ଛତ୍ରପୁର,୧।୬(ଦିଲୀପ ସାମଲ/ଦ୍ୱାରକା ପଟ୍ଟନାୟକ): ଗଞ୍ଜାମ ଜିଲା ସଦର ମହକୁମା ଛତ୍ରପୁରସ୍ଥିତ ଲୋୟର ବସ ଷ୍ଟାଣ୍ଡଠାରେ ସୋମବାର ଭୋରରୁ ଏକ ଦୋକାନରୁ କିଛି ଦୁର୍ବୃତ୍ତ ଚୋରି କରିବା ଖବର ସାମ୍ନାକୁ ଆସିଛି। ଏକ ସଉଦା ଦୋକାନର ସକାଳେ ଯେତେବେଳେ ତାଙ୍କ ଦୋକାନ ଖୋଲିବା ପାଇଁ ଗଲେ, ସେଠାରୁ ଭଙ୍ଗା ତାଲା ସହ କିଛି ଟଙ୍କା ଏବଂ ସମାଗ୍ରୀ ଗାଏବ ଥିବା ଦେଖିବାକୁ ପାଇଲେ। ସେ ତୁରନ୍ତ ଏହି ଚୋରି ସମ୍ପର୍କରେ ସ୍ଥାନୀୟ ପୋଲିସ ଥାନାକୁ ଖବର ଦେଲେ। ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।
ସୂଚନା ଥାଉ କି, ଛତ୍ରପୁରଠାରେ ମେ ମାସ ୪ରୁ ମା’ ରାମାୟଣା ଆମ୍ମା ଠାକୁରାଣୀ ଯାତ୍ରା ଅନୁଷ୍ଠିତ ହୋଇଆସୁଛି। ମୀନା ବଜାର ସାଙ୍ଗକୁ ସୋମବାରଠାରୁ ଛତ୍ରପୁର ମହୋତ୍ସବ ମଧ୍ୟ ଆରମ୍ଭ ହୋଇସାରିଛି। ଏଠାରେ ପ୍ରବଳ ଜନସମାଗମ ହେଉଛି। ଘର ଏବଂ ଦୋକାନ ବନ୍ଦ କରି ଲୋକମାନେ ଏହାର ଆନନ୍ଦ ନେଉଥିବାବେଳେ କିଛି ଦୁର୍ବୃତ୍ତ ଏହାର ସୁଯୋଗ ନେଉଛନ୍ତି। ବିଳମ୍ବିତ ରାତିରେ ଏହି ସବୁ ଘର ଓ ଦୋକାନଗୁଡ଼ିକୁ ଟାର୍ଗେଟ କରି ତାଲା ଭାଙ୍ଗି ଦୁର୍ବୃତ୍ତମାନେ ଚୋରି ଓ ଲୁଟ କରୁଥିବା ପରିଲକ୍ଷିତ ହେଉଛି। ସୁରକ୍ଷାକୁ ନେଇ ପୋଲିସ ପ୍ରଶାସନ ତତ୍ପର ଥିବା ବେଳେ ସେମାନଙ୍କ ପାଇଁ ଏହା ଏକ ପ୍ରକାରର ଚ୍ୟାଲେଞ୍ଜ ପାଲଟିଯାଇଛି।
Dharitri – Odisha’s No.1 Odia Daily
