ମେଲବୋର୍ନ,୧୮ା୧(ପି.ଟି.): ଟେନିସ୍ ଗ୍ରାଣ୍ଡସ୍ଲାମ ଅଷ୍ଟ୍ରେଲିଆନ୍ ଓପନରେ ଦେଖିବାକୁ ମିଳିଛି ଦୁଇଟି ବଡ଼ ବିପର୍ଯ୍ୟୟ। ଓନ୍ସ ଜାବେର ଓ କାରୋଲିନ୍ ଓଜ୍ନିଆକିଙ୍କ ପରି ଖେଳାଳି ବିଦାୟ ନେଇଛନ୍ତି। ରୁଷିଆର ୧୬ ବର୍ଷୀୟା ମୀରା ଆଣ୍ଡ୍ରିଭା ବିପର୍ଯ୍ୟୟ ଘଟାଇବା ସହ ୩ ଥର ଗ୍ରାଣ୍ଡସ୍ଲାମ ରନର୍ଅପ୍ ଓନ୍ସ ଜାବେରଙ୍କୁ ପରାସ୍ତ କରିଛନ୍ତି। ବୁଧବାର ମୀରା ମାତ୍ର ୫୪ ମିନିଟ ସମୟ ନେଇ ୬-୦, ୬-୨ରେ ମ୍ୟାଚ୍କୁ ଜିତି ନେଇଥିଲେ। ପ୍ରଥମ ସେଟ୍କୁ ମାତ୍ର ୨୦ ମିନିଟ ସମୟରେ ଜିତି ସେ ଜାବେରଙ୍କୁ ସ୍ତବ୍ଧ କରି ଦେଇଥିଲେ। ପରବର୍ତ୍ତୀ ରାଉଣ୍ଡରେ ବିଶ୍ୱ ମାନ୍ୟତାର ଷଷ୍ଠ ସ୍ଥାନରେ ଥିବା ଜାବେର ପ୍ରତ୍ୟାବର୍ତ୍ତନ ପାଇଁ ପ୍ରୟାସ କରିଥିଲେ ମଧ୍ୟ ଆଣ୍ଡ୍ରିଭା ଚମତ୍କାର ପ୍ରଦର୍ଶନ ବଳରେ ଜିତି ନେଇଥିଲେ। ଓ୍ବିମ୍ବେଲଡନ୍ ୨୦୨୩ର ଚତୁର୍ଥ ରାଉଣ୍ଡରେ ପ୍ରବେଶ କରି ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଥିବା ମୀରାଙ୍କର ଏହା ଅଷ୍ଟ୍ରେଲିଆନ୍ ଓପନରେ ଶ୍ରେଷ୍ଠ ପ୍ରଦର୍ଶନ। ଜାବେର ମ୍ୟାଚ୍ର ପରାଜୟ ପରେ ଆଣ୍ଡ୍ରିଭାଙ୍କ ପ୍ରଦର୍ଶନକୁ ବେଶ୍ ପ୍ରଶଂସା କରିଥିଲେ। ପୂର୍ବତନ ଅଷ୍ଟ୍ରେଲିଆନ୍ ଓପନ୍ ଚାମ୍ପିୟନ କାରୋଲିନ୍ ଓଜ୍ନିଆକି ଅଣସିଡେଡ୍ ମାରିଆ ଟିମୋଫିଭାଙ୍କ ନିକଟରୁ ୧-୬, ୬-୪ ଓ ୬-୧ରେ ପରାଜିତ ହୋଇଛନ୍ତି। ଅନ୍ୟ ସିଡେଡ୍ ଖେଳାଳିଙ୍କ ମଧ୍ୟରେ କୋକୋ ଗଫ୍ ୭-୬(୭) ଓ ୬-୨ରେ କାରୋଲିନ୍ ଡୋଲହିଡେଙ୍କୁ, ବାର୍ବୋରା କ୍ରେଜିକୋଭା ୬-୨, ୬-୨ରେ ଟାମାରା କୋର୍ପାଶ୍ଚଙ୍କୁ, ବିଟ୍ରିଜ୍ ହଦାଦ ମାଇଆ ୬-୨, ୬-୧ରେ ଆଲିନା କୋର୍ଣ୍ଣିଭାଙ୍କୁ, ମାଗଡାଲେନା ଫ୍ରେଚ୍ ୬-୪, ୭-୬(୭)ରେ କାରୋଲିନା ଗାର୍ସିଆଙ୍କୁ, ୟୁକ୍ରେନର ମାର୍ଟା କୋଷ୍ଟ୍ୟୁକ ୭-୫, ୧-୬ ଓ ୭-୬ରେ ଏଲେନ ମର୍ଟେନ୍ସଙ୍କୁ ଓ ଦ୍ୱିତୀୟ ସିଡ୍ ଆରିନା ସାବାଲେଙ୍କା ୬-୩, ୬-୨ରେ ବ୍ରେଣ୍ଡା ଫୃଭିର୍ତୋଭାଙ୍କୁ ପରାସ୍ତ କରି ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି।
ପୁରୁଷ ସିଙ୍ଗଲ୍ସରେ ଏକ ନମ୍ବର ସିଡ୍ ନୋଭାକ୍ ଜୋକୋଭିଚ୍ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ସ୍ଥାନୀୟ ଖେଳାଳି ଆଲେକ୍ସି ପପିରିନ୍ଙ୍କୁ ୬-୩, ୪-୬, ୭-୬(୭) ଓ ୬-୩ ସେଟରେ ପରାସ୍ତ କରି ଜୋକୋଭିଚ୍ ତୃତୀୟ ରାଉଣ୍ଡରେ ପ୍ରବେଶ କରିଥିଲେ। ୫ ନମ୍ବର ସିଡ୍ ଆଣ୍ଡି ରୁବଲେଭ ୬-୪, ୬-୪ ଓ ୬-୪ ସେଟରେ କ୍ରିଷ୍ଟୋଫର ୟୁବ୍ୟାଙ୍କସଙ୍କୁ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଅନ୍ୟ ସିଡେଡ ଖେଳାଳିଙ୍କ ମଧ୍ୟରେ ଷ୍ଟିଫାନୋସ୍ ସିଟ୍ସିପାସ୍ ୪-୬, ୭-୬(୮), ୬-୨, ୭-୬(୭)ସେଟରେ ଜୋର୍ଡାନ୍ ଥମ୍ପସନଙ୍କୁ, ଜାନିକ୍ ସିନ୍ନର ୬-୨, ୬-୨, ୬-୨ ସେଟରେ ଜାସ୍ପର ଡି ଜଙ୍ଗଙ୍କୁ, ଆଲେକ୍ସ ଡି ମିନାଉର ୬-୩, ୬-୦, ୬-୩ ସେଟ୍ରେ ମାଟ୍ଟେଓ ଆରଲିଣ୍ଡିଙ୍କୁ, କାରେନ୍ ଖାଚାନୋଭ୍ ୬-୪, ୬-୩, ୪-୬ ଓ ୬-୩ ସେଟରେ ଆଲେକଜାଣ୍ଡର କୋଭାସେଭିକଙ୍କୁ ପରାସ୍ତ କରି ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି।
