ନୂଆଦିଲ୍ଲୀ,୨୫।୨: ଦିଲ୍ଲୀ ମ୍ୟୁନିସିପାଲ କର୍ପୋରେଶନ (ଏମ୍ସିଡି)ର ଷ୍ଟାଣ୍ଡିଂ କମିଟି ସଦସ୍ୟ ନିର୍ବାଚନରେ ଭୋଟ ପୁନଃ ଗଣନାକୁ ଏଏପି କାଉନସିଲରମାନେ ବିରୋଧ କରିଥିଲେ। ଏମ୍ସିଡି ମେୟର ଶେଲି ଓବେରୟ ଶୁକ୍ରବାର ପୁନଃଗଣତିକୁ ବନ୍ଦ କରିବା ପରେ ଏହାକୁ ନେଇ ଗୃହରେ ତୁମୁଳ କାଣ୍ଡ ଘଟିଯାଇଛି। ଏଏପି ଏବଂ ଭାଜପା କାଉନସିଲରମାନେ ପରସ୍ପରକୁ ମୁଥ ଓ ଗୋଇଠା ମାରିବା ସହ ଚୁଟି ଘୋଷାଡ଼ୁଥିବା ଦେଖାଯାଇଥିଲା। କେତେଜଣଙ୍କ କୁର୍ତ୍ତା ଚିରିଯାଇଥିଲା। ସଂଘର୍ଷ ବେଳେ ଦୁଇଜଣ ସଦସ୍ୟ ତଳେ ପଡ଼ିଯାଇଥିଲେ। ଏଏପି କାଉନସିଲର ଅଶୋକ କୁମାର ମାନୁ ମୂର୍ଚ୍ଛା ଯାଇଥିଲେ। କାଉନସିଲରମାନେ ଏଭଳି ନିର୍ଲଜ ହୋଇଯାଇଥିଲେ ଯେ, ସେମାନେ ମହିଳା ସଦସ୍ୟମାନଙ୍କୁ ଆକ୍ରମଣ କରିବାକୁ ପଛାଇ ନ ଥିଲେ। ମେୟର ଓବେରୟଙ୍କୁ ମଧ୍ୟ ଭାଜପା ଗୁଣ୍ଡାମାନେ ଆକ୍ରମଣ କରିଥିବା ଏଏପି ଅଭିଯୋଗ କରିଛି। ମହିଳା ସୁରକ୍ଷାକର୍ମୀମାନେ ତାଙ୍କୁ ଏସ୍କର୍ଟ କରି ନେଇଯାଇଥିଲେ।
ପୁନଃଗଣତି ପ୍ରକ୍ରିୟା ବନ୍ଦ ଲାଗି ମେୟରଙ୍କ ନିଷ୍ପତ୍ତି ବିରୋଧରେ ଭାଜପା କାଉନସିଲରମାନେ ବିକ୍ଷୋଭ ପ୍ରଦର୍ଶନ କରିବା ସହ ମାଇକ ଭାଙ୍ଗିବା ଏବଂ ବାଲଟ ପେପର ଚିରିବା ଆରମ୍ଭ କରିଦେଇଥିଲେ। ସେମାନେ ଗୃହରେ ସ୍ଲୋଗାନ ଦେବା ସହ ପୋଲିଂ ବୁଥ୍କୁ ଭାଙ୍ଗିଦେଇଥିଲେ। ପୁନଃଗଣତି ପାଇଁ ଗୋଟିଏ ଦଳ ଚାହୁଁଥିବାବେଳେ ଅନ୍ୟ ଦଳ ବିରୋଧ କରୁଥିବାରୁ ଏହାକୁ ସ୍ଥଗିତ ରଖାଗଲା ବୋଲି ମେୟର ଓବେରୟ କହିଥିଲେ। ପୂର୍ବରୁ ସବୁଠୁ ପ୍ରଭାବଶାଳୀ ଷ୍ଟାଣ୍ଡିଂ କମିଟି ସଦସ୍ୟ ନିର୍ବାଚନ ଲାଗି ଭୋଟଗ୍ରହଣ ପରେ ଗୋଟିଏ ଭୋଟକୁ ନେଇ କାଉନସିଲରମାନଙ୍କ ମଧ୍ୟରେ ହଟ୍ଟଗୋଳ ଆରମ୍ଭ ହୋଇଥିଲା। ମେୟର ଉକ୍ତ ଭୋଟକୁ ଅବୈଧ ଘୋଷଣା କରିଥିଲେ।
ଭାଜପାର ଜଣେ କାଉନସିଲର କହିଛନ୍ତି, ଭୋଟ ବୈଧ ଥିଲା। ଏହାକୁ ଅବୈଧ ଘୋଷଣା କରାଯିବା ଦ୍ୱାରା ଏଏପି ପ୍ରାର୍ଥୀ ବିଜୟୀ ହୋଇଯିବେ। ନିର୍ବାଚନ କମିଶନ ଧାର୍ଯ୍ୟ କରିଥିବା ଭୋଟ ଗଣନା ନିୟମାବଳୀକୁ ମେୟର ଉପେକ୍ଷା କରିଥିବା ଅନ୍ୟ ଜଣେ ଭାଜପା କାଉନସିଲର ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ମେୟର କହିଛନ୍ତି, ଭାଜପା ଏକ ଗୁଣ୍ଡା ଦଳ ବୋଲି ଏମ୍ସିଡି ହାଉସ୍ରେ ହଙ୍ଗାମା କରି ସାରା ଦେଶକୁ ଦେଖାଇ ଦେଇଛି। ସେମାନେ ଗୋଟିଏ ଭୋଟରେ ହାରିଯିବେ ଜାଣିବା ପରେ ଏଏପି ସଦସ୍ୟମାନଙ୍କୁ ଆକ୍ରମଣ ଆରମ୍ଭ କରିଥିଲେ। ସେମାନେ ଟେବୁଲ ଉପରେ ଚଢ଼ି ଧମକ ଦେଇଥିଲେ ବୋଲି ମେୟର କହିଛନ୍ତି।
