ଦିଗପହଣ୍ଡି,୬।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା କେ.ନୂଆଗାଁ ଥାନା ପୋଲିସକୁ ରାସ୍ତାକଡ ରୁ ମିଳିଥିବା ହୋଣ୍ଡା ୟୁନିକର୍ଣ୍ଣ ବାଇକ (ନଂ. ଓଡ଼ି୦୭ ଏଜି – ୪୨୫୦) କୁ ବୁଧବାର ନୂଆପଡ଼ା ଫାଣ୍ଡି ଅଧିକାରୀ ସୁବାସ ବାୟକ ପ୍ରକୃତ ମାଲିକଙ୍କୁ ଫେରାଇଥିବା ଜଣାପଡିଛି। ଗତ ୨୦୨୪ ଅକ୍ଟୋବର ୫ ତାରିଖ ସନ୍ଧ୍ୟା ସାଢ଼େ ୫ଟାରେ ବ୍ରହ୍ମପୁର ଖଲ୍ଲିକୋଟ ସ୍ବୟଂ ଶାସିତ ବିଶ୍ୱବିଦ୍ୟାଳୟ ସମ୍ମୁଖରୁ ଚୋରି ହୋଇଥିଲା। ବ୍ରହ୍ମପୁର ନିମଖଣ୍ଡି ଥାନା ମେଡ଼ିକାଲ ବ୍ୟାଙ୍କ କଲୋନୀ ୪ର୍ଥ ଲେନର ମିହିର କୁମାର ଦାସ ସେଠାରେ ବାଇକ ରଖି ବଜାର କରୁଥିବା ବେଳେ କେହି ଦୁର୍ବୃତ୍ତ ବାଇକଟିକୁ ଚୋରି କରିଥିଲେ। ସେ ବାଇକକୁ ଖୋଜାଖୋଜି କରିବାପରେ ମଧ୍ୟ ସନ୍ଧାନ ମିଳି ନ ଥିଲା। ସେ ଏନେଇ ବ୍ରହ୍ମପୁର ଟାଉନ ଥାନାରେ ଜଣାଇଥିଲେ। ପରେ ଅନଲାଇନରେ ଏତଲା ଦେଇଥିଲେ ମଧ୍ୟ ପଞ୍ଜୀକୃତ ହୋଇପାରି ନ ଥିଲା। ମନସ୍ତାପ କରି ବାଇକ ଚୋରି ଘଟଣାକୁ ଭୁଲିଯାଇଥିଲେ। କିଛି ମାସ ପରେ କେ.ନୂଆଗାଁ ଥାନା ତତ୍କାଳୀନ ନୂଆପଡ଼ା ଫାଣ୍ଡି ଅଧିକାରୀ ଜଗବନ୍ଧୁ ବାର୍ଲା ସଦଳବଳେ ରାତ୍ରୀକାଳୀନ ପାଟ୍ରୋଲିଂ କରୁଥିବା ବେଳେ ଦିଗପହଣ୍ଡି ବ୍ଲକ ଗୌଡ଼ ଗାଁ ନିକଟ ମୁଖ୍ୟରାସ୍ତା କଡରେ କେହି ବାଇକଟି ଛାଡି ଚାଲିଯାଇଥିବା ଦେଖିଥିଲେ। ପୋଲିସ ବାଇକକୁ ଜବତ କରି ଫାଣ୍ଡିକୁ ଆଣିଥିଲେ। ଜବତ ବାଇକର କେହି ଦାବିଦାର ନ ଥିବାରୁ ବାଇକଟିକୁ ପୋଲିସ ହେପାଜତରେ ରଖିଥିଲେ। ନବ ନିଯୁକ୍ତ ନୂଆପଡ଼ା ଫାଣ୍ଡି ଅଧିକାରୀ ଉକ୍ତ ବାଇକର ଚେଶିସ ନଂ. ଇଞ୍ଜିନ ନଂ. ଏବଂ ରେଜିଷ୍ଟେସନ ନଂ. ଗୁଡ଼ିକୁ ତଲାସି କରି ବାଇକ ମାଲିକଙ୍କ ନାଁ ଓ ଠିକଣା ସଂଗ୍ରହ କରିଥିଲେ। କେ.ନୂଆଗାଁ ଥାନା ଆଇଆଇସି ବିଶ୍ୱଜିତ ନାୟକଙ୍କୁ ଫାଣ୍ଡି ଅଧିକାରୀ ଏନେଇ ସୂଚନା ଦେବାପରେ ବୁଧବାର ବାଇକ ମାଲିକଙ୍କୁ ଥାନାକୁ ଡକାଯାଇଥିଲା। ବାଇକର ସମସ୍ତ କାଗଜପତ୍ର ଯାଞ୍ଚ କରାଯିବା ପରେ ଆଇଆଇସିଙ୍କ ନିର୍ଦ୍ଦେଶକ୍ରମେ ପ୍ରକୃତ ମାଲିକଙ୍କୁ ବାଇକଟିକୁ ଜିମାରେ ଦିଆଯାଇଥିଲା। ଦେଢବର୍ଷ ପରେ ବାଇକ ଟି ତାଙ୍କୁ ମିଳିବାପରେ ସେ ପୋଲିସ ଅଧିକାରୀ ମାନଙ୍କୁ କୃତଜ୍ଞତା ଜଣାଇଥିଲେ।
