ’ରେ ଲେଖିଛନ୍ତି। କେବଳ ବୁଡ଼ାଜାହାଜରୁ ନିକ୍ଷେପ ହେଉଥିବା କାଲିବର ମିଶାଇଲ୍ ବ୍ୟତୀତ ରୁଷିଆ ଆକ୍ରମଣରେ ସମସ୍ତ ଅସ୍ତ୍ର ବ୍ୟବହାର କରିସାରିଲାଣି ବୋଲି ୟୁକ୍ରେନ୍ ବାୟୁସେନା ମୁଖପାତ୍ର ୟୁରି ଇହ୍ନାଟ କହିଛନ୍ତି। ଗୁରୁବାରଠାରୁ ଆରମ୍ଭ ହୋଇଥିବା ଆକ୍ରମଣ ୟୁକ୍ରେନ୍ର ୬ଟି ସହରରେ ରାତି ତମାମ ଲାଗି ରହିଥିଲା।
