ମୁମ୍ବାଇ,୩।୧୨: ମୁମ୍ବାଇର ମଲାଡ ଅଞ୍ଚଳରୁ ଏକ ବଡ଼ ଖବର ସାମ୍ନାକୁ ଆସିଛି। ଶନିବାର ମଲାଡ ସ୍ଥିତ ଜନକଲ୍ୟାଣ ନଗରରେ ଥିବା ଏକ ୨୧ମହଲା ବିଶିଷ୍ଟ କୋଠାରେ ଭୀଷଣ ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡ ତୃତୀୟ ମହଲାରେ ଘଟିଥିବା ବେଳେ ଏହାକୁ ଆୟତ୍ତ କରିବା ପାଇଁ ଘଟଣାସ୍ଥଳରେ ଅଗ୍ନିଶମ ବିଭାଗର ୮ଟି ଗାଡ଼ି ପହଞ୍ଚିଥିଲା। ବର୍ତ୍ତମାନ ନିଆଁକୁ ଆୟତ୍ତ କରାଯାଇଥିବା ଜଣାପଡ଼ିଛି। ଏହି ଘଟଣାରେ ୮ଜଣ ଆହତ ହୋଇଥିବା ନେଇ ସିଏଫ୍ଓ ମୁମ୍ବାଇ ପକ୍ଷରୁ ସୂଚନା ଦିଆଯାଇଛି। ସମସ୍ତ ଆହତଙ୍କୁ ନିକଟସ୍ଥ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟପଟେ ଅଗ୍ନିକାଣ୍ଡ ସମୟରେ ଜଣେ ଯୁବତୀ ନିଜ ଜୀବନ ବଞ୍ଚାଇବାକୁ ଯାଇ ଝରକାରୁ ଡେଇଁପଡ଼ିଥିବା ଦେଖିବାକୁ ମିଳିଛି। ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
