ଲକ୍ଷ୍ନୌ,୨୩।୮: ବହୁଜନ ସମାଜବାଦୀ ପାର୍ଟି ପ୍ରମୁଖ ମାୟାବତୀ ଅନ୍ୟ କୌଣସି ଦଳ ସହ ମେଣ୍ଟ ନ କରି ୨୦୨୪ ଲୋକ ସଭା ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଇଛନ୍ତି। ଲକ୍ଷ୍ନୌରେ ବୁଧବାର ହୋଇଥିବା ବୈଠକରେ ମାୟାବତୀଙ୍କ ଭାଇ ଆନନ୍ଦ କୁମାର ଏବଂ ଭଣଜା ଆକାଶ ଆନନ୍ଦ ଉପସ୍ଥିତ ଥିଲେ। ଏହି ଅବସରରେ ମାୟାବତୀ ଆକାଶଙ୍କ କାନ୍ଧରେ ହାତ ରଖି ରାଜନୈତିକ ପରାମର୍ଶ ଦେଇଛନ୍ତି।
ରାଜସ୍ଥାନ ଗସ୍ତ ଛାଡ଼ି ସାମିଲ ହୋଇଥିବା ଆକାଶଙ୍କୁ ମାୟାବତୀ କହିଛନ୍ତି, ମେଣ୍ଟ ଯୋଗୁ ଦଳକୁ ଲାଭ ବଦଳରେ ଅଧିକ କ୍ଷତି ସହିବାକୁ ପଡ଼ିଛି। ପାର୍ଟିର ଭୋଟ ଅନ୍ୟ ଦଳକୁ ଚାଲିଯାଇଥାଏ। ହେଲେ ଅନ୍ୟ ଦଳ ନିଜ ଭୋଟକୁ ତାଙ୍କ ଦଳର ପ୍ରାର୍ଥୀଙ୍କୁ ପଠାଇବାକୁ ଇଚ୍ଛା ପ୍ରକାଶ କରନ୍ତି ନାହିଁ। ସେମାନଙ୍କର କ୍ଷମତା ମଧ୍ୟ ନ ଥାଏ। ଏହାଫଳରେ ଦଳର ନେତାଙ୍କ ମନୋବଳ ପ୍ରଭାବିତ ହେଉଛି। ଏହାକୁ ଦୃଷ୍ଟିରେ ରଖି ଦଳ ଶାସକ ଏବଂ ବିରୋଧୀ ଉଭୟ ମେଣ୍ଟଠାରୁ ଦୂରରେ ରହିଥାଏ ବୋଲି ସେ କହିଛନ୍ତି। ଏହାଛଡ଼ା ଭାଜପା ଧିରେଧିରେ ଲୋକଙ୍କ ଭରସା ହରାଉଛି। ଏଣୁ ଆଗାମୀ ଲୋକ ସଭା ନିର୍ବାଚନ ଏକତରଫା ହେବ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
