ନାଉଗାଁ,୧ା୭(ସ୍ବ.ପ୍ର.): ଜଗତସିଂହପୁର ଜିଲା ନାଉଗାଁ ବ୍ଲକ ଗଜରାଜପୁର ପଞ୍ଚାୟତ ଦେଇ ପ୍ରବାହିତ ଦେବୀ ନଦୀର ତୁମ୍ବେଶ୍ୱରଠାରେ ନିର୍ମାଣ କରାଯାଉଛି ମେଗା ପାନୀୟ ଜଳ ପ୍ରକଳ୍ପ। ଏହି ପ୍ରକଳ୍ପ ପାଇଁ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ପ୍ରକଳ୍ପ ନିର୍ମାଣ କରୁଥିବା ଠିକାସଂସ୍ଥାର ମନମୁଖି କାର୍ଯ୍ୟ ଯୋଗୁ ସ୍ଥାନୀୟ ଜନସାଧରାଣ ଅସୁବିଧାରେ ସମ୍ମୁଖିନ ହେଉଛନ୍ତି। ଏହି ପ୍ରକଳ୍ପ ନିର୍ମାଣ କାର୍ଯ୍ୟ ରାଜ୍ୟ ସରକାରଙ୍କ ଜଳ ପରିମଳ ବିଭାଗ ତଦାରଖରେ ରହିଛି। କିନ୍ତୁ ଠିକା ସଂସ୍ଥା ସ୍ଥାନୀୟ ଲୋକଙ୍କ ସମସ୍ୟା ପ୍ରତି ଗୁରୁତ୍ୱ ନ ଦେଇ ମନଇଚ୍ଛା କାର୍ଯ୍ୟ କରୁଥିବା ଜଣାଯାଇଛି। ଏହି ପ୍ରକଳ୍ପରୁ ମଧୁର ପାନୀୟ ଜଳ ବାଲିକୁଦା-ଏରସମା ବ୍ଲକକୁ ପ୍ରଦାନ କରାଯିବାର ଲକ୍ଷ୍ୟ ରଖାଯାଇଛି। ପାନୀୟ ଜଳ ପ୍ରଦାନ ପାଇଁ ବିଭିନ୍ନ ରାସ୍ତା ପାର୍ଶ୍ୱ ଖୋଳାଯାଇ ପାଇପ ବିଚ୍ଛା ଯାଉଛି। ବ୍ଲକର ଅଲଣାହାଟ-କୁଣ୍ଡେଶ୍ୱରକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତାକୁ ବର୍ତ୍ତମାନ ଖୋଳା ଯାଇ ପାଇପ ପକାଯାଉଛି। ରାସ୍ତା ଖୋଳିବା ସମୟରେ ପୂର୍ତ୍ତ ବିଭାଗର କୌଣସି ଅନୁମତି କିମ୍ବା ଅବଗତ କରାଇ ନ ଥିବା ବିଭାଗର କାର୍ଯ୍ୟନିର୍ବାହୀ ଯନ୍ତ୍ରୀ ରାଧାକାନ୍ତ ଭୂୟଁା ପ୍ରକାଶ କରିଛନ୍ତି। ରସ୍ତା ପାର୍ଶ୍ୱ ଖୋଳିବା ଦ୍ୱାରା ରାସ୍ତାରେ ମାଟି ଜମି ରହିଛି। ଫଳରେ କୌଣସି ଯାନବାହାନ ଉକ୍ତ ରାସ୍ତା ଦେଇ ଯାଇ ପାରୁନାହିଁ। ମଝିରେ ମଝିରେ ବର୍ଷା ଯୋଗୁ ଉକ୍ତ ମାଟି ଭିଜି ରାସ୍ତାରେ କାଦୁଅ ଜମା ହେଉଛି। ମାଟି ପଡି ରହିବା ଦ୍ୱାରା ରାତିରେ ଆସୁଥିବା ଗାଡିଗୁଡିକ ଦୁର୍ଘଟଣାଗ୍ରସ୍ତ ହେଉଥିବା ଅଭିଯୋଗ ହେଉଛି। ଏପରି କି ରାସ୍ତାରେ କାଦୁଅ ଯୋଗୁ ଗାଡି ନ ଚାଲିବାରୁ ସ୍ଥାନୀୟ ଲୋକ ଗାଡିକୁ ପେଲି ପେଲି ନେଉଥିବା ଦେଖିବାକୁ ମିଳୁଛି। ଠିକା ସଂସ୍ଥା ପକ୍ଷରୁ ବାରମ୍ବାର ରାସ୍ତା ଖୋଳିବା ଦ୍ୱାରା ସ୍ଥାନୀୟ ଜନସାଧରାଣଙ୍କର ସମସ୍ୟା ବଢିବାରେ ଲାଗିଛି। ଏହି ରାସ୍ତାଟି ନାଉଗାଁ ବ୍ଲକରୁ ବାଲିକୁଦା ବ୍ଲକକୁ ସଂଯୋଗ କରୁଛି। ତେଣୁ ଏହି ୨ ବ୍ଲକ ବ୍ୟତୀତ ଅନ୍ୟ ଲୋକମାନେ ମଧ୍ୟ ବିଭିନ୍ନ କାର୍ଯ୍ୟ ପାଇଁ ଏହି ରାସ୍ତା ଦେଇ ଯିବା ଆସିବା କରିଥାନ୍ତି। ତେଣୁ ଜନସାଧାରଣ ଙ୍କ ସ୍ବାର୍ଥ ଦୃଷ୍ଟିରୁ ଯଥାଶୀଘ୍ର ଏହି ରାସ୍ତା ଉପରୁ ମାଟି ସଫା କରିବାକୁ ସ୍ଥାନୀୟ ଜନସାଧାରଣ ପ୍ରଶାସନ ନିକଟରେ ଦାବି କରିଛନ୍ତି। ଏ ସଂକ୍ରାନ୍ତରେ ଜଳ ପରିମଳ ବିଭାଗର ଯନ୍ତୀ ରଶ୍ମି ରଞ୍ଜନ ଦାସଙ୍କୁ ପଚାରିବାରେ ପୂର୍ତ୍ତ ବିଭାଗକୁ ଅବଗତ କରି ରାସ୍ତା ଖୋଳାଯାଇଛି। ଯଥାଶୀଘ୍ର ରାସ୍ତା ସଫା କରିବାର ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
