ବାରିପଦା ଅଫିସ,୨୦।୨ – ଆକସ୍ମିକ ଅଗ୍ନିକାଣ୍ଡରୁ ଉଦ୍ଧାର କରୁଥିବା ଅଗ୍ନିରୂପିଣୀ ମା’ ହିଙ୍ଗୁଳାଙ୍କ ବାର୍ଷିକ ବଡ଼ପୂଜା ମୟୂରଭଞ୍ଜ ଜିଲା ବଡ଼ସାହି ବ୍ଲକ କଉଡ଼ିଖଣିସ୍ଥିତ ଶାଳଜଙ୍ଗଲ ପରିସରରେ ଶନିବାର ଅନୁଷ୍ଠିତ ହୋଇଯାଇଛି। କୋଭିଡ୍-୧୯ ଓ ପଞ୍ଚାୟତ ନିର୍ବାଚନ ଦୃଷ୍ଟିରୁ ୧୪୪ ଧାରା ଜାରି ସତ୍ତ୍ୱେ ଏହି ପୀଠରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିତ୍ଲା। ମୟୂରଭଞ୍ଜ ଜିଲା ସମେତ ପଡ଼ୋଶୀ ବାଲେଶ୍ୱର, ଭଦ୍ରକ, ଯାଜପୁର ଏବଂ ଝାଡ଼ଖଣ୍ଡ, ବିହାର ଓ ପଶ୍ଚିମବଙ୍ଗ ରାଜ୍ୟରୁ ଭକ୍ତମାନେ ମା’ଙ୍କ ଦର୍ଶନ କରି ଅପାର କୃପା ଲାଭ କରିଥିଲେ। ମନ୍ଦିର ପାର୍ଶ୍ୱରେ କୌଣସି ଦୋକାନ ବଜାର ବସି ନ ଥିବା ବେଳେ ଭିଡ଼ ନିୟନ୍ତ୍ରଣ କରିବା ପାଇଁ ପୋଲିସ ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା କରାଯାଇ ନ ଥିଲା। ଫଳରେ ଦୂରଦୂରାନ୍ତରୁ ଆସିଥିବା ଭକ୍ତ ବହୁ ଅସୁବିଧାର ସମ୍ମୁଖିନ ହୋଇଥିଲେ।
ଉତ୍ତର ଓଡ଼ିଶାରେ ‘ଜିଅନ୍ତା ଠାକୁରାଣୀ’ ଭାବେ ପରିଚିତ ମା’ ହିଙ୍ଗୁଳାଙ୍କ ପୀଠ ସବୁଜ ବନାନୀ ପରିବେଷ୍ଠିତ ଶାଳ ବଣର ମଧ୍ୟ ଭାଗରେ ଅବସ୍ଥିତ। ବେଢ଼ା ମଧ୍ୟରେ ସମ୍ପୂର୍ଣ୍ଣ ଯୋଡ଼ି ହୋଇ ରହିଥିବା ଦୁଇଟି ବଟ ଓ ସାହାଡ଼ା ବୃକ୍ଷ ମୂଳରେ ମା’ ଆବିର୍ଭୂତା ା ନାଲି କପଡ଼ା, ରଙ୍ଗବେରଙ୍ଗି ଶାଢ଼ି ଦ୍ୱାରା ଏହି ବୃକ୍ଷ ଆବୃତ୍ତ ହୋଇ ରହିଛି। ମା’ ଅଗ୍ନିକୁଣ୍ଡରେ ଭୋଗରାଗ ସମର୍ପଣ କଲେ ବର୍ଷସାରା ଅଗ୍ନିକାଣ୍ଡରୁ ମୁକ୍ତି ମିଳିଥାଏ ବୋଲି ଜନଶ୍ରୁତି ରହିଆସିଛି। ଅଗ୍ନି ପୂର୍ଣ୍ଣିମାଠାରୁ ବଡ଼ପୂଜା ପର୍ଯ୍ୟନ୍ତ ମା’ଙ୍କ ପୀଠରେ ଭକ୍ତଙ୍କ ସମାଗମ ଲାଗିରହିଛି। ତେବେ ବଡ଼ସାହି ଛକ ଠାରୁ ସୁହାଗପୁର, ଉଦଳା-ସୁହାଗପୁର, କୁଅମରା-ଚାନ୍ଦଡିହା ରାସ୍ତାରେ ଟ୍ରାଫିକ ବ୍ୟବସ୍ଥା ହୋଇ ନ ଥିବାରୁ ଦୀର୍ଘ ସମୟ ଧରି ଯାନବାହାନ ଅଟକି ରହିଥିଲା। ପ୍ରଶାସନ ୧୪୪ ଧାରା ଜାରି କରିଥିଲେ ହେଁ ଶାନ୍ତିଶୃଙ୍ଖଳା ପାଇଁ ପୋଲିସ ମୃତୟନ କରି ନ ଥିବାରୁ ଛୋଟ ଛୋଟ ଦୁର୍ଘଟଣା ମାନ ଦେଖିବାକୁ ମିଳିଥିଲା। ସେହିପରି ଛେଳିଆ(କ) ଗ୍ରାମରେ ପୂଜା ପାଉଥିବା ମା’ଙ୍କ ପୀଠରେ ମଧ୍ୟ କୋଭିଡ୍ କଟକଣା ମାନି ପୂଜା କାର୍ଯ୍ୟ ସମାପନ ହୋଇଛି ା
