ଭୁବନେଶ୍ୱର, ୧୬ା୧(ସୁନିତ୍ ମିଶ୍ର): ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟଙ୍କ ଘରେ ଦଳର ବରିଷ୍ଠ ନେତାମାନଙ୍କ ବୈଠକକୁ ନେଇ ରାଜନୀତି ଜୋର୍ ଧରିଛି। ପୂର୍ବତନ ବିଧାୟକ ଅଶୋକ ଚନ୍ଦ୍ର ପଣ୍ଡା, ପ୍ରଫୁଲ୍ଲ ସାମଲ, ଭୂପିନ୍ଦର ସିଂହ ଏବଂ ବିଧାୟକ ଦେବେଶ ଆଚାର୍ଯ୍ୟ ପ୍ରମୁଖ ବୈଠକରେ ସାମିଲ ଥିଲେ। ତେବେ ବରିଷ୍ଠ ନେତାମାନଙ୍କ ଏହି ମେଳିକୁ ନେଇ ବିଜେଡି ଭିତରେ ମଧ୍ୟ ଚର୍ଚ୍ଚା ଜୋର୍ ଧରିଛି। ଗଣମାଧ୍ୟମରେ ପ୍ରତିକ୍ରିୟା ରଖି ଭୂପିନ୍ଦର ସିଂହ କହିଛନ୍ତି, ପ୍ରସନ୍ନ ଆଚାର୍ଯ୍ୟଙ୍କ ଦେହ ଖରାପ ଥିବା ଖବର ପାଇଥିଲେ। ପ୍ରସନ୍ନଙ୍କ ନିର୍ବାଚନମଣ୍ଡଳୀରୁ ମଧ୍ୟ ସେହି ଖବର ଆସିଥିଲା। ତେଣୁ ଏକ ସୌଜନ୍ୟମୂଳକ ସାକ୍ଷାତ ଲାଗି ଚାଲି ଆସିଥିଲେ। ଏହା କିଛି ରୁଦ୍ଧଦ୍ୱାର ବୈଠକ ନୁହେଁ। ଯେତେବେଳେ ଯେଉଁଠାରେ ବସିଲେ ବି ସଙ୍ଗଠନ ସମ୍ପର୍କରେ ହିଁ ଆଲୋଚନା କରିବେ। ଏହାଛଡ଼ା କିଛି ଅନ୍ୟ କାମ ସେମାନଙ୍କର କ’ଣ ରହିଛି। ନିଜ ଅନୁଷ୍ଠାନକୁ ମଜଭୁତ କରିବା ଏବଂ କେଉଁଠି ତ୍ରୁଟି ସବୁ ରହିଯାଇଛି ତାକୁ ସୁଧାରି ଆଗକୁ ବଢ଼ିବା ଲାଗି ଏକାଠି ହେଉଛନ୍ତି। ହେଲେ ଆଜିର ବୈଠକ କେବଳ ସୌଜନ୍ୟମୂଳକ ଥିଲା, ଏଥିରେ ଆଉ କିଛି ନ ଥିଲା। ଏବେ ଧୈର୍ଯ୍ୟ ରଖିବାର ଆବଶ୍ୟକତା ଅଛି। ବରିଷ୍ଠମାନେ ଚିନ୍ତା କରୁଛୁ କନିଷ୍ଠମାନଙ୍କ ମଧ୍ୟରେ ଏକ ଭଲ ଟିମ୍ ତିଆରି ହେଉ ବୋଲି ଭୂପିନ୍ଦର କହିଛନ୍ତି।
ହେଲେ ଏହି ବୈଠକ ନେଇ ଭିନ୍ନ ପ୍ରକାର ଚର୍ଚ୍ଚା ହେଉଛି। ବିଜେଡି ସଭାପତି ନବୀନ ପଟ୍ଟନାୟକ ଏବେ ମଧ୍ୟ କାର୍ତ୍ତିକ ପାଣ୍ଡିଆନ୍ଙ୍କୁ ପାଖରେ ରଖିବା, ନବୀନ ନିବାସରେ ରହି ପାଣ୍ଡିଆନ୍ ସବୁ କଥା କରାଇବା ବିଷୟକୁ ବିରୋଧକରି ଏହି ବୈଠକ ବସିଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି। ସେହିପରି ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସଙ୍କୁ ନେଇ ଏହି ବୈଠକରେ ଅସନ୍ତୋଷ ପ୍ରକାଶ ପାଇଥିବା ବିଷୟ ମଧ୍ୟ ଶୁଣିବାକୁ ମିଳିଛି। ଯଦିଓ ପ୍ରସନ୍ନଙ୍କ ଅସୁସ୍ଥତା ଖବର ପାଇ ଏହି ସମସ୍ତ ନେତା ତାଙ୍କ ଘରକୁ ଆସିଥିବା କଥା କହିଛନ୍ତି, ଅନ୍ୟପଟେ ରାଜନୀତି ଉପରେ ଏବଂ ସଙ୍ଗଠନ ମଜଭୁତ ବିଷୟରେ ଆଲୋଚନା ବିଷୟକୁ ମଧ୍ୟ ଅସ୍ବୀକାର କରିନାହାନ୍ତି।
