ପାରଳାଖେମୁଣ୍ଡି, ୨୫ା୫ (ଗିରିଧାରୀ ପରିଛା): ସରକାର କୋଟି କୋଟି ଟଙ୍କା ବ୍ୟୟ କରି ବିଭିନ୍ନ ଉନ୍ନୟନମୂଳକ କାର୍ଯ୍ୟ କରୁଥିବା ବେଳେ ପ୍ରଶାସନ ଓ କିଛି ମୁଷ୍ଟିମେୟ ବ୍ୟକ୍ତିଙ୍କ ପାଇଁ ଲକ୍ଷ ଲକ୍ଷ ଟଙ୍କା ବ୍ୟୟ ବରାଦ କରି ନିର୍ମିତ ହୋଇଥିବା ମାର୍କେଟ କମ୍ପ୍ଲେକ୍ସ ଓ ଶୌଚାଳୟ କୌଣସି କାମରେ ଲାଗୁନି। ଗଜପତି ଜିଲା କାଶୀନଗର ବିଜ୍ଞାପିତ ଅଞ୍ଚଳ ପରିଷଦ ତରଫରୁ ନବ ନିର୍ମିତ ମାର୍କେଟ କମ୍ପ୍ଲେକ୍ସ ଓ ଶୌଚାଳୟ କୌଣସି କାମରେ ଆସୁନଥିବା ଦେଖିବାକୁ ମିଳିଛି। କାଶୀନଗର ବିକାଶ ଦିଗରେ ଏହି ମାର୍କେଟ କମ୍ପ୍ଲେକ୍ସ ନିର୍ମାଣ ହୋଇଥିବା ବେଳେ ଉଦଘାଟନକୁ ବର୍ଷେ ପୂରିଯାଇଥିଲେ ମଧ୍ୟ ଏହା କୌଣସି କାମରେ ଆସୁନାହିଁ। ଉକ୍ତ ମାର୍କେଟ କମ୍ପ୍ଲେକ୍ସ ୧୧ନଂ ୱାର୍ଡସ୍ଥିତ ବ୍ଲକ କଲୋନୀରେ ରହିଥିବା ବେଳେ ଏଠାରେ କିଛି ଲୋକଙ୍କ ନିଜ ସ୍ବାର୍ଥ ପାଇଁ ଏହି ମାର୍କେଟ କମ୍ପ୍ଲେକ୍ସ କରାଯାଇଥିବା ଅଭିଯୋଗ ହେଉଛି। ବର୍ତ୍ତମାନ ପର୍ଯ୍ୟନ୍ତ ଜଣେ ବି ବ୍ୟବସାୟୀ ଏହି କମ୍ପ୍ଲେକ୍ସ ନେବା ପାଇ ଇଚ୍ଛା କରୁନାହାନ୍ତି। ଏଠାରେ ସାଧାରଣ ଜନତାଙ୍କ ପ୍ରଶ୍ନ ଉଠିଛି ଯେ, ଯେଉଁ ସ୍ଥାନରେ ଆବଶ୍ୟକତା ରହିଛି ସେହି ସ୍ଥାନରେ କାହିଁକି ମାର୍କେଟ କମ୍ପ୍ଲେକ୍ସ କରାଯାଇନାହିଁ। କାଶୀନଗର କିଛି ନେତାଙ୍କ ନିଜ ସ୍ବାର୍ଥ ପାଇଁ ଅଞ୍ଚଳର ବିକାଶ ଦିଗରେ ଆସିଥିବା ସରକାରଙ୍କ ଅର୍ଥକୁ ଠିକ ଭାବରେ ଉପଯୋଗ କରୁନଥିବା ମତ ପ୍ରକାଶ ପାଇଛି। ସେହିପରି କାଶୀନଗର ବିଭିନ୍ନ ସ୍ଥାନରେ ଲକ୍ଷାଧିକ ଟଙ୍କାର ନୂତନ ଶୌଚାଳୟ ନିର୍ମାଣ ହୋଇଥିବା ବେଳେ ବର୍ଷ ବର୍ଷ ଧରି ସେଠାରେ ତାଲା ପଡ଼ି ରହିଥିବା ଦେଖିବାକୁ ମିଳିଛି। ଆହାର କେନ୍ଦ୍ର ନିକଟରେ ଥିବା ଶୌଚାଳୟ ବର୍ତ୍ତମାନ ବ୍ୟବହାର ନ କରି ବନ୍ଦକରି ରଖାଯାଉଛି। ସାଧାରଣ ଲୋକଙ୍କ ବ୍ୟବହାର ପାଇଁ ଏହା ହୋଇଥିବା ବେଳେ ତାହା କିନ୍ତୁ ଉପଯୋଗୀ ନହୋଇ ନଷ୍ଟ ହେବାରେ ଲାଗିଛି। ଏଥିପ୍ରତି ସ୍ଥାନୀୟ ପ୍ରଶାସନର ଦୃଷ୍ଟି ପଡୁନଥିବା ଅତି ଦୁର୍ଭାଗ୍ୟଜନକ ବୋଲି ଜନସାଧାରଣ ଓ ବୁଦ୍ଧିଜୀବୀ ପ୍ରତିକ୍ରିୟା ରଖିଛନ୍ତି। ତୁରନ୍ତ ଏହି ଶୌଚାଳୟଗୁଡ଼ିକ ଯେପରି ସାଧାରଣ ଲୋକଙ୍କ ପାଇଁ ବ୍ୟବହାର ହେଇପାରିବ ସେ ନେଇ ସ୍ଥାନୀୟ ପ୍ରଶାସନ ଦୃଷ୍ଟି ଦେବା ପାଇଁ ଦାବି ହୋଇଛି। ଏ ନେଇ କାର୍ଯ୍ୟ ନିର୍ବାହୀ ଅଧିକାରୀ ଭଗବତ ସାହୁଙ୍କ ସହ ଯୋଗାଯୋଗ କରିବା ପାଇଁ ଯାଇଥିଲେ ମଧ୍ୟ ଯୋଗାଯୋଗ ହୋଇପାରିନାହିଁ।
